7
Hiobezi Anuture maname mi sâckewec
1 “Ŋiczi mâreŋko ʒâic gie sâko bahuc jueŋgopeneŋ,
juju dameŋ‐nâŋec i kiŋaŋ qaqa jaŋere juju dameŋ irec sâc.
2 Kiŋaŋ qaqazi jâcmumucko ŋeocte ecneekac
â gieŋiczi gie furire woŋec juekac.
3 Eme no irec sâc jaha ehuc mosane mosane
bibiaŋte woŋec maŋgâŋ juekopac,
ehame ŋafe sâc ʒâic busâqoc fua‐nareekac.
4 No waha guŋ fohuc ʒiŋuc muekopac:
‘Hae fureme faharezapo me!’
no risimbiŋne qahuc hae fureocte enareekac hâcne.
5 Umbeŋ â wânâŋzi sahac‐nane sâcke‐fâreekac,
wicnane somieekac, izi mi ʒoraha
pupucnerâ mocwâc fâuckeekac.
6 Wiac âsu biaŋ moc mana manahapene izia rârâŋneekac
irec sâc jaha bibiaŋ dameŋ‐nane nowaru‐fâreekac.
7 “O Anutu, juju‐nane i nokafe sawa,
go irec manasuc,
juju biaŋ‐nane i biac omaekac.
8 Go ʒiŋuczia jupe honecnuekiczi
juku mocwâc mi honecnucmu,
go norao ʒâŋe fihuc juhaŋtec jaha omaepemu.
9 Karoraczi tâtierâ omaeekac
irec sâc jaha omaerâ hâmoc haeo huocmuzi
mocwâc mi wefuocmu.
10 E ficticnao mocwâc mi risieocmu,
â ehec jumbiŋ jaŋe ine ere nikec‐jopaocmu.
11 “No irec hâcne niniŋkerâ dâŋemâc mi ŋepemu,
buʒâiczi ɋârâŋkehuc maŋnane kidapeha dâŋ muzepac,
ehuc maŋnanezi mana gâpârehuc muheŋɋâŋ ezepac.
12 No hâwecte oâ sâko iŋucne
irec kâpâcwâru bacnukomec me?
13 No tâpiri ropemurâ waha fomanaekopac,
ehuc ʒiŋuc muekopac:
‘Fomanahape ʒâic‐nane mâteŋkezejec!’
14 No iŋuc muhape
goki maŋʒâŋe‐nane bâtikietec
wiac hâhâwicne hone manac ehuc
bipic‐nane taraekac.
15 Iŋuc fua‐nareme bituazore enareekac,
ehuc ʒâic busâqoc sâko manahuc hâmozo muekopac.
16 No mâreŋko ʒuhuckerâ jujure takicnukac,
juju‐nane i nokafe sawa,
irec go behecnuzemec.
17 Ŋic e wemo macticnere manacnetec boc fefene eekac?
 wemo‐ticnere manasucnehuc hone maiŋ ecneekic?
18 Go furic sâc ŋic hone soŋaŋ ejareekic,
ehuc eesâicko râec‐jopaekic.
19 Go dameŋ bembeŋne mac moc behecnutec
no buc juhuc maŋnane mocwâc fuazac me.
20 Go fekicne jukicte no iŋucnezi sâqocne bahuc
wemocko moc bawahacguzapo.
Go wemocte ma âkendâŋnuhuc
tepe motecge norao qâtâcnetec wareekac?
Wemocte nore manatec tagi sâkoge tinac epe hetaracnukomec?
21 Go qaqatara‐nane bârâriehuc
kiŋ bahac‐nane wemocte mi bâtâmire‐narekomec?
No ʒiŋuczia hâcne ʒâŋeruŋko hurâ fopemu,
eme omaehape mocwâc mi bâfuacnucmu.”