36
Ŋicwofuŋzi papia ʒocko rikewec
1 Josiare ŋokâ Jojakim e Judare ŋicwofuŋ jume jara 4 eha Wofuŋtaonec dâŋ kecʒiŋuc Jeremiarao fuawec:
2 “Go papia foforiekicne moc rorâ Israere dâŋ â Judare dâŋ erâ ŋicne ŋicne jaŋere dâŋ gazapo i qâreŋke‐fârec, ine Josiare dameŋko fuŋkerâ gazapozi gazahuc juwefuku miŋecgac gazakopac jaha dâŋ i hâcne.
3 Eme Juda kikefuŋ jaŋe sisipiric sasawa fua‐jareocte manasuhuc jukopac, irec biŋe manarâ ru sâc hata‐jeŋic hehesicne beheniŋmu mecne; iŋuc epie no kiŋ bahac‐jeŋic â sâqocne‐jeŋic bâtâmirepemu.”
4 Iŋuc âzâcneme Jeremiazi Neriare ŋokâ Baruku hefârewec, eme Wofuŋ e dâŋ âzâcne‐fârewec i Baruku e Jeremiazi âzâcne mutâc ewec sâc papiao qâreŋkewec.
5 Ehame Jeremiazi Baruku ʒiŋuc muhuc mutâcnecnewec: “No Wofuŋte ufuŋko fepere aka henarekicnere sâcne mi fepemu.
6 Irec goki ferâ Wofuŋte dâŋ gaza mutâc epe sâc papiao qâreŋkemec i Wofuŋte ufuŋko ŋic ŋokac nânâ sowa jujure hombaŋte fisihapie wose‐jarezemec, erâ Juda hae ŋerakackonec ŋic wefuŋgopieŋ jaŋe mâmâc wose‐jarezemec.
7 Iŋuc etec jaŋe mu huacbuc ehuc Wofuŋte maio daperâ ru sâc eebapa‐jeŋic hehesicne i beheniŋmu mecne; Wofuŋzi ŋicguru ʒi kimbeŋ repicne qajarehuc aaric sâko mana‐jareocte muwec hâcne.”
8 Eme Neriare ŋokâ Baruku e porofete Jeremiazi dâŋ âzâcne mutâc ewec i mana rereŋ efârehuc Wofuŋte dâŋ papiao qâreŋkewec i Wofuŋte ufuŋko ŋic ŋokâc wose‐jarewec.
9 Eme Josiare ŋokâ, Judare ŋicwofuŋ Jojakim e ŋicwofuŋ jume jara 4 â mosa 9 tarazo ewec dameŋ ira ine Jerusalem hae rune ʒeŋgoma â Juda hae ŋerawec irec ŋic ŋokac Jerusalem haeo fisimbiŋ sasawa jaŋe Wofuŋte maio sowa jujure hombaŋ moc ŋeniŋte mumbiŋ.
10 Ŋehapie Baruku e Jeremiare dâŋ papiao qâreŋkekicne i Wofuŋte ufuŋko wose‐jarewec, ine Safaŋte ŋoka qâreŋŋic Gemaria ere ficmaŋko ŋic ŋokac sasawa jaŋere maio wosewec hâcne. Ficmaŋ izi ine Wofuŋ ufuŋ‐ticnere hae ʒoŋa faicpec Motâc Ɋâricnere heririŋko ŋewec.
11 Eme Mikaja e Gemariare ŋokâ â Safaŋte ŋosazi Wofuŋte dâŋ papiao qâreŋkekicne i mana‐fârewec.
12 Manarâ ŋicwofuŋte ficko hurâ qâreŋŋic ere ofisio fewec. Ferâ ŋic fekicne kecʒiŋuc jaŋe tumaŋnehapie honec‐jopa‐fârewec: Qâreŋŋic Elisama â Semajare ŋokâ Delaja â Akaboro ere ŋokâ Elenataŋ â Safaŋte ŋokâ Gemaria â Hananiare ŋokâ Zedekia erâ fekicne gâcne sasawa.
13 Mikaja eki ine Barukuzi ŋic ŋokac papiaonec dâŋ wose‐jareme manawec i jaza‐fârewec.
14 Jazame ŋic fekicne sasawa jaŋe Netaniare ŋokâ Jehudi, Selemiare ŋosa, Kusire apa hâcne e Baruku ʒiŋuc âzâcneocte erao sorembiŋ: “Go ŋic ŋokac papia wose‐jaremec i hâcne rorâ wahazemec.” Eme Baruku, Neriare ŋokâ hâcne, e papia i rorâ jaŋerao huwec.
15 Eme jaŋe âzâcnerâ mumbiŋ: “Go waha ŋehuc wose‐nârec!” Iŋuc mupie Barukuzi wose‐jarewec.
16 Eme jaŋe dâŋ i mana‐fârerâ hohonec ehuc bipic tara‐jareme Baruku âzâcnembiŋ, “Nâŋe dâŋ i furu jaha ŋicwofuŋ âzâcnenʒepeneŋ!”
17 Baruku ine ʒiŋuc wiocnembiŋ: “Go muc, dâŋ i weniŋuc erâ qâreŋke‐fâremeŋ; eki mume sâc qâreŋkemeŋ me weniŋuc?”
18 Barukuzi ine dâŋ ʒiŋuc bâtikie‐jarewec: “Jeremia e dâŋ i sasawa miczi nazame tindezi papiao qâreŋkepo.”
19 Eme ŋic fekicne jaŋe Baruku âzâcnembiŋ: “Go â Jeremia ŋohe ra soŋkenic, ehuc wena junicmu i ŋic moc mi jazapire mananʒepieŋ.”
20 Iŋuc âzâcnerâ papia i qâreŋŋic Elisama ere ficmaŋko soŋkerâ ŋicwofuŋte hae ʒoŋao fembiŋ, ehuc wiac fuawec irec dâŋ ŋicwofuŋ âzâcne‐fârembiŋ.
21 Âzâcnepie ŋicwofuŋzi Jehudi e papia roocte sorewe; eme eki qâreŋŋic Elisamare ficmaŋkonec ro bafisiwec, bafisirâ ŋicwofuŋ â ŋic fekicne ŋicwofuŋ orâŋkehuc doma‐fârembiŋ jaŋe wose‐jarewec.
22 Eme mosa namba 9 maickewecte ŋicwofuŋ e hoe dameŋte ficko ŋehame maŋfuŋnao ʒafeo ʒoc ʒahuc fowec.
23 Eme Jehudi e ombâŋne 3 me 4 wosewec sâc ŋicwofuŋ e sâqe moteczi bâtâcnerâ ʒocko beheme huwec; iŋuc ekume ine papia i ʒafeo ʒoc ʒahuc fowec ira hurâ ʒafârewec hâcne.
24 Ŋicwofuŋ â kiŋaŋŋicfâcne jaŋe ʒeŋgoma dâŋ i mana‐farerâ sifu bipic‐jeŋic mi tarawec; ehame ŋaqi‐jeŋic wâc mi bâsuckembiŋ.
25 Eme Elenataŋ â Delaja erâ Gemaria jaŋe ŋicwofuŋ papia mi rikeocte ʒoɋachec numucnepie mi mana‐jarewec wâc.
26 Aricne, ŋicwofuŋ e ŋokâ‐ticne Jeramele â Aʒariele ere ŋokâ ʒâŋene Seraja erâ Abedere ŋokâ Selemia jaŋe qâreŋŋic Baruku â porofete Jeremia rocjofaniŋte mujarewec, Wofuŋzi ine soŋjofawec.
Papia harierâ qâreŋkekicne
27 Eme Baruku e Jeremiazi dâŋ âzâcne mutâc ewec sâc qâreŋkewec irec papia i ŋicwofuŋzi ʒocko beheme ʒafâreme Wofuŋte dâŋ kecʒiŋuc Jeremiarao fuawec:
28 “Go papia ɋâricne moc roc, erâ papia raŋɋanao dâŋ fowec â Juda ŋicwofuŋ Jojakimzi rikewec ijaha harierâ qâreŋke‐fârezemec.
29 Eme Juda ŋicwofuŋ Jojakim ere dâŋ ine ʒiŋuc muzemec, ‘Wofuŋzi kecʒiŋuc mukac: Go papia keci kecʒiŋuc muhuc ʒocko behetec ʒawec: “Wemocte ʒiŋuc qâreŋkemeŋ: Babe ŋicwofuŋ e fisi‐jâmbâŋkerâ mâreŋ ʒi ima bahuc ŋic â qowifâc‐ticne bâsirowec‐jopaocmu?”
30 Irec Wofuŋ no Juda ŋicwofuŋ Jojakim gore ʒiŋuc mukopac: Ɋâricfâcge jaŋeraonec moczi Dawidire eri ŋeŋeo mi ŋezejec, ehame qâŋɋâŋge i mâc kosa behepie ʒoaŋ fârorocko â ŋafe mâmâteŋko fozejec.
31 Eme go gahacne â ɋâricfâcge erâ kiŋaŋŋicfâcge ŋoŋe kiŋ bahac‐ŋeŋicte okacne bazu‐ŋarepemu; ehuc ŋoŋe mecne, Jerusalem hae rune mecne â Judare ŋicfâc mecne sisipiric wiac fua‐ŋareocte uŋdâŋ ŋaza‐fârepe mana suambiŋ i mupe fârio qaocmu.’ ”
32 Eme Jeremia e papia ɋâricne moc rorâ Neriare ŋokâ qâreŋŋic Baruku e râcnewec, eme Juda ŋicwofuŋ Jojakim eki papia ʒocko beheme ʒawec irec dâŋ i Jeremiazi âzâcne mutâc ewec sâc furu jaha mocwâc qâreŋkewec. Erâ i sawa mâcne, dâŋ iŋucne gâcne bocjaha râe ʒuhuc ekicne.