37
Jeremia e kâpâcwâru ficko râekicne
1 Babe ŋicwofuŋ Nebukaneza e Jojakimte ŋokâ Konia ere okacne Josiare ŋokâ Zedekia ŋicwofuŋ âkendâŋneme eki Juda mâreŋko ŋicwofuŋ gie bahuc juwec.
2 Mâc e jahacne mecne, kiŋaŋŋicfâc‐ticne mecne â mâreŋ irec ŋic ŋokac mecne jaŋe porofete Jeremiazi Wofuŋte dâŋ jazawec i mana takirembiŋ.
3 Ehame ŋicwofuŋ Zedekia e sifu Selemiare ŋokâ Jehuka erâ Masejare ŋokâ taha bapa Zefania jahe porofete Jeremia ʒiŋuc âzâcnenicte erao sorec‐jofawec: “Go Wofuŋ Anutu‐nâŋec e nâŋere erâ wira wâwâsic ecnezemec!”
4 Jeremia e ine kâpâcwâru ficko biac mi râembiŋte ŋic ŋondeŋko rac warec ehuc jaha juwec.
5 Dameŋ ira Faraore momorifâc jaŋe râsi fisiniŋte Aigita mâreŋ biac behembiŋ, eme Kaldea ŋic Jerusalem somâ bahuc jumbiŋzi biŋe‐jeŋic manarâ Jerusalem beherâ rambiŋ.
6 Eme Wofuŋte dâŋ porofete Jeremiarao kecʒiŋuc fuawec:
7 “Wofuŋ Israere Anutu e ʒiŋuc mukac: Juda ŋicwofuŋzi no mu wioc enarenicte ŋic jajahec sorec‐jofame warepic jahe e ʒiŋuc âzâcnezepirec, ‘Manakic, Farao momorifâc‐ticne bafic‐ŋopaniŋte warehuc jumbiŋ jaŋe mocwâc Aigita mâreŋ‐jeŋicko risiezo eŋgopieŋ.
8 Kaldea ŋic jaŋe ine risie ware hae ʒi somâ barâ ro rauc ehuc turuŋkepie ʒaocmu.
9 Irec Wofuŋ no ʒiŋuc mukopac: Ŋoŋe ʒiŋuc muhuc maŋŋeŋic mi eatuckenʒepieŋ: “Kaldea ŋic jaŋe behec‐nâporâ rasanaŋkeniŋmu,” jaŋe mi rajâmbâŋkeniŋmu, aricne.
10 Me Kaldea ŋic jaŋere momorifâc ŋoŋehec ʒika gie baeŋgopieŋ i sanaŋkerâ jopa‐fârepie muzac ŋic ʒâpâ jopakicne nâfocne sawa jaŋe sifu ru sâc qoruc boze‐jeŋic konec faharerâ hae ʒi turuŋkepie ʒazac.’ ”
11 Farao momorifâc‐ticne jaŋe fisizo ehapie Kaldea ŋic jaŋe Jerusalem hae beherâ rambiŋ.
12 Rahapie Jeremia e Benjamiŋ mâreŋko rarâ ira soctofafâc‐ticne jaŋehec mâreŋ rukec qaqare dâŋ moc fuawec i mutaraocte Jerusalem hae behezo ewec.
13 Ehuc ine Benjamiŋ Motâcko fisime ŋic moc ʒâŋene Iria, Selemiare ŋokâ â Hananiare ŋosa hâcne, e ira momori soŋaŋ domaweczi Jeremia ʒiŋuc muhuc aka hecnewec: “Go Kaldea ŋic jaŋerao wisezo ekic.”
14 Jeremiazi ine muwec: “Burec, no Kaldea ŋic jaŋerao wisezo mi ekopac.” Iria eki ine dâŋ i mana‐bipiehuc Jeremia rorâ ŋic fekicne jaŋerao barawec.
15 Eme ŋic fekicne jaŋe ine Jeremiare aaric‐jopame qarâ qâreŋŋic Jonataŋ ere ficko kâpâcwâru bambiŋ, fic i mutarapie kâpâcwâru fic ewec hâcne.
Zedekia â Jeremia jahe dâŋ muc manac epic
16 Iŋuc ehuc Jeremia fic maŋne moc, haroŋaŋko gufukicne erâ opâ nombâŋhec ira râepie ŋeha ʒoaŋ bocjaha tarawec.
17 Juku ʒoaŋ mocko ine ŋicwofuŋ Zedekiazi dâŋ râeme rame Jeremia erao jowa fembiŋ. Eme ŋicwofuŋzi erific‐ticnao kamierâ wiocnehuc muwec: “Wofuŋte dâŋ moc fokac me?” Jeremiazi muwec: “Fokac.” Erâ muwec: “Go Babe ŋicwofuŋ ere meo fecmu.”
18 Iŋuc murâ ŋicwofuŋ Zedekia dâŋ ʒiŋuc ʒuhuckerâ âzâcnewec: “No go â kiŋaŋŋicfâcge me ŋicguru ʒi ŋoŋe wemo wiac sâqocne moc eŋarepore kâpâcwâru ficko râecnumbiŋ?
19 Me porofetefâc‐ŋeŋic dâŋ ʒiŋuc ŋaza jumbieŋ jaŋe weni, ‘Babe ŋicwofuŋ e ŋoŋe me mâreŋ ʒi râsi mi fisi‐ŋareocmu?’
20 Irec ŋicwofuŋ‐nane, ʒi mupe manac: Go nunumu‐nane kecʒiŋuc mana‐narec mac: No qâreŋŋic Jonataŋ ere ficko hâmozipore mutec ira mocwâc mi bârisiecnunʒepieŋ.”
21 Eme ŋicwofuŋ Zedekiazi mume Jeremia e momori ŋic jaŋere hae ʒoŋao bara soŋaŋkehuc jumbiŋ. Ehuc ira ʒoaŋne ʒoaŋne nânâ poroŋ bapa jaŋeraonec nânâ poroŋ hâcbuc moc râcnehuc jukupie haeo nânâ poroŋ omae‐fâreme sawa behembiŋ. Iŋuc ehapie Jeremiazi momori jaŋere hae ʒoŋao juwec hâcne.