41
1 Eme mosa namba 7 ira Isimae, Netaniare ŋokâ â Elisamare ŋosa hâcne, e ŋicwofuŋ guruonec fuakicne â ŋicwofuŋte ŋic kâcɋene moc juweczi ŋic 10 jaŋehec Mizipa haeo Ahikam ŋokâ‐ticne Gedalia erao fuambiŋ; eme ira mâmâc ŋehuc nânâ nâmbiŋ.
2 Ehuc Netania ŋokâ‐ticne Isimae â ŋic 10 ehec jumbiŋ jaŋe faharerâ Ahikamte ŋokâ Gedalia, Safaŋte ŋosa hâcne e ʒikazi qambiŋ; iŋuc ehuc Babe ŋicwofuŋzi mâreŋ soŋaŋ âkendâŋnewec ŋic e hâcne qâhâmombiŋ.
3 Erâ Isimae â ŋicfâcne jaŋe Judaŋic Gedaliahec Mizipa haeo jumbiŋ jaŋe mecne â Kaldea momori ŋic ira jumbiŋ jaŋe mâmâc qâhâmoc‐jopa‐fârembiŋ.
Ŋic gâcne qâhâmoc‐jopakicne wâc
4 Gedalia qâhâmombiŋ irec biŋe ŋic moczi moc mi manaha hae furewec.
5 Hae fureme ine Sikem, Silo â Samaria haeonec ŋic 80 busâqocte erâ mecʒâwâ‐jeŋic bâtâcnekicne â ŋaqi‐jeŋic bâsuckekicne â sahac‐jeŋic kosa hetâcnekicne jaŋe taha bâzi â hosâc âsu ririkere wiac Wofuŋte taha ufuŋko bafeniŋte fisimbiŋ.
6 Eme Netaniare ŋokâ Isimae e bâfuac‐jopaocte Mizipa haeonec kio kio waha rawec, raku bâfuac‐joparâ ʒiŋuc jazawec: “Ŋoŋe ware Ahikamte ŋokâ Gedalia erao feniŋ.”
7 Eme hae ʒâʒâŋiŋko fe fisipie Isimae Netaniare ŋokâ e â ŋic ehec jumbiŋ jaŋe qâhâmoc‐joparâ mi opâ nombâŋko behec‐jopapie hunʒepieŋ i!
8 Jaŋeraonec ŋic 10 jaŋe ine Isimae ʒiŋuc âzâcnembiŋ: “Mi qâhâmoc‐nâpoc, nâŋe wiac kecʒiŋuc gieo soŋkembeŋ fonârekac: Jacgoŋ, padi, wokemaŋ â baŋac.” Iŋuc mupie âgofâc‐jeŋic jaŋehec mi qâhâmoc‐jopahuc mâc behec‐jopawec.
9 Isimaezi ŋic qâhâmoc‐jopawec jaŋere qâŋɋaŋ i opâ nombâŋko behec‐jopame humbiŋ; nombâŋ i kâcɋene, erâ i ŋicwofuŋ Asa eki Israe ŋicwofuŋ Basazi râsi fisihame mume rombiŋ. Nombâŋ ira hâcne Netaniare ŋokâ Isimaezi mume ŋic qâhâmoc‐jopakicne jaŋe behec‐jopapie hurâ fusembiŋ.
10 Ŋicwofuŋ momori fuŋfuŋfâc‐ticne jaŋere micne Nebuʒaradaŋ eki ŋic ŋokac nâfocne Mizipa haeo jumbiŋ â ŋicwofuŋ otâfâcne jaŋe Ahikamte ŋokâ Gedaliazi soŋaŋ‐jopaocte erao râec‐jopawec. Eme Netaniare ŋokâ Isimae e ŋic ŋokac nâfocne i jaŋe hâcne rocjoparâ Amoŋŋic jaŋere mâreŋko wiseocte kâpâcwâruo bacjopa rawec.
11 Eme Kareare ŋokâ Johanaŋ â momori micne gâcne sasawa ehec jumbiŋ jaŋe Netaniare ŋokâ Isimaezi mâsi repic qapicne efârewec irec biŋe manambiŋ.
12 Manarâ ŋicfâc‐jeŋic rocjopa‐fârerâ Netaniare ŋokâ Isimae ehec ʒika qaniŋte rambiŋ; raku Gibeoŋ hae heririŋko opâ ʒâkâŋ sâko fowec ira bâfuambiŋ.
13 Eme ŋic ŋokac Isimaehec jumbiŋ jaŋe Kareare ŋokâ Johanaŋ â momori micne sasawa ehec fisimbiŋ jaŋe honec‐joparâ bubiaŋ mana‐fârembiŋ.
14 Ehuc Isimaezi Mizipa haeonec amec‐jopa rawec ŋic ŋokac i jaŋe sasawa e râpeckerâ Kareare ŋokâ Johanaŋtao rafârembiŋ.
15 Netaniare ŋokâ Isimae ine ŋic 8 jaŋehec wiserâ Amoŋŋic jaŋerao rambiŋ.
16 Netaniare ŋokâ Isimae e Ahikamte ŋokâ Gedalia qâhâmorâ ŋic ŋokac nâfocne Mizipa haeonec amec‐jopa rawec jaŋe hâcne Kareare ŋokâ Johanaŋ â momori micnefâc‐ticne jaŋe rocjopambiŋ. Ine ŋic mecne, momori mecne, ŋokac naru motec mecne erâ ŋic fekicne mâmâc, jaŋe Johanaŋzi Gibeoŋ haeonec bârisiec‐jopawec hâcne.
17 Erâ raku Betelehem hae bâqiŋkehuc Kimiham tomafic ira ŋemanambiŋ, erâ irecnec Aigita mâreŋko raniŋte manasumbiŋ.
18 Netaniare ŋokâ Isimae e Ahikamte ŋokâ Gedalia, Babe ŋicwofuŋzi mâreŋ soŋaŋ âkendâŋnewec e hâcne qâhâmowecte Kaldea ŋic jaŋere hâwic‐jopaha raniŋte mumbiŋ.