42
Jeremia e Johanaŋtao dâŋ râeme rawec
1 Eme momori micne sasawa â Kareare ŋokâ Johanaŋ â Hosajare ŋokâ Aʒaria erâ ŋic ŋokac fekicne wahakicne sasawa
2 jaŋe porofete Jeremiarao rarâ ʒiŋuc âzâcnembiŋ: “Go dâŋnâŋec manarâ Wofuŋ Anutuge ŋic ʒanʒaŋne mac ʒi nâŋere erâ numucnezemec. Go gahacne ʒâŋezi honekic, nâŋe bocjaha jumbeŋzi afecne sawa embeŋ juŋgopeneŋ.
3 Eme Wofuŋ Anutuge e wena ranaŋte â wemo wiac ebac enaŋte nâzâ nâwotuc ezejec.”
4 Eme porofete Jeremiazi jazawec: “Sâcne, manakopac, dâŋ muŋgopieŋ irec sâcko Wofuŋ Anutu‐ŋeŋic numucnepemu, eme Wofuŋzi dâŋ okacne bâtikie‐nareme sâc ŋazapemu; no dâŋ moc mi hesoŋke‐ŋarepemu.”
5 Jaŋe ine Jeremia ʒiŋuc âzâcnembiŋ: “Wofuŋ Anutugezi dâŋ nâzâ mutâc ecmurâ nâŋerao sorecguocmu i mutec mana rereŋ mi efârenaŋmuo ine Wofuŋ e jahac mumutaniŋ ŋicnâŋec fârine â siocmâc ehuc fuŋne‐nâŋec rituzejec.
6 Nâŋe Wofuŋ Anutu‐nâŋectao sorecguŋgopeneŋ e dâŋ biaŋne me sâqocne nâzâme ine sifu dâŋticne mana rereŋ enʒepeneŋ; iŋuc hâcne juhâmonaŋte Wofuŋ Anutu‐nâŋecte micdâŋ mana rereŋ enʒepeneŋ.”
Aigita mâreŋko mi raniŋte jazawec
7 Ʒoaŋ gie bapa 10 tarame Wofuŋtaonec dâŋ Jeremiarao fuawec.
8 Eme Kareare ŋokâ Johanaŋ â momori micne ehec jufârembiŋ erâ ŋic ŋokac fekicne wahakicne jaŋe sasawa hefârec‐jopawec.
9 Erâ jazawec, “Wofuŋ, Israere Anutu, e wâwâsic dâŋŋeŋic âzâcnepemurâ sorecnumbiŋ eki hâcne ʒiŋuc mukac:
10 ‘Ŋoŋe mâreŋ ʒira jusanaŋkeniŋmuo ine bafaharec‐ŋoparâ mocwâc mi bârândiŋ‐ŋopapemu, â sarac‐ŋoparâ mi qâfiec‐ŋopapemu, no wiac hâhâwicne eŋarepo irec busâqoc manakopac hâcne.
11 Ŋoŋe Babe ŋicwofuŋ hâhâwic bacneeŋgopieŋ i behenʒepieŋ, ŋoŋe ere mi hâwic‐ŋopazejec, Wofuŋ nore dâŋ iŋuc; no bafic‐ŋopahuc ere meonec batarac‐ŋopapemurâ ŋoŋehec jukopac hâcne.
12 No buuruc eŋarepemu, eme eki busâqoc mana‐ŋarehuc mâreŋ‐ŋeŋickoa juniŋte mutara‐ŋarezejec.’
13 ‘Nâŋe mâreŋ ʒira mi junʒepeneŋ’, ŋoŋe iŋuc muhuc Wofuŋ Anutu‐ŋeŋicte dâŋ qatarahuc dâŋ ʒiŋuc ʒuhuckerâ muniŋmu:
14 ‘Aricne, nâŋe Aigita mâreŋko ʒika mi fokacko â ʒikare qeŋfânâŋ mi fuaocmu erâ nânâre mi hâmonaŋmu ira ra junʒepeneŋ.’
15 Iŋuc muniŋmuo ine Juda guruonec ŋic nâfocne juŋgopieŋ ŋoŋe Wofuŋte dâŋ mananiŋ: Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: ‘Ŋoŋe jâmbomac Aigita mâreŋko razore qizec qahuc ira juniŋte raniŋmuo
16 ine ʒikare hâhâwic bajuŋgopieŋ ʒika izi hâcne Aigita mâreŋ ira bâfuac‐ŋopaocmu, erâ rorocte mezac‐ŋopakac roroc izi Aigita mâreŋko fisi‐ŋareme sipirickeniŋmu hâcne.
17 Aigita mâreŋko ra juniŋte qizec qaŋgopieŋ ŋic i jaŋe ira ʒikare nânâ efâreniŋmu, erâ nânâre â huc hâmocte sipirickeniŋmu; eme sisipiric mupe fai‐jeŋicko feocmu i jaŋeraonec moczi moc mi wisecnerâ juocmu.’
18 “Anutu Tâpiri Ɋuŋɋasaŋ Wofuŋ, Israere Anutu e kecʒiŋuc mukac hâcne: ‘Aaric â kimbeŋ‐nanezi Jerusalem ŋecjucfâc‐ticne jaŋere faio fewec iŋuc jaha kimbeŋ‐nane Aigita mâreŋko raniŋmu ŋoŋere faio hoŋkepe feocmu; eme ŋoŋe sâwecte biŋe ehapie ŋic gâcnezi honec‐ŋoparâ bipic tatara ejarezejec, musâqorec‐ŋopapie mimi busâqoc fai‐ŋeŋicko fezejec, ehame hae mâreŋ ʒi mocwâc mi honenʒepieŋ.’
19 O Judaŋic nâfocne, ŋoŋe Wofuŋzi ʒiŋuc ŋazakac, ‘Aigita mâreŋko mi ranʒepieŋ!’ Irec no miŋecgac uŋdâŋ ŋazakopac i mana‐jâmbâŋkeniŋ me!
20 Manaŋgopieŋ, ŋoŋe ʒiŋuc muhuc Wofuŋ Anutu‐ŋeŋic erao sorecnuhuc ŋaŋac juju‐ŋeŋic ʒârâ ʒâpâ faio râezo embiŋ: ‘Go nâŋere erâ Wofuŋ Anutu‐nâŋec numucnezemec, eme Wofuŋ Anutu‐nâŋec e dâŋ i me i mume nâzâ‐fâretec mana rereŋ enʒepeneŋ.’
21 Eme no dâŋ i hâcne miŋecgac mufua‐ŋarekopac, ŋoŋe ine Wofuŋ Anutu‐ŋeŋicte dâŋ mufua‐ŋare‐fârepemurâ ŋoŋerao sorecnuwec i ŋazape mana rereŋ moc mi eŋgopieŋ.
22 Irec ʒiŋuc mana‐hâmonʒepieŋ: Ŋoŋe rarâ juniŋte eŋarekac hae mâreŋ ira hâcne ʒikare nânâ ehuc wâc rorocte â huc hâmocte sipirickenʒepieŋ.”