13
Mâreŋ gâcne ro rauc embiŋ irec dâŋ
1 Eme Josua e jara bocjaha bazurâ ŋicqizec jâmbâŋ ewec. Irec Wofuŋzi ʒiŋuc âzâcnewec: “Go jara bocjaha bazurâ ŋicqizec jâmbâŋ ekomec. Â mâreŋ ro rauc eene i kâcɋene jaha fokac.
2 Mâreŋ furu forakac ine ʒiŋuc: Filisa ŋic jaŋere mâreŋ sasawa, erâ Gesuri ŋic jaŋere mâreŋ i mâmâc.
3 I Aigita mâreŋ ʒoaŋ wewefunaopec Sihora opâonec faicpec rafeku Ekoroŋ hae mâreŋte mao fisikac. I Kanaaŋ ŋic jaŋere mâreŋ. Filisa ŋic jaŋere fekicnefâc 5 jaŋe hae mâreŋ jurambiŋ ine ʒiŋuc: Gaza, Asidode, Asikaloŋ, Gati â Ekoroŋ. Erâ Awim mâreŋ juwicpec forakac i wâc furu fokac.
4 Erâ Kanaaŋ ŋic jaŋere mâreŋ sasawa, erâ wâc Sidoŋ ŋic jaŋere mâreŋ moc ʒâŋene Meare irecnec raku Afeke haeo Amori ŋic jaŋere mao fisikac.
5 Erâ wâc Gebali ŋic jaŋere mâreŋ â Herimoŋ tikifuŋko Baali‐Gada hae ŋekac irecnec raku ʒoaŋ wewefunaopec Hamati hae mendâŋko fisikac, Lebanoŋ mâreŋ sasawa i furu fofârekac hâcne.
6 Erâ tiki mâreŋ sasawa Lebanoŋkonec raku Misirefo‐Maim mâreŋko fisikac, erâ wâc Sidoŋŋic jaŋere mâreŋ i mâc fofârekac. Eme Israe ŋic jaŋe ira raʒiniŋte no nahac mâreŋ rune bârâriec‐jopapemu. Go ine mutâcne‐garepo irec sâcko Israe ŋic jaŋe mâreŋ i ro rauc eniŋte kâdoc qajarezemec.
7 Ʒi ine fuŋkerâ ŋic guru 9 â Manase guru dâkâne jaŋe mâreŋ i ro rauc eniŋte bâtâc bajarec.”
Manase, Rubeŋ â Gade jaŋere mâreŋ
8 Rubeŋ â Gade guru jaŋe Manase guru dâkâne moc jaŋehec juniŋte Wofuŋte kiŋaŋŋic Mosezi Jordaŋ ŋifec ʒoaŋ wewefunaopec mâreŋ jarewec irec ma ʒiŋuc forawec:
9 Aronoŋ wâneŋko Aroe hae opâmecko ŋekac irecnec fuŋkerâ raku wâneŋ ʒâʒâŋiŋko hae ŋekac i fotâcnerâ fe Medeba wâneŋ sasawa rofârerâ Diboŋ haeo fisiwec.
10 Erâ Amori ŋic jaŋere ŋicwofuŋ Sihoŋ, Hesiboŋ haeo juwec, ere hae i mâmâc sasawa rofârerâ Amoŋŋic jaŋere mao fisiwec.
11 Izi Gileade mâreŋ â Gesuri ŋic â Makati ŋic jaŋere mâreŋ, erâ Herimoŋ tiki â Basaŋ mâreŋ fotâcnerâ raku Saleka haeo fisiwec.
12 Erâ Basaŋ ŋicwofuŋ Ogo ŋeŋe juju ewec hae jajahec Asitaroto â Ederei, i erâ ere uucmaŋ furu jaha. Refaim ŋic nâfocne jaŋeraonec Ogo mocjaha sawa hetirine juwec. Ŋicwofuŋ ʒi jahe hâcne Mosezi jofa jâpec ejactewec.
13 Israe ŋic jaŋe Gesuru ŋic â Makati ŋic jopa jâpec mi ejarembiŋ. Irec jaŋe Israe ŋic jaŋere guruo jumbiŋzi juŋgopieŋ hâcne.
14 Lewire guru sasawa jaŋe ine Mosezi mâreŋ moc mi jarewec. Jaŋe Wofuŋzi Mose âzâcne mutâc ewec irec sâcko Israere Wofuŋ Anutu ere mamanac sawa juhapie taha bâzi ririke gie izi jaŋere juju bâfuaocte mujarewec.
15 Eme Mose e Rubeŋte guru garikiŋ‐jeŋic sâc mâreŋ ʒiŋuc ro rauc eniŋte jarewec:
16 Aronoŋ wâneŋko Aroe hae opâmecko ŋekac irecnec fuŋkerâ raku wâneŋ ʒâʒâŋiŋko hae ŋekac i fotâcnerâ fe Medeba wâneŋ sasawa i mâmâc rofârewec.
17 Ehuc ʒuhuckerâ Hesiboŋ hae â hae piticfâcne wâneŋko ŋerambiŋ jaŋe rocjopawec wâc; ine kecʒiŋuc: Diboŋ, Bamo‐Baali, Bete‐Baali‐Meaŋ,
18 erâ Jahaza, Kedemoti â Mefata.
19 Erâ Kiriataim â Sibema, erâ wâneŋ tiki‐ticnao Zeresaha.
20 Erâ Bete‐Peoro â Pisiga tiki irec heâŋ, erâ wâc Bete‐Jesimo.
21 Wâneŋko hae ŋerawec i, erâ Amori ŋic jaŋere ŋicwofuŋ Sihoŋ, Hesiboŋ haeo juwec ere uucmaŋ furu jaha i mâreŋte mazi rofârewec hâcne. Eme Mosezi ŋicwofuŋ e â Midiaŋ micne ʒi jaŋe jopa jâpec ejarewec: Ewi, Rekem, Zuru, Huru â Reba. Jaŋe mâreŋ ira Sihoŋte mefâro jumbiŋ.
22 Israe ŋic jaŋe ŋic gâcne jopahuc, Beoro ŋokâ‐ticne, faŋfaŋdâŋ mumu Bileam, e mâmâc qambiŋ.
23 Eme Jordaŋ rârec rârec mâreŋ gâcne forawec izi Rubeŋ guru jaŋere ma ewec. Mâreŋ ira hae kâcɋene â piticne ŋerawec i Rubeŋte guru jaŋe garikiŋ‐jeŋic sâc ro rauc embiŋ.
24 Eme Mosezi Gadere guru jaŋe iŋuc jaha garikiŋ sâc mâreŋ ro rauc eniŋte jarewec ine ʒiŋuc:
25 Jazere hae â Gileade mâreŋko hae ŋerawec erâ Amoŋŋic jaŋere mâreŋ dâkâne i mâreŋte mazi fotâcnerâ raku Raba hae ʒoaŋ wewefunaopec Aroe hae ŋekac ira fisiwec.
26 Erâ Hesiboŋ haeonec raku Rama‐Mizipe â Betonim haeo fisiwec. Izi Mahanaim haeonec Debiri hae mâreŋko fisiwec.
27 Erâ wâc wâneŋko hae ʒiŋuc rorawec: Bete‐Haram, Bete‐Nimira, Sukati â Zafoŋ. Izi Hesiboŋ haere ŋicwofuŋ Sihoŋ ere uucmaŋ sasawa, Jordaŋ heririŋko mâreŋ forawec hâcne, i furu jaha rofârerâ feraku Kinerete riqic mecnao fisirâ bâŋorierâ ʒoaŋ wewefunaopec rawec.
28 I Gadere guru jaŋe hae kâcɋene â piticne garikiŋ‐jeŋic sâc ro rauc embiŋ hâcne.
29 Eme Mosezi Manasere guru dâkâne jaŋe mâreŋ ro rauc eniŋte jarewec wâc. Ehuc garikiŋ‐jeŋic sâc bâtâc bajarewec.
30 Eme jaŋere mazi ine Mahanaim haeonec fuŋkerâ raku Basaŋ ŋicwofuŋ Ogo ere uucmaŋ erâ ŋic moc ʒâŋene Jairi ere hae 60 ira ŋerawec i sasawa rofârewec.
31 Erâ Gileade mâreŋ dâkâne i fotâcnerâ raku Basaŋ ŋicwofuŋ Ogo ere uucmaŋko hae kâcɋene jajahec ŋepic, Asitaroto â Ederei ira fisiwec. I Manasere ŋokâ Makiri ere guru dâkâne jaŋe garikiŋ‐jeŋic sâc bâtâc bajarewec.
32 Mosezi Jordaŋ ŋifecnao Jeriko hae ʒoaŋ wewefunaopec Moabi wâneŋko juhuc mâreŋ i hâcne ro rauc eniŋte jarewec.
33 Â Lewire guru jaŋe ine Mosezi mâreŋ moc mi jarewec. Jaŋe Wofuŋ e jahac jazawec irec sâcko Israe ŋic jaŋere Wofuŋ Anutu ere mamanac sawa juniŋte mujarewec.