21
Lewire guru jaŋere hae
1 Lewi guru, garikiŋfâc‐jeŋic jaŋere micne jaŋe taha bapa Eleaʒa â Nuŋte ŋokâ Josua, erâ Israe ŋic guru garikiŋ‐jeŋic sâc jaŋere micnefâc jaŋerao fisimbiŋ.
2 Ehuc Kanaaŋ mâreŋko Silo haeo ʒiŋuc jazambiŋ: “Hae â rârec mâreŋ sopâc kecɋaŋnehec forakac i nâŋe rauckehuc lama bulimakaofâc‐nâŋec râec‐jopanaŋte Wofuŋzi Mose âzâcne mutâc ewec.”
3 Irec Israe ŋic jaŋe Wofuŋzi mutâcnewec irec sâcko Lewire guru jaŋe hae â hae rârec sopâc kecɋaŋ mâreŋ forawec i lama bulimakaofâc‐jeŋic râec‐jopaniŋte jaŋacne mâreŋkonec dâkâne jarembiŋ.
4 Eme ɋâsâi qapie Kohatire guru garikiŋ‐jeŋic sâc jaŋere ʒâŋe i bâbâni fuawec. Izi Lewire guru jaŋeraonec taha bapa Aroŋte ɋâricfâc jaŋe Juda, Simeoŋ â Benjamiŋ guru jaŋeraonec hae 13 jarembiŋ.
5 Iŋuc erâ Kohati guru nâfocne jaŋere mocwâc qapie ine Eferaim, Daŋ â Manase guru dâkâne garikiŋ‐jeŋic sâc jaŋeraonec hae 10 jarembiŋ.
6 Eme Isasa, Ase â Naftali guru garikiŋ‐jeŋic sâc, erâ Manase guru dâkâne Basaŋ mâreŋko jumbiŋ jaŋeraonec hae 13 i Geresoŋte guru jarembiŋ.
7 Eme Merarire guru garikiŋ sâc jaŋe Rubeŋ, Gade â Sebuloŋ guru jaŋeraonec hae 12 jarembiŋ.
8 Wofuŋzi Mose mutâcnecneme mufua‐jarewec irec sâcko Israe ŋic jaŋe ɋâsâi qahuc hae rârec lama bulimakaofâc‐jeŋic râec‐jopaniŋte Lewi guru hae â mâreŋ i jarembiŋ hâcne.
9 Juda â Simeoŋ guru jaŋeraonec hae ʒiŋuc
10 i Lewire guruonec Kohatire ɋâricfâc Aroŋte guru jarembiŋ. I ɋâsâi qapie jaŋere ʒâŋezi bâbâni fuawec hâcne.
11 Juda tiki mâreŋko Anaka mamac‐ticne Araba ere hae ŋewec, Heboroŋ hâcne, hae i â râreckerâ mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ.
12 Â hae irec hesarac mâreŋ â hae piticne gâcne ine Jefune ŋokâ‐ticne Kalebezi ro rauc eocte râcnembiŋ.
13 Eme taha bapa Aroŋte ɋâricfâc jaŋe ine hae ʒiŋuc i lama bulimakaofâc‐jeŋic râec‐jopaniŋte mâreŋhec jarembiŋ: Heboroŋ, i ʒika qaqa ŋic jaŋere ŋeŋezic hae hâcne, erâ Libina,
14 Jatiri, Esitemoa,
15 Holoŋ, Debiri,
16 Aiŋ, Juta â Bete‐Semesi. Hae 9 i Juda â Simeoŋ guru jaŋeraonec rombiŋ hâcne.
17 Erâ ʒuhuckerâ Benjamiŋ guru jaŋeraonec wâc lama bulimakaofâc‐jeŋic râec‐jopaniŋte mâreŋ‐jeŋichec hae jahec â jahec ʒiŋuc rombiŋ: Gibeoŋ, Geba,
18 Anatoti â Alimoŋ.
19 Hae 13 i lama bulimakaofâc‐jeŋic râec‐jopaniŋte mâreŋhec mâmâc Aroŋte ɋâricfâc taha bapa jumbiŋ jaŋe jarembiŋ.
20 Lewire guruonec Kohatire dâkâne garikiŋ‐jeŋic sâc Eferaimte guruonec hae gâcne jarembiŋ.
21 Eme hae ʒiŋuc i rârec‐joparâ lama bulimakaofâc‐jeŋic râec‐jopaniŋte mâreŋhec mâmâc jarembiŋ: Eferaim tiki mâreŋko ine Sikem, ŋeŋezic hae moc, erâ Geʒerâ,
22 Kibizaim â Bete‐Horoŋ. Hae kâcɋene jahec â jahec i hâcne.
23 Eme Daŋte guruonec iŋuc jaha hae â rârec‐jopahuc mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ. Jaŋere ʒâŋe ine ʒiŋuc: Eliteke, Gibetoŋ,
24 Ajaloŋ â Gate‐Rimoŋ. Hae kâcɋene jahec â jahec i hâcne.
25 Eme Manasere guru dâkâne jaŋeraonec ine hae jajahec â hae rârec‐jofahuc mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ ine ʒiŋuc: Tanaki â Gate‐Rimoŋ.
26 Kohatire guru dâkâne, garikiŋ‐jeŋic sâc lama bulimakaofâc‐jeŋic râec‐jopaniŋte mâreŋhec mâmâc ropie hae 10 ewec.
27 Eme Lewire garikiŋ guru jaŋeraonec moc Geresoŋte guru jaŋe Manasere guru dâkâne jaŋeraonec hae jajahec â rârec‐jofahuc mâreŋ forawec i lama bulimakaofâc‐jeŋic râec‐jopaniŋte jarembiŋ ine ʒiŋuc: Golaŋ, i ŋeŋezic hae moc, Basaŋ mâreŋko ŋewec, erâ Besi‐Tara.
28 Eme Isasare guru jaŋeraonec ine hae jahec â jahec erâ rârec‐jopahuc mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ ine ʒiŋuc: Kisioŋ, Daberata,
29 Jaramuti â Eŋ‐Ganim.
30 Eme Asere guru jaŋeraonec hae jahec â jahec erâ rârec‐jopahuc mâreŋ forawec i lama bulimakao râec‐jopaniŋte mâmâc rombiŋ ine ʒiŋuc: Misali, Abadoŋ,
31 Helikata â Rehobo.
32 Eme Naftalire guru jaŋeraonec hae jahec â moc â rârec‐jopahuc mâreŋ forawec i lama bulimakao râec‐jopaniŋte mâmâc rombiŋ ine ʒiŋuc: Kedesi, ŋeŋezic hae moc, i Galilaia mâreŋko ŋewec, erâ Hamo‐Doro â Karetaŋ.
33 Geresoŋte guru, garikiŋ‐jeŋic sâc jaŋe hae 13, â rârec‐jopahuc mâreŋ forawec i lama bulimakao râec‐jopaniŋte jarembiŋ hâcne.
34 Lewire guru nâfocne Merarire garikiŋ guru jaŋe Sebuloŋte guru jaŋeraonec hae jahec â jahec erâ rârec‐jopahuc mâreŋ sasawa i lama bulimakaofâc‐jeŋic râec‐jopaniŋte mâmâc jarembiŋ ine ʒiŋuc: Jokeneam, Kareta,
35 Dimina â Nahalali.
36 Â Rubeŋte guru jaŋeraonec ine hae jahec â jahec erâ rârec‐jopahuc mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ ine ʒiŋuc: Bezere, Jahazi,
37 Kedemoti â Mefata.
38 Â Gadere guru jaŋeraonec hae jahec â jahec erâ rârec‐jopahuc mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ ine ʒiŋuc: Ramoti, ŋeŋezic hae moc, i Gileade mâreŋko ŋewec erâ Mahanaim,
39 Hesiboŋ â Jazere.
40 Lewire guru dâkâne Merarire guru hâcne jaŋe garikiŋ‐jeŋic sâc hae 12 jarepie tarawec.
41 Israe ŋic guru gâcnezi mâreŋ ro rauc embiŋ jaŋere ŋondeŋko Lewire guru jaŋe lama bulimakaofâc‐jeŋic râec‐jopaniŋte hae â rârec‐jopahuc mâreŋ forawec i rokupie 48 ewec.
42 Hae jarembiŋ i râreckehuc mâreŋ forawec i mâmâc jare‐fârembiŋ hâcne.
Israe ŋic jaŋe mâreŋ raucke‐fârembiŋ
43 Wofuŋ e Israe ŋic mâreŋ jareocte ŋosafâc‐jeŋic mujomire‐jarewec irec sâcko jare‐fâreme ro rauc ehuc mâckerâ jumbiŋ.
44 Eme Wofuŋzi mujomire‐jarewec irec sâcko wama fuarâ fowec. I Wofuŋ e jahac râsifâc‐jeŋic sasawa mejeŋicko râec‐jopa‐fârewecte moczi moc mi sanaŋkewec.
45 Wofuŋzi Israe ŋic mumupaŋ dâŋ biaŋne jaza rawec i fâri mâc mi ehuc deŋke‐fârewec hâcne.