20
Ŋeŋezic haere dâŋ
(Ʒar 35:6–34; Sâc 4:41–43; 19:1–13)
1 Eme Wofuŋzi Josua ʒiŋuc âzâcnewec:
2 “Go Israe ŋic jazac: ‘Mose ecnepe ŋeŋezic hae‐ŋeŋic bâfua raniŋte ŋazawec irec sâcko bâwosâec‐jopaniŋ.
3 Eme ŋic moc e âgo‐ticne moc qâhâmoocte mi manasuhuc juku sifu qâhâmoocmuo ine gâcnezi erao ʒikare okac bazunʒipiŋte wiserâ hae ira soŋkezejec. Hae i jaŋe hâcne ŋoŋere ŋeŋezic hae erâ ŋenʒepieŋ.
4 Ehame ŋic i me i moczi wiserâ ŋeŋezic hae ira me ira razejec. Rarâ haesac motâcko fisirâ soŋaŋ jaŋerao fuŋne‐ticne muzejec. Eme jaŋe jowarâ haemaŋko raʒirâ fic moc râcnepie jaŋehec juzejec.
5 Ehame okac babazu ŋic moczi soc jaha hoŋkeocte bâjâperâ fisime hae irec rune jaŋe ŋic âgo‐ticne qâhâmowec e okac babazu ŋic ere meo mi râenʒepieŋ.
6 E hae ira juhame kikefuŋ jaŋe tutumaŋko fuŋne‐ticne bataniŋkepie me dameŋ ira taha bapa micne juocmu e hâmome ine hae‐ticne beherâ wisewec ira mocwâc risierâ wiacfâc‐ticne jaŋehec juzejec.’ ”
7 Irec Israe ŋic jaŋe hae ʒiŋuc bâwosâec‐jopambiŋ: Moc Kedesi, hae i Galilaia ŋic jaŋere ŋondeŋko Naftali tiki mâreŋko ŋewec. Moc ine Sikem, i Eferaim tiki mâreŋko ŋewec. Â moc ine Kiriati‐Araba, Heboroŋ hâcne, i Juda tiki mâreŋko ŋewec.
8 Eme Jordaŋ ŋifecnao, Jeriko ʒoaŋ wewefunao, mâreŋ burocnere ʒâʒâŋiŋko Rubeŋte guru jaŋere mâreŋko hâcne, Bezere hae bâwosâembiŋ. Â Gadere guru jaŋere mâreŋ Gileade ira ine Ramoti haezi ŋewec. Erâ Manasere guru jaŋere mâreŋ Basaŋ ira ine Golaŋ haezi ŋewec.
9 Hae keci i Israe ŋic jaŋacne â ŋic jabanezi ŋondeŋ‐jeŋicko ŋec juc embiŋ jaŋere wâc mâmâc bâwosâec‐jopambiŋ. Eme moc e ŋic moc qâhâmoocte mi manasuhuc juku sifu moc qawecko ine hae ira wiserâ rawec. Eme ŋic moczi socte okacne soc jaha hoŋkeocte bâjâpewecko ine sifu mi qâhâmowec. Â ŋic hae iŋucnao soŋkewec ere fuŋne ine qanaŋ kikefuŋ jaŋere maio bataniŋke jumbieŋ.