6
Jeriko haere sac ropiewec
1 Israe ŋic jaŋere erâ Jeriko haere motâc herâ basanaŋkembiŋ. Eha mozi moc raʒic wefuc ezac.
2 Wofuŋzi ine Josua âzâcnerâ muwec: “Manakic, no Jeriko hae â ŋicwofuŋ‐ticne, erâ momori ŋic tâpirihec jaŋe gore meo râec‐jopa‐fârepo.
3 Go â momori sasawa ŋoŋe hae sâko i asasai âtehuc arec mocjaha orâŋkenʒepieŋ. Iŋuczi iŋuc ehuc juhapie ʒoaŋ gie bapa 6 tarazejec.
4 Eha taha bapa 7 jaŋe lama ŋicne jaŋere ʒuŋezi qeŋ 7 bakicne i barâ ʒâʒâfic katapa bâniecnenʒepieŋ. Â ʒoaŋ gie bapa 7 ira ine taha bapa jaŋe qeŋ qahapie ŋoŋe hae sâko i asasai âtehuc orâŋkekuhapie arec 7 ezejec.
5 Eme jaŋe lama ŋicne jaŋere ʒuŋezi qeŋ bakicne i fâre ʒorahuc qapie manahuc ʒeŋgoma aŋara henʒepieŋ. Ehame hae sâkore sac i rândiŋkerâ qanʒaŋneocmu. Iŋuc fuame quruŋ herâ ʒeŋgoma fenʒepieŋ.”
6 Eme Nuŋte ŋokâ Josua e taha bapa hefârec‐joparâ ʒiŋuc jazawec: “Ŋoŋe ʒâʒâfic katapa reŋkeniŋ. Erâ taha bapa 7 jaŋe ine lama ŋicne jaŋere ʒuŋezi qeŋ 7 bakicne i rorâ Wofuŋte katapa bâniecnenʒepieŋ.”
7 Erâ Israe ŋic ʒiŋuc jazawec: “Momori ŋic jaŋe Wofuŋte katapa bâniecnehapie asasai âtehuc hae sâko orâŋkenʒepieŋ.”
8 Eme jaŋe Josuazi mutâcne‐jarewec sâc embiŋ. Ehuc taha bapa 7 jaŋe lama ŋicne jaŋere ʒuŋezi qeŋ 7 bakicne i Wofuŋte maio bajumbiŋ jaŋe bâniehuc qeŋ qambiŋ. Ehame Wofuŋte ʒâʒâfic katapazi bâjâpec‐jopawec.
9 Eme taha bapa jaŋe qeŋ qahapie momori ŋic jaŋe bânie‐jarembiŋ. Qeŋ qahuc rahapie momori ŋic gâcne jaŋe katapa bâjâpembiŋ.
10 Ehame Josuazi ŋic ŋokac ʒiŋuc jazawec: “Ŋoŋe aŋara moc mi henʒepieŋ me dâŋfânâŋ‐ŋeŋic moc mi fuazejec. Erâ dâŋ qisic qasac moc mi ejâmbâŋkehapie noni aŋara heniŋ mupe dameŋ ira henʒepieŋ.”
11 Eme Wofuŋte katapa reŋkembiŋ jaŋe ejareme hae sâko i arec mocjaha orâŋkembiŋ. Orâŋkerâ teuŋ‐jeŋicko risierâ fombiŋ.
12 Eme Josua e uupictea fahareme taha bapa jaŋe iŋuc jaha faharerâ Wofuŋte katapa reŋkembiŋ.
13 Ehame taha bapa 7 jaŋe lama ŋicne jaŋere ʒuŋezi qeŋ 7 bakicne i barâ qahuc Wofuŋte katapa bâniecnembiŋ. Eme momori ŋic gâcne jaŋe bânie‐jarembiŋ â gâcne jaŋe ine Wofuŋte katapa bâjâpembiŋ.
14 Eme hae fureme mocwâc asasai âtehuc hae i orâŋkerâ teuŋ‐jeŋicko risiembiŋ. Iŋuczi iŋuc ehuc juhapie ʒoaŋ gie bapa 6 tarawec.
15 Ehame ʒoaŋ gie bapa 7 ira hae fure pârâckeha faharerâ embiŋ irec sâc jaha asasai âtehuc hae sâko orâŋkekupie arec 7 ewec. I ʒoaŋ ira sawa orâŋkehapie arecne 7 ewec hâcne.
16 Eme arec 7‐ticnao taha bapa jaŋe qeŋ qambiŋ i tarame Josuazi ŋic ŋokac ʒiŋuc jazawec: “Aŋara heniŋ, Wofuŋ e hae ʒi nârekac hâcne.
17 Eme hae irec maŋnao wiac fokac bakac sasawa i Wofuŋte micte furu mukicnere sisipiricte biŋe efârezejec. Mâc, sasec ŋokac Rahaba â ficticnao juŋgopieŋ jaŋe sawa ine junʒepieŋ. E kiŋaŋŋic jahec‐nâŋec soŋjofawec irec.
18 Â ŋoŋe ine wiac sisipiricte biŋe ekicne i bâec bacnenʒepieŋ, i moc ro bâuac epie ine Israere teuŋ i sisipiricte biŋe eha ŋoŋe ʒârâ ʒâpâ faio fenʒipiŋte.
19 Eme siliwa â gol sasawa, erâ aeŋ â aeŋ bâbâroŋzi kuʒi bakicne i ine Wofuŋte biŋe bâtiripie ere kânoŋko huzejec.”
20 Eme qeŋ qahapie gurufâc‐jeŋic jaŋe aŋara hembiŋ. Qeŋfânâŋ mana manahuc izia oŋkaraoŋ kizuhame aŋara sâko hepie haesaczi rândiŋkerâ qanʒaŋnewec. Qanʒaŋneme ŋic jaŋe quruŋ herâ fe râsi jopahuc hae rombiŋ.
21 Ehuc ŋic ŋokac naru motec, lama bulimakao, â doŋgi, erâ wiacte wiac sasawa i ʒikazi omaec‐jopambiŋ.
22 Eme ŋic mâreŋ hone tâcnepic jahe Josuazi ʒiŋuc jasawec: “Sasec ŋokac mupaŋkecnepic irec sâcko ficticnao ferâ ŋokac e jahacne â wiacfâc‐ticne jowac‐jopa warenic.”
23 Eme ruc bapa ŋic jahe ficko ferâ Rahaba e jahacne, neŋgoc mamac jahecne â hahac ɋafâcne, erâ soctofafâc‐ticne sasawa jowac‐jopa waharâ Israe teuŋ râpenao râec‐jopambiŋ.
24 Ehuc hae mecne â irec maŋnao wiac sasawa fowec i mecne ʒoczi turuŋkepie ʒâseŋkewec. Siliwa â gol erâ aeŋ â aeŋ bâbâroŋzi kuʒi bakicne i sawa ine ropie Wofuŋte kânoŋko huwec.
25 Eme sasec ŋokac Rahaba e jahacne â wiacfâc‐ticne sasawa jaŋe Josuazi ŋic jajahec Jeriko hae hone tâcnenicte sorec‐jofame rapire soŋjofawecte akic‐jopambiŋ. Eme jaŋe Israe guruo jumbiŋzi juŋgopieŋ.
26 Dameŋ ira Josuazi ŋic ŋokac ejareme Wofuŋte maio ʒiŋuc mupaŋkembiŋ: “Ŋic moczi faharerâ Jeriko hae ʒi mocwâc heɋârerâ baocmuo ine Wofuŋtaonec okacne ʒiŋuczi ere faio fezejec:
Wâtuŋ ŋokacne râeme hume
mârâc ŋokâ‐ticnezi hâmozejec.
 batarahuc motâc âkendâŋneme
ʒâhec ŋokâ‐ticnezi hâmozejec!”
27 Eme Wofuŋ e Josuahec juhame ʒâŋe biŋe‐ticnezi mâreŋ sasawa sâcke‐fârerâ fowec.