7
Akaŋzi ro soŋsoŋ ewec
1 Israe ŋic jaŋe wiac Wofuŋte biŋe qakicne ira bahac bâfuambiŋ. I Juda guruonec Ʒabidi ŋosa‐ticne Akaŋ, Karamire ŋokâ, apa‐ticne Ʒera, e wiac Wofuŋte biŋe qakicne i gâcne ro soŋsoŋ ewec. Ehame Wofuŋ e Israe ŋic jaŋere boc mana gâpârewec.
2 Bete hae ʒoaŋ wewefunao Betaweŋ heririŋko Ai hae ŋewec ira feniŋte Josuazi Jeriko teuŋ‐jeŋickonec ŋic ʒiŋuc jazahuc sorec‐jopawec: “Ferâ mâreŋ hone tâcneniŋ.” Mume ŋic jaŋe ferâ Ai hae hone tâcnembiŋ.
3 Ehuc Josuarao risierâ ʒiŋuc âzâcnembiŋ: “Ŋic 2 tauseŋ me 3 tauseŋ jaŋe sawa ferâ Ai hae imackenʒepieŋ, sasawazi mâcne. Go ŋic sasawa maŋgâŋ mi ejaretec fenʒepieŋ. Jaŋe afecne sawa mac juŋgopieŋ.”
4 Eme ŋic jaŋeraonec 3 tauseŋ heririŋ jaŋe fembiŋ. Fepie Aiŋic jaŋe jopa jâpec ejarepie wisembiŋ.
5 Ehuc Aiŋic jaŋe haere sacmotâckonec fuŋkerâ jopa jâpec ejare raku Sebarim hae heririŋko fisirâ heâŋko ŋic 36 heririŋ sâqezi âke hâmoc‐jopambiŋ. Iŋuc fuame Israe ŋic jaŋere maŋ ŋeŋgoroŋke‐fârewec.
6 Ehame Josua â Israe soŋaŋ jaŋe busâqoc manahuc ŋaqi qoruc‐jeŋic bâsuckerâ qizec‐jeŋicko ʒafe ruahuc Wofuŋte katapa maŋfuŋko ʒâŋe mai‐jeŋic mâreŋko hetutuckerâ fohapie hae ŋafewec.
7 Eme Josuazi muwec: “Jei, Wofuŋ Anutu, go wemocte ŋic ŋokac ʒi Amori ŋic jaŋere meo râec‐nâpotec qâmiziec‐nâponiŋte Jordaŋ ocniŋucnaonec jowac‐nâpo wefumeŋ? Jordaŋ ocniŋucnao jupene sâckezac.
8 O Wofuŋ, Israe ŋic jaŋe râsifâc‐jeŋic jaŋere erâ wisehapie no wemo mupemu.
9 Kanaaŋ ŋic â mâreŋ ʒirec ŋicguru sasawa jaŋe biŋe manarâ orâŋ‐nâpohuc ʒâŋe biŋe‐nâŋec bârârâŋneniŋmu. Eme go weniŋuc etec ʒâŋe rara biaŋge i mocwâc fuaocmu?”
10 Eme Wofuŋzi Josua ʒiŋuc âzâcnewec: “Faharec, go wemocte ʒâŋe maige mâreŋko hetutuckerâ fokomec?
11 Israe ŋic jaŋe bahac bâfuambiŋ, ehuc jaŋehec ʒâʒâfic epo i qâsuarâ eeatuc ehuc wiac fiuc roŋgopieŋ â wiac bâtirikicne i jaŋacne wiachec bâturehuc soŋkeŋgopieŋ.
12 Irec Israe ŋic jaŋe sisirowere biŋe eŋgopieŋte râsifâc‐jeŋic jaŋere maio moc mi sanaŋkehuc mâc wiseniŋmu. Ŋoŋe wiac bâtirikicne ŋondeŋ‐ŋeŋicko fokac i mi bârâriehuc imackeniŋmuo no ŋoŋehec mocwâc mi jupemu.
13 Ajoc, ŋic ŋokac jaŋe sowa juhuc ʒawieniŋte ʒiŋuc jazac: ‘Sowa juhuc tomâckore maŋ sahac‐ŋeŋic ba emasaŋ eniŋ. Israere Wofuŋ Anutu e ʒiŋuc mukac: O Israe ŋic, ŋondeŋ‐ŋeŋicko wiac bâtirikicne fokac i mi bârâriehuc râsifâc‐ŋeŋic jaŋere maio sâcne mi sanaŋkeniŋmu!
14 Irec tomâcko furicte guru‐ŋeŋic sâc hefârec‐ŋopazo hâcne. Eme Wofuŋzi guru moc rowosâeme honehuc garikiŋ sâc hefârec‐jopazo. Eme Wofuŋzi garikiŋ moc rowosâeme honehuc fic sâc hefârec‐jopazo. Ehame Wofuŋzi fic moc rowosâeme honehuc ine ŋic buc buc hefârec‐jopazo.
15 Eme wiac bâtirikicne moc rowec ŋic e jahacne â wiac sasawa focnekac i ʒocte biŋe efârezejec. E Wofuŋte ʒâʒâfic qâsuahuc Israe guruo wiac miminehec bâfuawec irec.’ ”
16 Eme Josua e furic uupictea faharerâ Israe guru sâc hefârec‐jopahuc guru moc âke fuaocte giene bame Judare guru âke fuawec.
17 Ehame Judare guru i garikiŋ sâc hefârec‐jopahuc giene bame Ʒerare biri âke fuawec. Eme Ʒerare biri ŋic buc buc hefârec‐jopahuc giene bame Ʒabidi âke fuawec.
18 Ehame ere birionec ŋic buc buc jaha hefârec‐jopahuc giene bame Judare guruonec Karamire ŋokâ Akaŋ hâcne âke fuawec, ŋosa‐ticne Ʒabidi, apa‐ticne ine Ʒera.
19 Eme Josuazi Akaŋ ʒiŋuc âzâcnewec: “Motec‐mae, Israere Wofuŋ Anutu e manacnetec fehame muteŋ bâteŋ ecnehuc wiac emeŋ i mi hesoŋkehuc naza‐fârec.”
20 Eme Akaŋzi Josua dâŋ ʒiŋuc bâtikiecnewec: “Jâmbomac, no wiac ʒiŋuc hâcne ehuc Israere Wofuŋ Anutu e sindaŋ ecnepo:
21 Wiac forawec Babe mâreŋkonec ŋaqi faine moc hone aŋac‐ticnehec â siliwa ŋemâc‐ticne 200, erâ wâc gol dâkâne moc ŋemâc‐ticne 50 i hone sasec ehuc ropo. Ehuc boze‐naneo nombâŋ rorâ siliwa fâhâŋnao râerâ hemackepo fokac.”
22 Eme Josuazi ŋic gâcne sorec‐jopame Akaŋte bozeo gasacke rarâ wiac gâcne nombâŋko duckekicne i ro huku siliwa fâhâŋnao fohame bâfuambiŋ.
23 Eme jaŋe bozeonec rorâ Josua â Israe ŋic sasawa jaŋerao bafisirâ Wofuŋte maio guruckembiŋ.
24 Eme Josua â Israe ŋic jaŋe Ʒera apa‐ticne Akaŋ, erâ siliwa â ŋaqi faine â gol dâkâne i, erâ wâc otâ ŋokâfâcne â lama bulimakao â doŋgi â qoruc boze‐ticne â wiac sasawa i rorâ Akoro wâneŋko bacjopa rambiŋ.
25 Ehuc Josuazi muwec: “Go wemocte sindaŋ ehuc sipiric‐nâpomeŋ? Irec miŋecgac Wofuŋzi go gahacnao bârisiehuc sipiricguzejec wâc.” Mume Israe ŋic jaŋe Akaŋ qânâzi hehâmorâ wiacfâcne iŋuc jaha hehâmoc‐jopahuc ʒocko behec‐jopapie ʒâseŋ‐jopawec.
26 Iŋuc erâ qânâ gurucke fembiŋ i dameŋ ʒi ŋekac jaha. Iŋuc epie Wofuŋ aaric‐ticnere ʒoc i mâteŋkewec. Eme mâreŋ ŋondeŋ irec ʒâŋe Sindaŋ Wâneŋ mumbiŋ â dameŋ ʒiŋuczia mueŋgopieŋ jaha.