9
Gibeoŋ ŋic jaŋere eeatuc
1 Ŋicwofuŋ sasawa Jordaŋ ŋifecnao tiki mâreŋko â hâwec sâko heririŋ wâneŋ sasawa Lebanoŋ tikiopec rakac ira Hitiŋic, Amori ŋic â Kanaaŋ ŋic, erâ Periʒi ŋic, Hiwiŋic â Jebusi ŋic jurambiŋ jaŋe biŋe i mana‐fârembiŋ.
2 Ehuc roroc erâ Josua â Israe ŋic jopaniŋte maŋ mocjaha embiŋ.
3 Erâ Gibeoŋ hae rune jaŋe Josuazi Jeriko â Ai hae jahe wiac ejactewec irec biŋe manambiŋ.
4 Manarâ eeatuc‐jeŋic birickerâ hata nâsiŋ wiac‐jeŋic bâmockehuc târu â waiŋ ʒopo sucke tâc ekicne i ɋâtâ bâpiaŋ erâ doŋgifâc‐jeŋic jaŋere faio hembiŋ.
5 Ehuc kikehuhu â ŋaqi qoruc‐jeŋic tâcne ʒaŋ ekicne i hepie huwec. Eme hatare nânâ wiac i kereŋkerâ nusuŋkekicne iŋucne bâmockembiŋ.
6 Erâ Giligali teuŋko Josua â Israe ŋic jazarâ mumbiŋ: “Nâŋe ŋoŋehec ʒâʒâfic enaŋte mâreŋ wiwickonec wareŋgopeneŋ.”
7 Eme Israe ŋic jaŋe Hiwiŋic jazarâ mumbiŋ: “Hece, ŋoŋe ŋondeŋ‐nâŋecko juŋgopieŋ mecne, irec wemocko ŋoŋehec ʒâʒâfic moc enaŋmu.”
8 Eme jaŋe Josua ʒiŋuc muhuc âzâcnembiŋ: “Nâŋe gore kiŋaŋŋicfâc.” Ehame Josuazi wio‐jarerâ muwec: “Ŋoŋe wenirec wareŋgopieŋ, ʒâŋe‐ŋeŋic mo?”
9 Eme jaŋe âzâcnerâ mumbiŋ: “Wofuŋge Anutu ʒâŋe biŋe‐ticnere erâ kiŋaŋŋicfâcge nâŋe mâreŋ wiwickonec jâmbâŋ wareŋgopeneŋ. Eki Aigita mâreŋko mâsi bawec irec biŋe manambeŋ wâc.
10 Erâ wâc Amori ŋic jaŋere ŋicwofuŋ jajahec Jordaŋ ocniŋucnao jupic, Hesiboŋ haere ŋicwofuŋ Sihoŋ â Basaŋ mâreŋte ŋicwofuŋ Ogo, Asitaroto haeo juwec, jaherao wiac bâfuawec i manambeŋ jaha.
11 Eme soŋaŋfâc‐nâŋec â ŋic gâcne sasawa jaŋe ʒiŋuc muhuc nâzâ sorec embiŋ: ‘Hatare wiac bâmockerâ raku bâfuac‐joparâ ʒiŋuc jazanʒepieŋ: Nâŋe ŋoŋere kiŋaŋŋicfâc. Irec qâturerâ ʒâʒâfic‐nâŋec moc enʒepeneŋ.’
12 Ŋoŋerao warenaŋte hata fuŋkembeŋ dameŋ ira nânâ ʒi ficnâŋeckonec hâroŋne foha rorâ bawarembeŋ. Ehame ʒi ine kereŋkerâ nusuŋkekicne fome honeŋgopieŋ.
13 Â waiŋ ʒopo‐nâŋec ʒi wâc ɋâricnea foha qapene huwec. Eme ʒi ine tâcne ʒaŋ ekac. Erâ ŋaqi qoruc â kikehuhu‐nâŋec i hata ʒoricne ʒora warehuc juhapene sucke tâc efârewec.”
14 Eme Israe ŋic jaŋe qanaŋ Wofuŋtao fuŋne mananiŋte mu wioc moc mi ehuc ŋic jaŋeraonec hatare nâsiŋ moc rombiŋ.
15 Ehuc Josuazi jaŋehec wama qaqac erâ juniŋte mana‐jareme ʒâʒâfic embiŋ. Ehame Israe kikefuŋte soŋaŋ jaŋe mujomire‐jarembiŋ wâc.
16 Ʒâʒâfic erâ jufehapie ʒoaŋ jahec â moc tarame Israe ŋic jaŋe ʒiŋuc manambiŋ: Jaŋe hae mâreŋ ʒirecteaŋ.
17 Eme Israe ŋic jaŋe raku hae‐jeŋic ŋerawec ira ʒoaŋ jahec â moc eha fisimbiŋ. Hae‐jeŋic ʒiŋuc ŋerawec: Gibeoŋ, Kefira, Beroti â Kiriati‐Jearim.
18 Erâ Israe ŋic soŋaŋfâc‐jeŋic jaŋe Israe Wofuŋ Anutu‐ticnere maio mujomire‐jarembiŋte mi jopambiŋ. Ehame kikefuŋ jaŋe soŋaŋfâc‐jeŋic jaŋere mana gâpârehuc masu mumuniŋ bambiŋ.
19 Eme soŋaŋfâc‐jeŋic jaŋe kikefuŋ ʒiŋuc jazambiŋ: “Israe ŋic nâŋâcne Wofuŋ Anutu ere maio mujomirembeŋte moc mi jopanʒepeneŋ.
20 Juniŋte mujomire‐jarembeŋ irec okacne fai‐nâŋecko fezacte kecʒiŋuc sawa enʒepeneŋ:
21 Nâŋâc mana‐jarepene junʒepieŋ.” Eme soŋaŋ jaŋe mumbiŋ irec sâcko kikefuŋ jaŋere ʒoc roro â opâ fifia ŋic jumbiŋ.
22 Eme Josuazi hetumaŋ‐joparâ kecʒiŋuc wio‐jarewec: “Ŋoŋe ŋondeŋ‐nâŋecko juipiehuc wemocte ʒiŋuc muhuc eatuc‐nâpombiŋ, ‘Nâŋe mâreŋ wiwickonec jâmbâŋ’?
23 Irec ŋoŋere faio sâwec fohuc juzejec. Ŋoŋe kiŋaŋ giere hati juhuc dameŋ sâc Anutu‐nanere ficte ʒoc roro â nombâŋkonec opâ fâfâre gie bahuc junʒepieŋ.”
24 Eme jaŋe dâŋ bâtikiecnehuc mumbiŋ: “Kiŋaŋŋicfâcge nâŋe ʒiŋuc manambeŋ: Wofuŋ Anutu‐ŋeŋiczi mâreŋ sasawa ʒi ŋareocte kiŋaŋŋic‐ticne Mose âzâcnewec. Ehuc mâreŋ ʒirec ŋic bâsirowec‐nâpo‐fâreocte muwec. Irec ŋoŋere hâwic‐nâpome juju‐nâŋecte mana mezac erâ mâsi keci embeŋ.
25 Eme ʒi gore meo juŋgopeneŋte wiac manakic sâc enârezemec.”
26 Eme Josua e Israe ŋic jaŋere meonec batarac‐jopawecte mi jopambiŋ.
27 Eme Josuazi dameŋ ira hâcne mujareme fuŋkerâ Israe kikefuŋte biŋe â Wofuŋzi alata‐ticne wena fuaocte muwec, irec biŋe wâc ʒoc wiac rohuc nombâŋkonec opâ fifia gie bambiŋzi dameŋ ʒiŋuczia bahuc juŋgopieŋ jaha.