10
Israe ŋic jaŋe Kanaaŋ mâreŋ juwicne rombiŋ
1 Josuazi Jeriko hae â ŋicwofuŋ‐ticne bâsirowec‐jofawec irec sâc jaha Ai hae â ŋicwofuŋ‐ticne ejactewec. Â Gibeoŋ haeonec jaŋe ine Israe jaŋehec wama qaqac erâ juŋgopieŋ, Jerusalemte ŋicwofuŋ Adonizedec e biŋe iŋuc manarâ mâretec hâwickewec.
2 Gibeoŋ hae i Ai hae sirickerâ kâcɋene sâko ŋewec, ŋicwofuŋ hae gâcne irec sâc jaha, â hae irec ŋic jaŋe tâpiri wânʒâŋhec jufârembiŋ.
3 Irec Jerusalemte ŋicwofuŋ Adonizedec e Heboroŋte ŋicwofuŋ Hoham â Jaramutire ŋicwofuŋ Piram â Lakisire ŋicwofuŋ Jafia â Egeloŋte ŋicwofuŋ Debiri jaŋerao dâŋ ʒiŋuc râeme rawec:
4 “Gibeoŋ haeonec jaŋe Josua â ŋicfâc‐ticne jaŋehec wama qaqac embiŋte ŋoŋe wefurâ baficnupie imac‐jopanʒepeneŋ.”
5 Eme Amori ŋic jaŋere ŋicwofuŋ 5: Jerusalemte ŋicwofuŋ, Heboroŋte ŋicwofuŋ, Jaramutire ŋicwofuŋ, Lakisire ŋicwofuŋ â Egeloŋte ŋicwofuŋ jaŋe momorifâc‐jeŋic jaŋehec ferâ Gibeoŋ hae ŋifecnao teuŋ âterâ juhuc ʒika gie bambiŋ.
6 Eme Gibeoŋ ŋic jaŋe Giligali teuŋko Josuarao dâŋ ʒiŋuc râepie rawec: “Kiŋaŋŋicfâcge nâŋe mi mac behec‐nâpohuc bâruŋ jaha wefurâ ŋezic‐nâpohuc bafic‐nâponiŋ. Amori ŋic jaŋere ŋicwofuŋ tiki mâreŋko jueŋgopieŋ, jaŋe sasawa roroc erâ râsi fisi‐nâreŋgopieŋ.”
7 Eme Josua â momori ŋic tâpiri wânʒâŋhec sasawa jaŋe Giligali teuŋkonec ferambiŋ.
8 Ehame Wofuŋzi Josua âzâcnerâ muwec: “Mi hâwicguoc. No gore meo râec‐jopa‐fârepore moczi moc mi sanaŋkeocmu.”
9 Eme Josua e Giligali teuŋkonec ŋafe hata juku ututuŋ jaha jaŋerao fisiwec.
10 Fisi‐jareme Wofuŋzi râsi mutuc bacjopame bipic tatara ejareha Israe ŋic jaŋe Gibeoŋ hae mendâŋko mâretec imac‐jopambiŋ. Ehuc jopa jâpec ejare raku Betehoroŋ heâŋne i fotâcnerâ raku Aʒeka â Makeda haeo fisirâ iŋuc jaha jopambiŋ wâc.
11 Jaŋe Israe ŋic wise‐jarehuc Betehoroŋ heâŋ‐ticne fotâcnerâ Aʒeka haeopec huhapie Wofuŋzi sambâŋkonec qânâ kâcɋene wicke‐jareme hata ŋondeŋko hâmo sipiric embiŋ. Israe ŋic jaŋe ʒikazi jopambiŋ irec sâc jâuruhuc aisi hândâŋzi hecjopame hâmombiŋ.
12 Wofuŋzi Amori guru Israe ŋic jaŋere meo râec‐jopawec ʒoaŋ ira Josuazi Israe ŋic ʒâŋe fai‐jeŋicko Wofuŋ numucnehuc ʒiŋuc muwec:
“Ʒoaŋ go Gibeoŋko sanaŋkerâ ŋec
â mosa go wâc Ajaloŋ wâneŋ‐ticnao sanaŋkerâ ŋec.”
13 Mume ʒoaŋ e sanaŋkerâ ŋewec
â mosa e iŋuc jaha ewec.
Iŋuc fuame Israe ŋic jaŋe râsifâc‐jeŋic jaŋehec
ʒika gie batarambiŋ.
Binaŋ ʒi Jasa ere papia qizecko qâreŋkekicne fokac. Ʒoaŋzi ʒâʒâŋiŋ jâmbâŋ niniŋkerâ ŋehuc juha ʒoaŋ gie bapa moc tarawec.
14 Mârâc jaha Wofuŋzi ŋic mocte dâŋ manahuc ʒoaŋ gie bapa iŋucne moc mi bâfuawec â irec faicnao wâc aricne. Wofuŋzi Israe ŋic jaŋere erâ ʒika gie bawecte iŋuc fuawec.
15 Eme Josua â Israe ŋic sasawa jaŋe Giligali teuŋko risiembiŋ.
16 Ehame ŋicwofuŋ 5 jaŋe wiserâ ra Makeda hae heririŋ qânâ hawecko soŋkembiŋ.
17 Eme ŋic gâcnezi Josua ʒiŋuc âzâcnembiŋ: “Ŋicwofuŋ 5 jaŋe Makeda qânâ hawecko soŋkerâ juhapie bâfuac‐jopakicne.”
18 Eme Josuazi muwec: “Qânâ kâcɋene qârândiŋkepie hawec motâcne ŋebâzickeha soŋaŋ râec‐jopanʒepieŋ.
19 Â ŋoŋe ŋaŋacne ira mi juhuc râsifâc‐ŋeŋic jâpec‐jopahuc râpec‐jeŋicko kikeo kikeo ejarenʒepieŋ. Wofuŋ Anutu‐ŋeŋiczi meŋeŋicko râec‐jopawecte behec‐jopapie haemaŋ‐jeŋicko mi raʒi‐jâmbâŋkenʒepieŋ.”
20 Eme Josua â Israe ŋic jaŋe ima samaki bacjopakupie moc moc sawazi wiserâ hae sanaŋ‐jeŋic sâc raʒimbiŋ.
21 Ehame Israe ŋic jaŋe furu jaha Josuarao Makeda teuŋko risiembiŋ. Eme dameŋ ira râsifâc‐jeŋic jaŋe pepec i me i moc ejareniŋte hâbi‐jeŋic basambiŋ.
22 Eme Josuazi muwec: “Hawec motâcko qânâ bârâriehuc ŋicwofuŋ 5 bacjopa wareniŋ.”
23 Eme jaŋe iŋuc erâ ŋicwofuŋ 5 Josuarao bacjopa fisimbiŋ, ine kecʒiŋuc: Jerusalemte ŋicwofuŋ, Heboroŋte ŋicwofuŋ, Jaramutire ŋicwofuŋ, Lakisire ŋicwofuŋ â Egeloŋte ŋicwofuŋ.
24 Ŋicwofuŋ i bacjopa fisipie Josuazi Israe ŋic hetumaŋ‐jopa‐fârerâ momori micnefâc‐jeŋic ʒiŋuc jazawec: “Ʒira warerâ kike‐ŋeŋiczi ŋicwofuŋ ʒi jaŋere upeo âteniŋ.” Mume jaŋe bembeŋko rarâ kike‐jeŋiczi upe‐jeŋicko âtembiŋ.
25 Eme Josuazi jazawec: “Manabâc erâ mi hâwic‐ŋopaoc. Sanaŋkerâ hâbi‐ŋeŋic roniŋ. Wofuŋzi râsifâc‐ŋeŋic jaŋerao mâsi iŋuc bafâreocmu hâcne.”
26 Eme Josuazi qâhâmoc‐joparâ jâc 5 ira ɋetic‐jopame domahapie hae owâewec.
27 Eme ʒoaŋ otewerâ huzo ehame Josuazi ejareme qâŋɋâŋ jâckonec batarac‐joparâ qânâ hawec soŋkerâ jumbiŋ ijaha sâroc‐jopapie hupie qânâ kâcɋene bocjaha qârândiŋkepie motâcne ŋebâzickewec i dameŋ ʒiŋuczia ŋekac jaha.
28 Eme ʒoaŋ ira Josuazi Makeda hae rorâ ŋicwofuŋ â kikefuŋfâcne ʒikazi imac‐jopawec. Erâ wiac jujune moc mi akic‐jopahuc sasawa bâsirowec‐jopawec. Â Makedare ŋicwofuŋ e ine Jeriko haere ŋicwofuŋ ecnewec irec sâc jaha ecnewec.
29 Eme Josua e Makedanec fahareme Israe ŋic jaŋe bâjâpepie Libina haeo ʒika qaniŋte rambiŋ.
30 Eme Wofuŋzi hae i iŋuc jaha Israe ŋic jaŋere meo râeme Josuazi hae mecne ŋicwofuŋ mecne erâ wiac jujune moc mi akic‐jopahuc ʒikazi imac‐jopa‐fârewec. Ehuc ŋicwofuŋ‐jeŋic e Jeriko haere ŋicwofuŋ ecnewec irec sâc jaha ecnewec.
31 Eme Josua e Libinanec fahareme Israe ŋic jaŋe bâjâpepie Lakisi haeo rarâ teuŋ âterâ juhuc ʒika qambiŋ.
32 Ehame Wofuŋzi hae i iŋuc jaha Israe ŋic jaŋere meo râeme Josuazi Libinao ewec irec sâc jaha ehuc hae fureme raʒirâ wiac jujune sasawa ʒikazi imac‐jopawec.
33 Ehame Geʒera ŋicwofuŋ Horam e Lakisi ŋic bafic‐jopaocte wefuwec. Eme Josuazi e â ŋicfâc‐ticne ʒeŋgoma imac‐jopawec.
34 Eme Josua â Israe ŋic jaŋe Lakisinec Egeloŋ haeo rarâ teuŋ âterâ juhuc ʒika qambiŋ.
35 Ehuc ʒoaŋ ijaha hae ro rauc erâ Lakisio embiŋ irec sâcko hae ima bahuc wiac jujune sasawa jopa miziembiŋ.
36 Ehuc Josua â Israe ŋic jaŋe Egeloŋnec Heboroŋko fembiŋ.
37 Ehuc hae i rorâ ʒika qahuc hae â ŋicwofuŋ â hae piticfâc‐ticne erâ irec maŋnao wiac jujune moc mi akic‐jopahuc ʒikazi imac‐jopambiŋ. I Egeloŋko embiŋ irec sâc jaha ehuc wiac jujune ʒikazi bâsirowec‐jopambiŋ.
38 Eme Josua e Israe ŋic jaŋehec mocwâc Debiri haeo risierâ ʒika qambiŋ.
39 Ehuc hae â ŋicwofuŋ‐ticne erâ hae piticfâcne rocjopa‐fârerâ wiac jujune moc mi akic‐jopahuc bâsirowec‐jopa‐fârembiŋ. I Heboroŋ â Libina ira ejarembiŋ irec sâcko ejarembiŋ hâcne.
40 Josua e iŋuc ehuc mâreŋ sasawa, tiki mâreŋ, Negebe mâreŋ, wâneŋ â heâŋ‐ticne â ŋicwofuŋfâc‐jeŋic imac‐jopawec. Ehuc Israere Wofuŋ Anutuzi mutâcnecnewec irec sâcko wiac jujune bâsirowec‐jopa‐fârewec.
41 Erâ Kadesi‐Baranea haeonec raku Gaza hae, erâ raku Goseŋ mâreŋ fotâcnerâ Gibeoŋ haeo fisikac i sasawa imac‐jopa‐fârewec.
42 Eme Israe ŋic jaŋere Wofuŋ Anutuzi ʒika qawecte Josua eki ŋicwofuŋ â mâreŋ‐jeŋic i dameŋ ijaha ro rauc ewec.
43 Eme Josua â Israe ŋic jaŋe sasawa Giligali teuŋ‐jeŋicko mocwâc risiembiŋ.