11
Salomo e juju‐ticne sâqorewec
1 Ŋicwofuŋ Salomo ere maŋzi ŋokac jabane kecʒiŋuc jaŋerao boc domawec: Farao otâ‐ticne, Moabi ŋokac, Amoŋ ŋokac, Edom ŋokac, Sidoŋ ŋokac â Hiti ŋokac.
2 Eme Wofuŋzi mârâc jaha ŋicguru i jaŋere Israe ŋic ʒiŋuc jazawec: “Jaŋe maŋŋeŋic fârepie nemufâc‐jeŋic jaŋerao qohotanʒipiŋte ŋoŋe jaŋeraonec ŋokac mi rocjopanʒepieŋ â jaŋe mana‐jarepie ŋoŋeraonec ŋokac wâc mi rocjopanʒepieŋ.” Salomo e ine ŋokac i jaŋerao hâcne maŋticne râewec.
3 Eme ŋokacfâc‐ticne fekicne jumbiŋ jaŋere ʒare 700 â mamare jucnembiŋ jaŋere ʒare 300. Jaŋe hâcne maŋticne bâsifuckembiŋ.
4 Salomo e ŋicqizec ewec dameŋ ira ŋokacfâcne jaŋe maŋticne fârepie nemu jabane jaŋerao qohotahuc, mamac‐ticne Dawidizi maŋticne hâcbuc Wofuŋtao râewec iŋuc jâmbâŋ mi ewec.
5 Ehuc Sidoŋŋic jaŋere nemu ŋokac ʒâŋene Asitorete â Amoŋŋic jaŋere nemu repicne, ʒâŋene Milikom jahe kiŋaŋ qajactewec.
6 Erâ e Wofuŋzi maname sâqorewec wiac i hâcne ebac ehuc mamac‐ticne Dawidizi Wofuŋ bâjâpe‐hâmowec iŋuc mi ewec.
7 Salomo e dameŋ ira Jerusalem hae ʒoaŋ wewefunaopec tiki moc ŋekac ira Moabi jaŋere nemu repicne ʒâŋene Kemosi â Amoŋŋic jaŋere nemu repicne ʒâŋene Moleke jahere furu mâreŋ moc bâfuawec wâc.
8 Erâ ŋokacfâc‐ticne jabane jaŋe furu mâreŋ bâfua‐jarewec jaha. Eme jaŋe nemufâc‐jeŋic hosâc âsu â taha wiac rike‐jare jumbieŋ.
9 Eme Salomo e Wofuŋ Israere Anutu mârâc jaha arec jajahec fuacnewec e maŋzi behewecte Wofuŋzi aaric manacnewec.
10 Ehuc Salomo e nemu jabane mi bâjâpec‐jopaocte âzâcne‐bipiehame sifu dâŋticne mi reŋkewec.
11 Irec Wofuŋzi Salomo ʒiŋuc âzâcnewec: “Go mâsi iŋuc ehuc ʒâʒâfic â dâŋsanaŋ‐nane mutâcne‐garepo i mi soŋaŋkemeŋte no uucmaŋge i gore meonec batara‐jâmbâŋkerâ kiŋaŋŋicge moc râcnepemu.
12 Erâ mamacge Dawidire erâ go juhaŋte iŋuc mi epemu. Ŋokâgezi juocmu ere meonec ine batarapemu.
13 Erâ Dawidizi kiŋaŋŋic‐nane juwec â Jerusalem hae bâwosâepo irec erâ uucmaŋ sasawa i ŋokâge mi jâoc rofârepemu, ŋicguru mocjaha mujarepe ere biŋefâc junʒepieŋ.”
Salomo râsifâc‐ticne fuŋkerâ fuambiŋ
14 Eme Wofuŋzi Edomŋic moc ʒâŋene Hadadi ecneme Salomo râsi rocnewec. Hadadi e Edom mâreŋte ŋicwofuŋ ere garikiŋkonec.
15 Dawidi e Edom mâreŋko juhame momori micne Joabezi ŋic jopakicne ducjopaocte ferâ Edom mâreŋko ŋic sasawa qâhâmoc‐jopawec.
16 Joabe e Edom ŋic sasawa qâhâmoc‐jopa‐fâreocte e jahacne â Israe ŋic jaŋe ijaha ʒuhuckerâ juhapie mosa 6 tarawec.
17 Eme Hadadi e dameŋ ira motec piticnea juhuc Edomŋic tucne mamac‐ticnere kiŋaŋ qaqafâc jaŋehec mâmâc wiserâ Aigita mâreŋko rambiŋ.
18 Jaŋe Midiaŋ mâreŋkonec faharerâ raku Paraŋ mâreŋko fisimbiŋ. Ehuc irecnec ŋic tucne jowac‐jopapie raku Aigita mâreŋko ŋicwofuŋ Faraorao fisimbiŋ. Eme eki fic â nânâ opâ jarewec. Ehuc ʒuhuckerâ mâreŋ mutara‐jarewec.
19 Erâ Farao e Hadadire maname sâckewecte juku e jahacne ŋonâŋ, ŋokac‐wofuŋ Tapenesi ere qo râcneme ŋonâŋ‐ticne rowec.
20 Eme Tapanesi qoticnezi ŋokâ moc rocnewec ʒâŋene Genubati. E Tapanesizi Faraore ficko gume jowac ecnewec. Ehame Genubati e Faraore ŋokâfâc jaŋehec Faraore ficko juwec.
21 Juku Dawidizi apa ŋosafâc‐ticne jaŋerao ʒuhuckehuc hâmowec â momori micne Joabe e wâc iŋuc jaha hâmowec, Hadadi e biŋe iŋuc manarâ Farao ʒiŋuc âzâcnewec: “Mana‐naretec faharerâ hae mâreŋ‐naneo risiepe.”
22 Iŋuc mume Faraozi dâŋ ʒiŋuc bâtikiecnewec: “Go norao juhuc wemo wiac basakic, irec hae mâreŋgao racmurâ manasukic?” Wiocneme muwec, “Mâc mana‐naretec rape.”
23 Eliada ŋokâ‐ticne Reʒoŋ e bomboŋ‐ticne, Zoba mâreŋte ŋicwofuŋ Hadadeze eraonec wisewec. Eme e hâcne Anutuzi Salomore râsi jaha wâc rowosâewec.
24 E Dawidizi ŋic qâhâmoc‐jopawec irec faicnao ŋic rocjoparâ micne bajareme râsi fisi jumbieŋ. Erâ Damasko haeo rarâ ira juhuc Reʒoŋ e hae irec ŋicwofuŋ âkendâŋnembiŋ.
25 E Hadadizi sisipiric gie bawec irec sâc jaha ehuc Salomore dameŋko Israe ŋic râsi ejarewec. Erâ e Israe ŋic jaŋere hâwickewecte Siria mâreŋko ŋicwofuŋ juwec.
26 Ehame Zereda haeonec Eferaim ŋic moc ʒâŋene Nebate ere ŋokâ Jeroboam e Salomore kiŋaŋŋic juwec. Neŋgoc‐ticne e ŋokac hozec moc ʒâŋene Zerua. Eme Jeroboam e wâc iŋuc jaha ŋicwofuŋ Salomo râsi ecnewec.
27 E fuŋne ʒiŋucte ŋicwofuŋ râsi ecnewec: Salomo e huec sanaŋ ʒâŋene Milo bahuc mamac‐ticne Dawidire hae irec sac bâbâzicke‐fârewec.
28 Jeroboam e gie bapa ŋic saric juwec. Irec Salomozi, ŋicmotec e ʒoɋachec, iŋuc honerâ Josefere kikefuŋfâc gie ŋemâcne mujarekicne i soŋaŋkeha baniŋte mucnewec.
29 Ehame dameŋ ira Jeroboam e Jerusalem haeonec rahame Siloŋic porofete Ahiazi hatao bâfuawec. Ahia e ŋaqi‐ticne ɋâricne moc heme hume juwec. Eme Ahia â Jeroboam jahe hatao buc jupic.
30 Eme Ahia e ŋaqi‐ticne ɋâricne rojuwec i fâreme bâmbâŋ qaha bâsuckeme dâkâne 12 ewec.
31 Iŋuc erâ Jeroboam ʒiŋuc âzâcnewec: “Go dâkânege 10 i roc. Israere Wofuŋ Anutu e ʒiŋuc hâcne mukac: ‘Manakic, no Salomore uucmaŋ iŋuc hâcne bâfâuckezo ekopac. Ehuc go ŋicguru 10 garepemu.
32 Erâ kiŋaŋŋic‐nane Dawidire erâ â no nahac Israe ŋic gurune gurune jaŋeraonec Jerusalem hae bâwosâepo irec erâ e ŋicguru mocjaha bajuzejec.
33 E râpecnuhuc Sidoŋŋic jaŋere nemu ŋokac Asitorete â Moabi ŋic jaŋere nemu Kemosi â Amoŋŋic jaŋere nemu Milikom jaŋe dape‐jareekac. E mamac‐ticne Dawidizi ewec irec sâc hata‐naneoa juhuc nore ʒâŋe faio wiac etiŋkehuc dâŋsanaŋ â mumutâc dâŋnane mi soŋaŋkeekac hâcne.
34 Irec no uucmaŋ furu jaha mi jâoc ropemu. Kiŋaŋŋic‐nane Dawidi e no nahac rowosâehape sâcmutâc â dâŋsanaŋ‐nane soŋaŋkewecte ere erâ manacnehape juju dameŋ‐ticne foocmu sâc micne bapa juocmu.
35 No uucmaŋ i ŋokâ‐ticne jâoc rorâ go ŋicguru 10 garepemu.
36 Â ŋokâ‐ticne e ine ŋicguru mocjaha râcnepemu. Ehame Jerusalem haeo ʒâŋe‐nane foocte rowosâepo hae ira hâcne kiŋaŋŋic‐nane Dawidi e tatamac focneha ʒâŋe mai‐naneo juzejec.
37 Noni âkendâŋgupe go ŋic weni jaŋere egarekac jaŋe qaŋeŋ‐jopahuc Israe guru ŋicwofuŋ ejarezemec.
38 Go kiŋaŋŋic‐nane Dawidizi ewec irec sâc jaha ehuc wiac sasawa mutâcne‐garekopac i reŋkerâ hata‐naneo juhuc dâŋsanaŋ â sâcmutâc dâŋnane soŋaŋkehuc nore maio wiac tiŋne ebac ecmuo ine no Dawidirao epo irec sâc kikefuŋfâcge hume keteŋ ejarepemu. Ehuc Israe kikefuŋ tahacgupemu.
39 Eme no irec erâ dameŋ bembeŋne mac Dawidire ɋâricfâc fific bacjopapemu.’ ”
40 Eme irec Salomozi Jeroboam qaocte hone jâjâpehuc juwec. Ehame Jeroboam e fahare wiserâ Aigita mâreŋte ŋicwofuŋ Sisaka erao ra juhame Salomo hâmoc dameŋ‐ticne maickewec.
Salomo hâmowec
(Bin II 9:29–31)
41 Salomozi wiac sasawa ebac ewec â maŋɋârâŋ‐ticnere binaŋ i Salomore gie binaŋ papia qizecko qâreŋke‐fârekicne.
42 Salomo e Israe ŋic qaŋeŋ‐jopahuc Jerusalem haeo ŋicwofuŋ juhame jara 40 tarawec.
43 Juku apa ŋosafâc‐ticne jaŋerao ʒuhuckehuc hâmome mamac‐ticne Dawidire hae qizecko duckembiŋ. Ehame ŋokâ‐ticne Rehoboamzi tucticne qarâ ŋicwofuŋ juwec.