12
Israe ŋic jaŋe maŋrâŋgeŋ bâfuambiŋ
(Bin II 10:1—11:4)
1 Israe ŋic jaŋe Rehoboam ŋicwofuŋ âkendâŋneniŋte Sikem haeo tumaŋne‐fârehapie Rehoboam e ira rawec.
2 Ehame Nebate ŋokâ‐ticne Jeroboam e ŋicwofuŋ Salomoraonec wiserâ Aigita mâreŋko rawecte ira juhuc biŋe i manarâ Aigita mâreŋkonec risiewec.
3 Eme jaŋe dâŋ râecnehuc hefârembiŋ. Eme Jeroboam â Israe ŋic sasawa jaŋe Rehoboamtao fisirâ dâŋ ʒiŋuc muhuc âzâcnembiŋ:
4 “Mamacgezi tagi bâmâmâcke‐nârewec. Irec goki gie ŋemâcne â tagi fai‐nâŋecko fokac i baafecke‐nâretec kiŋaŋ qagarenaŋmu.”
5 Jaŋe iŋuc mupie dâŋ ʒiŋuc bâtikie‐jarewec: “Ŋoŋe râwiŋnerâ ra juhapie ʒoaŋ gie bapa jahec â moc tarame norao mocwâc warenʒepieŋ.” Iŋuc jazame râwiŋnembiŋ.
6 Ehame ŋicwofuŋ Rehoboam e mamac‐ticne Salomozi ɋâricne juhame ŋicqizec ere maio fua jumbieŋ jaŋe ʒiŋuc mu wioc ejarewec: “Ŋoŋe ŋic keci jaŋe dâŋ weniŋuc bâtikie‐jarepemu i sâcne nazanʒapiŋ?”
7 Iŋuc wio‐jareme jaŋe dâŋ ʒiŋuc bâtikiecnembiŋ: “Go miŋecgac ŋic keci jaŋere kiŋaŋ qaqa ehuc kiŋaŋ qajarerâ dâŋ bâtikie‐jarehuc dâŋ biaŋne jazacmuo ine jaŋe gore kiŋaŋ qaqa erâ juraʒihuc juniŋmu.”
8 Eme Rehoboam e ŋicqizec jaŋe dâŋ âzâcnembiŋ i qâsuahuc e jahacnehec fua sokac erâ ere maio fua jumbieŋ ŋicmotec i jaŋe mu indiŋ ejarewec.
9 Ehuc ʒiŋuc wio‐jarewec: “Ŋic keci jaŋe dâŋ ʒiŋuc nazambieŋ: ‘Go mamacgezi fai‐nâŋecko tagi bâmâckehuc râewec i baafecke‐nârec.’ Eme irec okacne weniŋuc bâtikie‐jarenaŋte muŋgopieŋ?”
10 Iŋuc wio‐jareme e jahacnehec fua sokac embiŋ ŋicmotec i jaŋe ʒiŋuc âzâcnembiŋ: “ ‘Mamacgezi tagi bâmâmâcke‐nârewec â goki ine baafecke‐nârezemec,’ ŋic dâŋ iŋuc gazambieŋ jaŋe ʒiŋuc jazazemec: ‘Memotec‐nanere ɋâfoŋne i mamac‐nanere ombâŋ sirickekac.
11 Mamac‐nanezi tagi bâmâmâcke‐ŋarewec â noni ine mocwâc fehuc bâmâmâcke‐ŋarepemu; mamac‐nane e ŋâŋârâczi bâtiŋ‐ŋopawec â noni ine omeqaqazi bâtiŋ‐ŋopapemu.’ ”
12 Ŋicwofuŋ e, “Ʒoaŋ gie bapa jahec â moc tarame norao mocwâc warenʒepieŋ,” iŋuc jazame râwiŋnembiŋte Jeroboam â ŋic sasawa jaŋe Rehoboamtao mocwâc fisimbiŋ.
13 Fisipie ŋicwofuŋ e ŋicqizec jaŋe dâŋ âzâcnembiŋ i qâsuahuc dâŋ ʒocnehec bâtikie‐jarewec.
14 Ehuc ŋicmotec jaŋe dâŋ mutâcnecnembiŋ irec sâcko jazahuc ʒiŋuc muwec: “Mamac‐nanezi tagi bâmâmâcke‐ŋarewec â noni ine mocwâc fehuc bâmâmâcke‐ŋarepemu; mamac‐nane e ŋâŋârâczi bâtiŋ‐ŋopawec â noni ine omeqaqazi bâtiŋ‐ŋopapemu.”
15 Ŋicwofuŋ e ŋic jaŋere dâŋ mi manawec. Wiac i Anutuzi Siloŋic Ahia ecneme Nebate ŋokâ‐ticne Jeroboam dâŋ âzâcnewec i deŋkeme Wofuŋtaonec okacne fisiocte iŋuc fuawec.
16 Eme Israe ŋic jaŋe ŋicwofuŋzi dâŋjeŋic mi manawec i honerâ dâŋ ʒiŋuc bâtikiecnembiŋ: “Nâŋe Dawidihec ʒuʒuhuc‐nâŋec moc fokac me? Nâŋe Isaire ŋokârao wiac moc mi fonârekac.” “Ajoc, Israe ŋicbureŋ, nâŋe boze‐nâŋec sâc rafârenaŋ. Dawidire ɋâricfâc ŋoŋe ine ŋaŋacne garikiŋko sawa ʒâŋe finʒepieŋ.” Iŋuc murâ Israe ŋic jaŋe boze‐jeŋic sâc râwiŋnembiŋ.
17 Ehame sifu Rehoboam e Israe ŋic Juda hae sâc jurambiŋ jaŋere ŋicwofuŋ juwec.
18 Juku ŋicwofuŋ Rehoboam e kiŋaŋ qaqa ŋic jaŋere soŋaŋ Adoram soreme rame Israe ŋic jaŋe qânâzi hehâmombiŋ. Iŋuc epie ŋicwofuŋ Rehoboam e keretac‐ticnao ferâ Jerusalem haeo wiseocte ʒocne fârone ewec.
19 Israe ŋic jaŋe Dawidire garikiŋfâc jaŋere maŋrâŋgeŋ bâfuambiŋzi bâfuahuc juŋgopieŋ jaha.
20 Jaŋe Jeroboamzi risiewec irec biŋe manarâ tutumaŋko hefârepie fisime ŋicwofuŋ‐jeŋic âkendâŋnembiŋ. Ehuc jaŋeraonec moczi moc Dawidire garikiŋfâc jaŋerao mi qohotawec, Juda guru jaŋe sawa jaŋerao qohotambiŋ.
21 Eme Rehoboam e Jerusalem haeo fisirâ Juda kikefuŋ â Benjamiŋ guruonec ŋic ʒikafac 180 tauseŋ bâwosâec‐joparâ Israe ŋic jopahuc uucmaŋ i Salomo ŋokâ‐ticne Rehoboam e jahacnao mocwâc bârisieocte hetumaŋ‐jopawec.
22 Ehame Anuture dâŋzi kiŋaŋŋic‐ticne Semajarao ʒiŋuc fuawec:
23 “Go Salomore ŋokâ Juda ŋicwofuŋ Rehoboam â Juda â Benjamiŋ kikefuŋ, erâ ŋic ŋokac sasawa ʒiŋuc jazac:
24 ‘Wofuŋ e ʒiŋuc mukac: Ŋoŋe Israe ŋic soctofafâc‐ŋeŋic jaŋehec qaqac eniŋte mi fenʒepieŋ. Wiac ʒi nore micte fuakac irec ŋic sasawa hae‐ŋeŋic sâc râwiŋneniŋ.’ ” Irec jaŋe Wofuŋte dâŋ manahuc irec sâc hae‐jeŋicko rambiŋ.
Jeroboamzi Israe ŋic hehesicko jowac‐jopawec
25 Eme Jeroboam e Eferaim tiki mâreŋko Sikem hae barâ ira juwec. Erâ irecnec rarâ Penuele hae bawec.
26 Ehuc Jeroboam e maŋnezi ʒiŋuc manasuwec: “Uucmaŋzi Dawidire garikiŋfâc jaŋerao mocwâc risieocmu ine.
27 Eme ŋic ŋokac ʒi jaŋe Jerusalem haeo Wofuŋte ufuŋko taha bazo feniŋmuo ine jaŋere maŋzi fekicne‐jeŋic Juda ŋicwofuŋ Rehoboamtao risieme no nuhuc erao mocwâc qohotaniŋmu.”
28 Iŋuc murâ ŋicwofuŋ e gâcne jaŋehec muc manac erâ bulimakao motecne jajahec jahere hawari golzi bawec. Ehuc ŋic ŋokac ʒiŋuc jazawec: “Ŋoŋe Jerusalem haeo dameŋ ʒora fehuc jumbiŋ i sâckekac. O Israe ŋic, nemu jahec‐ŋeŋic Aigita mâreŋkonec jowac‐ŋopa wefupic ʒi honec‐jofaniŋ.”
29 Iŋuc murâ moc i Bete haeo heme domawec â moc ine Daŋ haeo heme domawec.
30 Ehame ŋic ŋokac jaŋe moc Bete haeo domawec ira rambiŋ â moc Daŋ haeo domawec ira rambiŋ, iŋuc epie sâqorewec hâcne.
31 Erâ wâc furu mâreŋko ufuŋ bame ŋerame ŋic ŋokac guruonec ŋic tucne taha bapa âkendâŋ‐jopawec jaŋe Lewi guruonec mâcne.
32 Erâ Jeroboam e mosa 8 irec ʒoaŋ gie bapa 15 ira, Juda mâreŋko tiwâ bâzi fojujec, iŋucnea mume fuame alatao taha bâzi wiac rikewec. Wiac i Bete haeo ehuc e jahac bulimakao motecnere hawari bacjofawec jahe taha bâzi rike‐jactewec. Ehuc e jahac Bete haeo mâreŋ furu muwec ira taha bapa râec‐jopa rawec.
33 Erâ e jahac mosa bâwosâewec, mosa 8 irec ʒoaŋ gie bapa 15 ira Bete haeo alata bawec ira rawec. Ehuc Israe ŋic jaŋere tiwâ bâzi hombaŋ i mufirierâ hosâc âsu rikewec.