4
Salomo fekicnefâc‐ticne jaŋere ʒâŋe biri
1 Ŋicwofuŋ Salomo e Israe kikefuŋ sasawa guriŋ bajarewec.
2 Ehame ŋic kecʒiŋuc jaŋe micnefâc‐ticne jumbiŋ: Zadokore ŋokâ Aʒaria e taha bapa juwec.
3 Sisare ŋokâ jahec Elihore â Ahia jahe qâqâreŋ ŋic jupic, eme Ahiludure ŋokâ Josafata eki dâŋ mumuŋic fekicne juwec.
4 Jojadare ŋokâ Benaja e momori jaŋere micne juwec erâ Zadoko â Abiata jahe taha bapa jupic.
5 Eme Nataŋte ŋokâ Aʒaria e mâreŋ dâkâne irec micne bapa jumbiŋ jaŋe qizec‐joparâ juwec. Eme Nataŋte ŋokâ moc ʒâŋene Ʒabudu e ŋicwofuŋte âgo juwec.
6 Ahisa e ŋicwofuŋte ficko wiac fowec i soŋaŋke jujec, â Abedare ŋokâ Adoniram eki ine ŋic jabane jaŋe kiŋaŋ gie bahuc jumbiŋ jaŋere soŋaŋ juwec.
7 Mâreŋ dâkâne dâkâne irec micne bapa 12 jaŋe Israe mâreŋ sâcke‐fârerâ Salomo kiŋaŋ qacnehuc jumbiŋ. Jaŋe ŋicwofuŋ â wiacfâcne nânâ wiac bâfua‐jare jumbieŋ, micne bapa moczi mosa mocte biŋe â moczi mosa mocte bâfua jujec, iŋuczi iŋuc ejumbieŋ.
8 Jaŋere ʒâŋe biri ʒiŋuc: Moc Beŋ‐Hure, Eferaim tiki mâreŋko juwec.
9 Moc Beŋ‐Deke, e Makazi, Salabim, Bete‐Semesi, Eloŋ â Bete‐Hanaŋ hae soŋaŋ‐jopawec.
10 Moc Beŋ‐Hesede, e Aruboti haeo juhuc Soko hae â Hefere mâreŋ mâmâc soŋaŋ‐jopawec.
11 Moc Beŋ‐Abinada, e Salomore otâ Tafati roweczi Doro hae mâreŋ soŋaŋke‐fârewec.
12 Moc Ahiludure ŋokâ Bana ere hae mâreŋ ʒiŋuc: Tanaki â Megido erâ Bete‐Seaŋ sasawa. I Zaretaŋ hae heririŋnao Jesere juwicnaopec forawec. Hae mâreŋ‐ticne i Bete‐Seaŋnec raku Abe‐Mehola haeo, Jokemeam hae ocniŋucnao fisiwec hâcne.
13 Moc Beŋ‐Gebe, e Ramoti haeo Gileade mâreŋko juwec. Ehuc Manasere ŋokâ Jairi ere haefâc Gileade mâreŋko ŋerambiŋ â Arigoba hae mâreŋ Basaŋ mâreŋko forawec i mâmâc soŋaŋ‐jopawec. I hae 60 jaŋe sacsanaŋ â aeŋzi motâc babasanaŋ‐jeŋichec.
14 Moc ine Idore ŋokâ Ahinada e Mahanaim haeo juwec.
15 Moc Ahimazi, e Naftali mâreŋ soŋaŋkewec. Ŋokac‐ticne Salomore otâ moc ʒâŋene Basemata.
16 Moc Husaire ŋokâ Bana, e Ase â Aloti mâreŋ i jahere soŋaŋ juwec.
17 Moc Paruare ŋokâ Josafata, e Isasa mâreŋko juwec.
18 Moc Elare ŋokâ Simei, e Benjamiŋ mâreŋ soŋaŋkewec.
19 Erâ moc ine Urire ŋokâ Gebe, eki Gileade mâreŋko juhuc Amori ŋicwofuŋ Sihoŋ â Basaŋ mâreŋte ŋicwofuŋ Ogo jahere mâreŋ fowec i soŋaŋkewec. Ehame micne bapa moczi micne bapa keci jaŋe qâhâc‐jopa‐fârewec.
20 Eme Juda â Israe kikefuŋ jaŋe fua sawec eku hâwecmecko moŋgeŋ forakac irec sâc embiŋ. Jaŋe nânâ opâ moc mi basahuc bubiaŋ faio jumbiŋ hâcne.
Salomo e maŋɋârâŋhec erâ eri qaraweŋ sâkohec juwec
21 Eme Salomozi uucmaŋ gurune gurune Eufrata opâonec fuŋkerâ raku Filisa mâreŋko fisirâ Aigita mâreŋte mao hu tarawec, i jaŋe soŋaŋ‐jopahuc juwec. Eme jaŋe juwec sâc sahac taha wiac râcnehuc kiŋaŋ qacnehuc jumbiŋ.
22 Ʒoaŋne ʒoaŋne Salomo nânâ wiac ʒiŋuc bafisicnembiŋ: Poroŋ uucne qaŋqaŋ târu 30, erâ poroŋ uucne gâgâpâc târu 60,
23 bulimakao wokemaŋ sâkohec 10 erâ bulimakao sapa sâkoonec 20, erâ lama 100. Erâ wâc kâte qowi gâcne nânâne â qâqâc wiac wokemaŋ sâkohec mâmâc.
24 E Eufrata opâ ʒiŋucpec Tifisa haeonec fuŋkerâ raku Gaza haeo tarakac mâreŋ ŋondeŋ ira ŋicwofuŋ jurambiŋ jaŋe soŋaŋ‐jopa‐fârewec. Ehame ŋifec â ŋifec jumbiŋ jaŋerao wâc wama sâko fowec.
25 Ehame Juda â Israe kikefuŋ jaŋe Salomozi juwec sâc Daŋ mâreŋkonec huraku Bere‐Seba haeo tarawec ŋondeŋ ira mana mezac tâmiric juhuc waiŋ gie â jâmbo jufu wiac‐jeŋic soŋaŋkehuc jumbiŋ.
26 Eme Salomo e keretac fâfâre becâsic 40 tauseŋ domacnembiŋ erâ becâsicko rara momori ŋic 12 tauseŋ jucnembiŋ.
27 Eme ŋicwofuŋ Salomo â ŋic ehec juhuc nânâ nâjumbieŋ jaŋere nânâ i micne bapa mucjopakicne jaŋe ru sâc moczi mosa mocte â moczi mosa mocte nânâ iŋuc bâfuapie wiac moc mi basa‐jâmbâŋkembiŋ.
28 Eme gie mujarekicne sâc becâsic jaŋere nânâ wiac i jumbiŋkoa bafisi‐jare jumbieŋ.
29 Eme Anutuzi Salomo mamana sâko â maŋɋârâŋ bâfuacnehuc maŋticne bâsokame mamana‐ticnezi ʒâkâŋ ɋârâŋ iŋucne ewec.
30 Eme Salomore maŋɋârâŋzi ʒoaŋ wewefunaopec ŋic jumbiŋ jaŋere maŋɋârâŋ me Aigita ŋic jaŋere maŋɋârâŋ i mâmâc siricke‐fârewec.
31 Ere mamanazi ŋic gâcne jaŋere mamana jâuru‐fârewec. Eʒarai ŋic ʒâŋene Etaŋ ere mamana mecne, Maholare ŋokâfâc Hemaŋ, Kalokolo â Daroda jaŋere mamana mecne i mâmâc jâuruwecte ʒâŋe biŋe‐ticnezi ŋicne ŋicne rârec rârec jurambiŋ jaŋerao haŋ bafârewec.
32 E muqâqiŋ dâŋ 3 tauseŋ mufuarâ gae hefuakume 1 tauseŋ 5 iŋuc ewec.
33 E wiac fuŋne fuŋne jaŋere dâŋ mufuawec. Jâc jaŋere dâŋ i jâmâzâc Lebanoŋ tikio doma rakac irecnec fuŋkerâ mu wahaku kueŋ kueŋ jâcko fuaekac erao mutarawec. E qowi kâcɋene jaŋere dâŋ, wipe jaŋere dâŋ, erâ wiac foforâ jueŋgopieŋ â opâ qowi jaŋere dâŋ i mufârewec.
34 Mâreŋ sâc ŋicne ŋicne â ŋicwofuŋ jurambiŋ jaŋe Salomo maŋɋârâŋ‐ticnere biŋe manambiŋte irec fuŋne mananiŋte erao fisimbiŋ.