5
Salomo â Hiram jahe giere babafic epic
(Bin II 2:1–18)
1 Israe ŋic jaŋe Salomo mamac‐ticnere tuc qaocte ŋicwofuŋ âkendâŋnembiŋ irec biŋe i Tiro ŋicwofuŋ Hiramzi manawec. E maŋticnezi dameŋ sâc Dawidirao domawec. Irec kiŋaŋŋicfâc‐ticne gâcne jaŋe Salomorao sorec‐jopame rambiŋ.
2 Eme Salomozi okacne dâŋ ʒiŋuc bâtikiecnehuc ŋic gâcne Hiramtao sorec‐jopawec wâc:
3 “Go mamac‐nane Dawidire fuŋne manakomec. E Wofuŋ Anutu‐ticnere biŋe fic moc baocte maŋkewec. Mâc rârec rârec ʒikazi ʒika forawecte fic i baocte quŋkewec. Ʒâhec ine Wofuŋzi râsifâc‐ticne bawahac‐jopaocte manacnewec.
4 Eme dameŋ ʒi Wofuŋ Anutu‐nanezi rârec rârec wama sâko bâfua‐nareme râsifâc‐nane mi juŋgopieŋ â aka wâc mi fokac.
5 Erâ manakic, Wofuŋzi mamac‐nane Dawidi ʒiŋuc âzâcnewec: ‘No gore âkehoc ŋokâge eri ŋeŋegao râepe ŋeocmu eki ʒâŋe‐nanere fic moc baocmu,’ dâŋ irec sâcko no Wofuŋ Anutu‐nanere biŋe fic moc bazo mukopac.
6 Irec go mutec ŋicfâcge jaŋe Lebanoŋ tikio jâmâzâc nore biŋe qafarapie kiŋaŋŋicfâc‐nane jaŋe bafic‐jopanʒepieŋ; eme no kiŋaŋŋicfâcge jaŋere gie furi i goki mutec sâc râe‐garezepac. Go gahac wâc manakic, Sidoŋŋic jaŋe jâc qaqafarare fuŋne mana‐hâmoeŋgopieŋ, nâŋere ŋicfâc jaŋe ine mi manaeŋgopieŋ.”
7 Eme Hiram e Salomore dâŋ i manarâ bubiaŋ sâko manahuc dâŋ ʒiŋuc muwec: “Ʒoaŋ ʒi Wofuŋ mumbiaŋkezo! Eki hâcne Dawidi ŋokâ moc mamanahec tahackewecte ŋic ŋokac guru sâko sâcne soŋaŋ‐jopaocmu.”
8 Iŋuc murâ Hiramzi Salomo dâŋ okacne ʒiŋuc bâtikiecnewec: “Go dâŋ râe‐naremec i manapac. Go jâmâzâc â wetejâc irec dâŋ nazamec i egarekac sâc epemu.
9 Ŋicfâc‐nane jaŋe jâc i Lebanoŋ tikionec bawaharâ hâwecmecko râeniŋmu. Eme mupe jâcombâŋne qâturepie ʒae fuame hâwecko bahuku hae mutâcnecmu ira râeniŋmu. Eme hetâtiepie goki ine okacne narehuc no â wiacfâc‐nane nâŋe nânâ wiac bâfua‐nârezemec.”
10 Eme Hiram e Salomozi muwec irec sâcko jâmâzâc â wetejâc râecnehuc juwec.
11 Eme Salomo e Hiram okacne bazucnehuc wiacfâc‐ticne jaŋere manasuhuc padi târu 20 tauseŋ â oliwa qanʒaŋnekicne irec pake 20 tauseŋ jaha râcnewec. Jara sâc iŋuc râcnehuc juwec.
12 Ehame Wofuŋzi Salomo mupaŋkecnewec sâc maŋɋârâŋ bâfuacnewec; eme Hiram â Salomo jahere ŋondeŋko wama fowecte ʒâʒâfic moc epic.
13 Eme ŋicwofuŋ Salomozi Israe kikefuŋ jaŋeraonec ŋic 30 tauseŋ kiŋaŋ qaqa gie baniŋte bâwosâec‐jopawec.
14 Erâ mosa sâc ŋic 10 tauseŋ Lebanoŋ tiki mâreŋko sorec‐jopame rajumbieŋ. Jaŋe ira mosa wâŋ juku risierâ mosa 2 hae‐jeŋicko jujumbieŋ. Ehame Adoniramzi soŋaŋ‐jopahuc juwec.
15 Eme ŋic 70 tauseŋ jaŋe Salomore mafa wiac hâpo jumbieŋ, â ŋic 80 tauseŋ jaŋe ine tikio qânâ qâfâucke jumbieŋ.
16 Erâ i sawa mâcne, jaŋerao ŋic micne 3 tauseŋ 300 ʒuhuckerâ jumbiŋ. Jaŋe gie qizeckehuc ŋic gie bahapie hone soŋaŋ ejare jumbieŋ.
17 Eme ŋicwofuŋzi giedâŋ mujareme sâc ficte hobeteŋ râezore qânâ kâcɋene â furi sâko he bâfâuc ehuc ropie warewec.
18 Ehame Salomo â Hiram jahere fic bapa ŋic â Gebali ŋic jaŋe fic bazore qânâ wiac mecne â jâc wiac mecne i he fasaec ehuc ba akic efârembiŋ hâcne.