3
Zioŋ e Wofuŋzi buuruc‐ticnere erâ bafickeocte mamanac juwec
1 Anutu e kimbeŋ‐ticnere kâcbiŋzi ʒârâ ʒâpâ bâfuawec
i ŋic norao hâcne.
2 E ʒoɋac ehuc duŋdapâcko jowacnume raʒipo.
3 Jâmbomac, e ʒoaŋ ʒora harierâ meticne bafaharehuc nuekac.
4 E sahac biuc‐nane ecneme hâmo ɋaŋac ewec,
ehame siec‐nane qazu‐fârewec.
5 E mume wiac hâtâne â ʒârâ hâriŋzi somâcnurâ fowec.
6 E mârâc jaha hâmombiŋ
jaŋe iŋucne dapâcko jupemurâ râecnuwec.
7 E orâŋnuhuc qânâsac bawecte wisezore eipieekopac;
e aeŋ niŋgiŋ ŋemâcne qanareme huwec.
8 No wira wâwâsic ehape
e sifu nunumu‐nane mana takireekac.
9 E qânâ sâkozi hata‐nane hebâzickewec,
ehuc hatagâŋ‐nane hezickeme sifuckewec.
10 E kâte qowi mimicnezi ruc baekac
â laioŋzi soŋsoŋko foekac irec sâc enareekac.
11 E qac qâsoric epemurâ enarewec,
erâ kisuc qâsucnuhuc omaecnuwec.
12 E tepe motec‐ticne gurutucko herâ
âpârehuc ma bacnuwec.
13 E tepe motec‐ticnezi buhândâŋ‐naneo murucnuwec.
14 Eme ŋicne ŋicne jaŋe mana wahacnuhuc gâwie‐nareeŋgopieŋ,
ehuc ʒoaŋ sâc norao iticnehuc
mu qâqiŋ gae heeŋgopieŋ.
15 E wiac hâtânezi bâfusecnuwec,
ehuc opâ hâtâ qiŋqiŋne gumecnuwec.
16 Eki enareme micsiec‐nane qânâ hândâŋko kizu‐fârepo,
ehuc menezi ʒafeo bânduŋnuwec.
17 E maŋ qâqâtâc‐nanere wama nowac rowecte
juju biaŋ‐nane omaewec.
18 Eme mupo, “Wofuŋtaonec tâpiri‐nane i omaewec,
â erao roweckehuc juju‐nane i arictac ewec.”
19 No ʒârâ ʒâpâ faio qafec qawahac juekopac
go irec manasuzemec,
erâ wiac hâtâ qiŋqiŋne â opâ mimicne
gumecnumeŋ irec mâmâc.
20 Maŋ qâqâtâc‐nanezi dameŋ sâc irec manasuekac,
ehuc dunduŋ dadape foekac.
21 No ine irec manatâc qâtâc ehuc worickeekopac.
22 Wofuŋte aki anonoc mi omaeekac,
â buuruc‐ticne i tatara tâmiric.
23 I hae fureocmu sâc ɋâricnezi ɋâricne fua raekac,
go erâ‐eesanaŋge fekicne.
24 Maŋnanezi mukac, “Wofuŋ e boreŋ‐nane,
irec no ere mamanac jupemu.”
25 Wofuŋte woŋec juhuc maŋzi wira basac ecneeŋgopieŋ
jaŋe bubiaŋ qajareekac.
26 Niniŋkerâ woŋec juju i wiac fâri biaŋ,
Wofuŋte bâbâpiaŋ i hâcne woŋeckezo.
27 Ŋic moc e motec‐ticnao tagi deocmu,
izi wiac fâri biaŋ jaha eocmu.
28 Wofuŋzi tagi ɋawenao râecneme kihâmoha
sifu niniŋkerâ bucmac‐ticne ŋezejec.
29 Wândocko maku erâ ŋezejec,
ehame bafic moc fuacneocmu mecne.
30 Mauc‐ticne ʒika qaqa sicnecnezejec,
ehuc mimi fainao feme kinduŋ bânduŋ juzejec.
31 I ʒiŋucte ezejec: Bebehe sanaŋ i Wofuŋtao mi fokac.
32 Aki anonoc‐ticne i guru fufusuc fokacte
ŋic moc bâʒâickeku sifu harierâ jauŋkeocmu.
33 E buafec jaha mâreŋŋic wiac buqâqânducne
â busâqocnehec mi bâfua‐jareekac.
34 Mâreŋ sâc kâpâcwâru ŋic kikezi âtec‐jopa‐fâreniŋmu,
35 me Femicne ere maio ŋic mocte dâŋ musifuckeniŋmu,
36 me dâŋgieo ŋic mocte dâŋ muhasickeniŋmu
i Wofuŋzi moc mi honeocmu me?
37 Mo ŋiczi Wofuŋ e mi mutâcneha
wiac moc fuaocte muocmu?
38 Me wiac sâqocne â biaŋne
i Femicnezi mume mi fuaekac me?
39 Ŋic e mâreŋko juhuc wemo wiacte mu kâroŋ eekac?
E jahacne sâqocnere maname sâqoreoc me!
40 Nâŋâc juju â eebapa‐nâŋec ba esâic ecnehuc
fuŋne‐nâŋec mana jaŋgeŋkerâ Wofuŋtao risienaŋ.
41 Wofuŋ sambâŋko jukac erao maŋnâŋec sâsehuc
menâŋec bâfeŋnenaŋ!
42 “Nâŋe behecgurâ qaqatara bâfuambeŋ,
irec go kiŋnâŋec i mi bâtâmiremeŋ.
43 “Go kimbeŋzi ʒikage eme jâpec‐nâpomeŋ,
ehuc busâqoc moc mi mana‐nârehuc qâhâmoc‐nâpomeŋ.
44 Go karorac maŋnao soŋkerâ juhaŋtecne
nunumu‐nâŋeczi gorao sâcne moc mi hefâ fisiwec.
45 Goki enâretecne ŋic gurune gurune jaŋere ŋondeŋko
jawa rasa iŋucne erâ mamakâcne embeŋ.
46 “Râsifâc‐nâŋec sasawa jaŋe musoriŋ‐nâpohuc jueŋgopieŋ.
47 Iima â sisipiric sâko izi nombâŋ enâreha
bipic‐nâŋec tarawec.
48 Ŋicfâc‐nane jaŋe boc sipiric‐jopakicnere
ʒâŋeuc‐nane bocjaha wahahuc domakac.
49 “Ʒâŋeuc‐nane i tatara tâmiric
ʒuʒuhuc jaha wahahuc domaocmu hâcne.
50 Ehame Wofuŋ e sambâŋkonec fime wahame honezejec.
51 Hae sâko‐nanere otâfâc wiac fua‐jare‐fârewec
i honerâ ʒâŋe‐nane ʒâicnukac.
52 “Maŋgâŋko râsi enarehuc jumbiŋzi
no wipe iŋucne nu jâpec enarembiŋ.
53 Jaŋe juju‐nane sipirickeniŋte
nombâŋko behecnupie hupe qânâ wicke‐narembiŋ.
54 Eme opâzi qâurucnume mupo:
‘Jei, no omaezo ekopac.’
55 “O Wofuŋ, no nombâŋ fâhâŋnao ŋehuc
ʒâŋege riwaseckepo.
56 No ʒiŋuc mupe marac fânâŋ‐nane manameŋ:
‘Go baficnucmurâ wira wâwâsic‐nanere hazec râezemec!’
57 No riwasecgupo ʒoaŋ ira maicnuhuc ʒiŋuc nazameŋ:
‘Go mi hâwicguoc!’
58 “O Wofuŋ, goki dâŋnane dopeckehuc
juju‐nane bâfiriemeŋ.
59 O Wofuŋ, ro waha âte enarekicne i go honemeŋ,
irec gokizia dâŋnane mutarac.
60 Râsi enarehuc dâŋ manasu biric embiŋ,
â okac babazu gie bambiŋ i go hone‐fâremeŋ wâc.
61 “O Wofuŋ, râsi enarehuc dâŋ sasawa manasu biric erâ
musoriŋnumbiŋ i go manameŋ.
62 Erâ râsifâc‐nane jaŋe ʒoaŋ ʒora micbipic‐jeŋiczi
nore dâŋ mueŋgopieŋ â wiac manasu biric eeŋgopieŋ i mâmâc manameŋ.
63 Go honec‐jopac: Jaŋe waha ŋeeŋgopieŋko
me fahare domaeŋgopieŋko
ine ʒoraŋ gae henareeŋgopieŋ.
64 “O Wofuŋ, mejeŋiczi wiac ebac embiŋ
irec sâcko okacne bâtikie‐jarezemec.
65 Goki maŋjeŋic mutuc batec
sâwecgezi fai‐jeŋicko fezejec.
66 O Wofuŋ, go kimbeŋko qa jâpec ejareku
sambâŋgere rurumaŋko bâsirowec‐jopazemec!”