4
Zioŋtao bâbâtiŋ fua tarawec
1 Opoŋ, golzi weniŋuc erâ joŋtawewec?
Gol ɋaɋacne izi weniŋuc erâ hetikieme moc ewec?
Qânâ furi sâko i hata sosohoc sâc hesiepie ŋerakac!
2 Zioŋte ŋokâfâc ʒâŋe biŋehec,
golzi sawa furi babacjopane,
jei, jaŋere manapie afezi kuʒi bakicne
â kuʒi bapa ere meqâreŋ irec sâc eŋgopieŋ i!
3 Kâte qâto jaŋe motecfâc‐jeŋic moŋ gumec‐jopaeŋgopieŋ,
ŋicfâc‐nane jaŋere otâ eki ine kâteo
qera jauŋ tâmiric juekac e iŋucne.
4 Ɋie jaŋe opâre hâmopie
nameŋ‐jeŋiczi gâpi‐jeŋicko bohotaekac,
â naru motec jaŋe nânâre mu huacbuc epie
moczi moc jare gumec mi eekac.
5 Mârâc jaha nânâ wiac aŋacnehec nâjumbieŋzi
hae ʒoŋao juhuc hâmo sipiric eeŋgopieŋ,
â qoruc furi sâko rumacke‐jarekicne
jaŋe jawa faio foeŋgopieŋ.
6 Ŋicfâc‐nane jaŋere otâ e kiŋticnezi
Sodom haere hehesic jâuruwec.
Hae i ŋiczi ima gie moc mi bahapie
ututuŋ bâsirowekicne.
7 Zioŋ fekicnefâc‐ticne jaŋe sinoure sâc jâuruhuc
ɋaɋac taeŋne erâ susure sâc wâc sirickehuc
ɋaɋacne jâmbâŋ embiŋ;
sahac‐jeŋic ine haroŋaŋ bâbâroŋ irec sâc jâuruhuc
bâbâroŋ jâmbâŋ ewec,
â sahac hawari‐jeŋic ine qânâ keŋkeŋne furi sâko iŋucne.
8 Ʒâŋe mai‐jeŋic i mâsic hawari jâuruhuc
gâpâre‐jâmbâŋkewec
irec gâcnezi hae ʒoŋao mocwâc mi ʒâŋitac‐jopambiŋ;
sahac‐jeŋiczi muzuckerâ siec‐jeŋicko bohotahuc
ʒoc iŋucne kereŋkewec.
9 Ʒikare nânâ ehuc ɋeŋnea hâmombiŋ irec ʒâic i afecne,
â nânâre hâmohuc ʒâic manaku hâmo sipiric embiŋ
izi ine wiac ŋemâcne jâmbâŋ.
10 Ŋicfâc‐nane jaŋere sisipiric dameŋko ŋokac buuruchec
jaŋe naru motecfâc‐jeŋic kuʒio rikec‐jopapie
nânâ‐jeŋic embiŋ.
11 Wofuŋ e aaricko gie sâko baocte manawec,
ehuc kimbeŋ‐ticnere ʒocbâruŋ hoŋkewec;
e Zioŋko ʒoc ruqeme ʒawec,
ehuc haere hobeteŋne ʒâseŋkewec.
12 Râsi somâ bapa jaŋe Jerusalem hae irec motâc
fotâcnerâ raʒiniŋmu,
dâŋ i mâreŋte ŋicwofuŋ mecne
â mâreŋ sâko mâreŋ irec ŋecjucfâcne jaŋe mecne
mi mana ʒakiembiŋ.
13 Wiac hâhâwicne fua‐jarewec
i porofetefâc‐jeŋic jaŋere sâqocnere erâ
â taha bapafâc‐jeŋic jaŋere hehesicte erâ fuawec;
jaŋe hâcne hae irec maŋnao
ŋic tiŋne jaŋere soc hoŋkembiŋ.
14 Jaŋe ŋic tiŋtuŋ iŋucne hae ʒoŋao
qac qâsoric ehuc jumbiŋ,
ehame ŋaqi‐jeŋicko soc bohotawecte
ŋiczi ba bâuac sâcne mi embiŋ.
15 Jaŋe honec‐joparâ ʒiŋuc mumbiŋ:
“Wiseniŋ, wâwânâŋheczi wareŋgopieŋ!
Wiseniŋ, wiseniŋ me! Ba bâuac moc mi ejareniŋ!”
Iŋuc ejarepie jaŋe ŋic wiwisene â hahata jujune embiŋ,
ehame ŋicne ŋicne jaŋere ŋondeŋko dâŋ ʒiŋuc fuawec:
“Jaŋe nâŋâcnehec moc mi junʒepieŋ.”
16 Wofuŋ e jahac bâtâtiec‐jopawec,
erâ mocwâc honec‐jopaocte mi ecnewec;
taha bapa jaŋe mi sâsec‐jopakicne,
â ŋic kâcɋene jaŋe uruc jauŋ mi ejarekicne.
17 Nâŋe babaficte maŋgâŋ ʒâŋe fihuc jaha juhapene
ʒâŋe‐nâŋeczi betaŋkewec.
Nâŋe ʒâŋe fifi‐nâŋecko domahuc
ŋicguru moc jaŋere ʒâŋe fimbeŋ,
jaŋe ine babafic‐nâponere sâc mi embiŋ.
18 Kikeo kikeo enârekicnere hae ʒoŋa‐nâŋecko
wemocko sâcne rac warec enʒapeŋ;
hâmoc dameŋ‐nâŋec bembeŋkewec,
juju dameŋ‐nâŋec qosackewec,
hâmoc dameŋ‐nâŋec maickewec hâcne.
19 Jâpec‐nâpombiŋ jaŋe tucwipe sambâŋ rurumaŋnao sâoekac
irec sâc jâurumbiŋ,
jaŋe tikio nâpo jâpec embiŋ
â mâreŋ sawao ruc banârembiŋ.
20 Wofuŋzi wokemaŋ ruacnewec, juju‐nâŋecte fosiŋ hâcne,
e nombâŋ‐jeŋicko hume rombiŋ,
nâŋâc ine ere ʒiŋuc manambeŋ,
“Nâŋâc ere mumucko ŋicne ŋicne jaŋere ŋondeŋko junʒepeneŋ.”
21 O Edomte otâ, go ʒeri ehuc bubiaŋ manac,
Uzi mâreŋ irec rune go.
Gorao waiŋ râqâc fâ fisiocmu wâc,
eme i nâku maŋsifuc egareme ŋaqige hetararâ
biuctac jucmu.
22 O Zioŋte otâ, gore kiŋtofa i batarakicne,
Wofuŋzi mume kâpâcwâruo mocwâc mi bacgu raniŋmu.
Edomte otâ gore hehesicte okacne
ine bazu‐gareocmu,
ehuc bahacge bataniŋkeocmu.