11
Wofuŋzi qowi bâfua‐jareocte mupaŋkewec
1 Eme ŋic ŋokac jaŋe nânâ opâre hâmo sipiric ehuc Wofuŋ mu kâroŋ ecnepie manawec. Manarâ aarickeme mume ʒoc fuarâ teuŋ qaŋeŋne ʒahuc wâcwiac‐jeŋic gâcne ʒafârewec.
2 Iŋuc fuame ŋic ŋokac jaŋe Wofuŋ kio wâwâsic ecnepie Mosezi Wofuŋ numucneme mume ʒoczi hâpowec.
3 Wofuŋzi mume ŋondeŋ‐jeŋicko ʒoc fuarâ ʒawecte hae mâreŋ irec ʒâŋe Tabera mumbiŋ.
4 Eme Israe ŋic jaŋere ŋondeŋko ŋic repicne gâcne jumbiŋ jaŋe nânâ wiac biaŋnere andac ehapie Israe ŋic jaŋe wâc kiohuc kecʒiŋuc mumbiŋ: “Qowi moc fua‐nâreme nanʒapeŋ me!
5 Nâŋe Aigita mâreŋko opâ qowi me qahac me bomboŋ herimuŋ me raki wiac fuŋne fuŋne furi tâmiric nâjumbeneŋ irec manasuhuc juŋgopeneŋ.
6 Ʒi ine nânâre hâmohuc tâpiri‐nâŋec omaeme mana sawa honeŋgopeneŋ.”
7 Mana ine hândâŋ piic piic, padi tinac fuarâ ŋerawec.
8 Eme ŋic ŋokac jaŋe nuserâ toŋtoŋko âkenʒaŋnerâ kuʒio rikepie dockeme poroŋ bajumbieŋ; erâ nâpie aŋac‐ticne poroŋ uucne wokemaŋ opâhec rikekicne iŋucne tinac ewec.
9 Mana i ŋafeo teuŋko titikuc wahame mâmâc waha jujec.
10 Eme ŋic jaŋe guru sâc qoruc boze‐jeŋicko domahuc kiohapie Mosezi manawec. Ehame Wofuŋzi aaricke sâqoreme Mosezi mana gâpârewec.
11 Ehuc Wofuŋ kecʒiŋuc âzâcnewec: “Go kiŋaŋ qaqage no weniŋucte wiac ʒâʒâicne iŋucne enaremeŋ? No wemo wiac sâqocne moc egarepo irec ŋic ʒi jaŋere ŋemâc i nore faio râekomec?
12 Noni neŋgoc‐jeŋic jukopac me? Me noni bâfuac‐joparâ mâreŋko râec‐jopapo irec go ʒiŋuc nazakomec: ‘Go ŋokac moczi kogoc‐ticne hâpo heâroŋ ecneekac irec sâc ŋic ʒi jaŋe ejarehuc mamacfâc‐jeŋic mâreŋ biŋe qajarepo ira jowac‐jopa razemec?’
13 No qowi wenirec bâfuarâ ŋic gumec‐jopape sâcjopa‐fâreocmu? Jaŋe nore maio kiohuc ʒiŋuc hâcne mueŋgopieŋ: ‘Go qowi moc bâfua‐nâretec nânʒepeneŋ.’
14 Ŋic ʒi jaŋere ŋemâc i nore sâc sirickekac, no bucnane sâcne mi âsickepemu.
15 No iŋuc epemurâ manasukicko ine ʒiŋuczia qâhâmocnuzemec, me nore manatec sâckeme ine wiac ŋemâcne ʒi bârârietec omaezejec.”
16 Eme Wofuŋzi Mose kecʒiŋuc âzâcnewec: “Go Israe ŋic soŋaŋ micnefâc‐jeŋic weni jaŋe jupie manac‐jopaekic guru i jaŋeraonec ŋic 70 rowosâec‐joparâ tutumaŋ qoruc bozere motâcko biric‐jopatec gohec mâmâc domanʒepieŋ.
17 Ehame no hufâpe gohec dâŋ muc manac enacmu, ehuc go maŋɋârâŋhec jukic maŋɋârâŋ iŋucnea jaŋe wâc tahac‐jopape ŋic jaŋere ŋemâc i go buc mâcne, jaŋe gohec mâmâc âsickenʒepieŋ.
18 Erâ ŋic ŋokac ʒiŋuc jazac: ‘Ŋoŋe tomâckore ʒawiehuc juhapie hae fureme qowi fua‐ŋareme nânʒepieŋ. Ŋoŋe Wofuŋ kecʒiŋuc muhuc kio wâwâsic ecnembiŋ irec: “Nâŋe Aigita mâreŋko sâcne mac jumbeŋ, ʒi ine mozi qowi nâreme nanaŋmu?” Iŋuc mumbiŋte Wofuŋzi qowi ŋareme nânʒepieŋ.
19 Ŋoŋe qowi nâniŋmu i ʒoaŋ gie bapa 1 me 2 me 5 me 10 me 20 ira sawa mâcne,
20 nâhuc juhapie mosa moc tarame qowire takic‐ŋopame mamakâc‐ŋopaocmu. Ŋoŋe Wofuŋ ŋondeŋ‐ŋeŋicko jukac e hâcne râpeckerâ ʒiŋuc muhuc kio wâwâsic ecnembiŋte iŋuc fua‐ŋareocmu: “Nâŋe wemocte Aigita mâreŋ beherâ warembeŋ?” ’ ”
21 Mosezi ine ʒiŋuc muwec: “Ŋic nohec hata wareŋgopieŋ jaŋere ʒare i 600 tauseŋ, eme go sifu mukomec: ‘No qowi bâfua‐jarepe nâhuc juhapie mosa moc tarazejec.’
22 Jaŋere erâ lama bulimakaofâc‐nâŋec qa hezuc epene sâcjopaocmu me? Me hâwec qowi rocjopa‐fârerâ gumec‐jopapene sâcjopaocmu me?”
23 Mose e iŋuc mume Wofuŋzi ʒiŋuc âzâcnewec: “Go Wofuŋ nore tâpirire manatec wawahane ekac me? Dâŋnane burec me jâmbomac irec fârine miŋecgac jaha taniŋkeme honezemec.”
Micne 70 jaŋe findaŋdâŋ mumbiŋ
24 Eme Mose e ŋic ŋokac jaŋerao rarâ Wofuŋte dâŋ jazawec, ehuc soŋaŋ micne jaŋeraonec ŋic 70 rocjoparâ qoruc boze râreckehuc râec‐jopa rawec.
25 Eme Wofuŋzi karorac maŋko waharâ Mose dâŋ âzâcnewec. Ehuc Mosezi maŋɋârâŋhec juwec irec sâc jaha ŋic 70 jaŋe maŋɋârâŋ tahac‐jopame findaŋdâŋ mumbiŋ. Mâc ʒâhec ine findaŋdâŋ mocwâc mi mumbiŋ.
26 Ŋic jajahec ʒâŋe‐jekic Elida â Meda, jahe ŋic gâcne rowosâec‐jopakicne jaŋere guruonec jaha, erâ sifu teuŋko ʒuhuckerâ ŋehuc maŋɋârâŋhec erâ findaŋdâŋ mupic.
27 Eme ŋicmotec moczi manarâ gasacke rarâ Mose ʒiŋuc âzâcnewec: “Elida â Meda jahe teuŋkoa ŋehuc findaŋdâŋ mukopirec.”
28 Iŋuc mume Nuŋte ŋokâ Josua, e fuŋnaonecteaŋ Mosere mefâro juweczi ʒiŋuc muhuc âzâcnewec: “O bomboŋ‐nane Mose, go qatara‐jactec.”
29 Mosezi ine dâŋ kecʒiŋuc bâtikiecnewec: “Go wemocte nore mana mezac erâ ʒoɋac ekomec? Manakic, Wofuŋte ŋic sasawa jaŋe porofete erâ juhapie Wofuŋzi maŋɋârâŋ tahac‐jopame muzac biaŋkezac.”
30 Mose e iŋuc mutararâ e jahacne â Israe soŋaŋ micne jaŋe teuŋko risiembiŋ.
Wofuŋzi qowi bâfua‐jarewec
31 Eme Wofuŋzi mume hâweckonec mâŋâŋ ʒocnehec qahuc koneŋ wipe qâŋhec ficne suec‐jopame wefurâ teuŋko ŋifec â ŋifec herâ ŋerambiŋ. Eme ŋiczi ʒoaŋ mocjahao hata raniŋmu irec sâc teuŋ râreckehuc herâ ŋerambiŋ hâcne. Ehuc mâreŋ sâockerâ gurune gurune qâŋhec ŋembiŋ.
32 Eme ŋic jaŋe faharerâ ŋafe ʒoaŋ ro nusec ejarehuc juhapie hae fureme ʒuhuckerâ rohuc juhapie hae ŋafewec. Aafecne rombiŋ jaŋe sifu pake 10 bâfusembiŋ. Ehuc kereŋkeocte teuŋ rârec rârec qandaŋkembiŋ.
33 Eme qowi nâhuc nâhuc juhapie Wofuŋte kimbeŋzi bâruŋkeme wiac hâhâwicne fua‐jareme hâmo sipiric embiŋ.
34 Eme hae mâreŋ irec ʒâŋe Kibero‐Hatawa mukicne irec fuŋne kecʒiŋuc: Ŋic ŋokac jaŋe ira qowire andac epie okacne fisi‐jareme hâmo duduc embiŋ.
35 Erâ Kibero‐Hatawa mâreŋ beherâ raku Hazeroti hae mâreŋko fisirâ ira ŋec foc embiŋ.