12
Miriam â Aroŋ jahe Mose mana sâqorecnepic
1 Mose e Kusi ŋokac moc rome ŋonâŋ‐ticne ewecte Miriam â Aroŋ jahe mana sâqorecnepic.
2 Ehuc ʒiŋuc mupic: “Wofuŋ e jâmbomac dâŋticne Mosere micko sawa me gâcne nâŋere micko mâmâc râewec me?” Iŋuc muhapire Wofuŋzi manawec.
3 Mose e mâreŋte faio ŋic jumbiŋ jaŋe jowaruhuc maŋhuhuŋ jâmbâŋ juwec.
4 Eme jahe dâŋ mupic i Wofuŋzi manarâ izia Mose â Aroŋ â Miriam ʒiŋuc jazawec: “Ŋic ŋokac jahec â moc ŋoŋe tutumaŋ qoruc bozeo wefuniŋ.” Iŋuc mume jaŋe fembiŋ.
5 Eme Wofuŋ e karorac maŋko waharâ tutumaŋ qoruc bozere motâcko domahuc Aroŋ â Miriam wira‐jacteme mamai rapic.
6 Eme e ʒiŋuc jasawec: “Ŋohe dâŋnane mananic: Ŋondeŋ‐ŋeŋicko porofete moc juocmu ine Wofuŋ no maŋɋârâŋ‐ticne bâtâcnehuc fuŋne‐nane âzâcne jâutuc epemu, ehuc guŋqâhâŋ ecnerâ dâŋnane âzâcnepemu.
7 Kiŋaŋŋic‐nane Mose e wiac iŋucne moc mi ecneekopac, e kikefuŋfâc‐nane sasawa soŋaŋ‐jopaocte mucnekicne.
8 No e guŋko mâcne, tâtâc mai fuacnehuc dâŋ âzâcnepe Wofuŋ qâreŋ‐nane honeekac. Ehame ŋohe wemocte mi hâwic‐ŋofaha kiŋaŋŋic‐nane Mose mana sâqorecnekopirec?”
9 Eme Wofuŋ e kimbeŋ‐ticne bâruŋke‐jacteha behec‐jofarâ rawec.
10 Ehame karoraczi qoruc boze beherâ feme Miriam e mi wicsanaŋ fuacneme qaŋ kisieckerâ domazejec i! Eme Aroŋzi Miriamtao forisierâ honeme wicsanaŋhec domawec.
11 Iŋuc honerâ Mose ʒiŋuc muhuc wâsickewec: “O bomboŋ‐nane, nâhe mutuc erâ bahac bâfuaperec irec okacne mi mac nâctezemec.
12 Go manatec kogoc moc neŋgoc bumaŋkonec ombâŋtâc fuaekac irec sâc mi ezejec.”
13 Iŋuc mume Mosezi Wofuŋ kecʒiŋuc muhuc wiracnewec: “O Anutu, go bâpiaŋkecmurâ numu‐garekopac.”
14 Wofuŋzi ine dâŋ ʒiŋuc bâtikiecnewec: “Mamac‐ticnezi ʒâŋe mainao tâfeckeme muzac ine mimiehuc juhame ʒoaŋ 7 tarazac. Irec teuŋ râpenao râepie hurâ juhame ʒoaŋ 7 tarazejec, tarame ine mocwâc ecnepie wefuzejec.”
15 Iŋuc mume jaŋe Miriam teuŋ râpenao râepie hurâ juhame ʒoaŋ 7 tarawec hâcne. Ehame ŋic ŋokac jaŋe hata ʒuhuckerâ mi rambiŋ.
16 Miriamzi teuŋko risie wefuwec irec faicnao ine Hazeroti hae mâreŋ beherâ raku Paraŋ mâreŋ burocnao fisirâ ŋec juc embiŋ.