18
Taha bapa â Lewiŋic jaŋere sâcmutâc gâcne
1 Eme Wofuŋzi Aroŋ ʒiŋuc âzâcnewec: “Furufic maŋnao bâbâsifuc moc fuame irec kiŋ i go â ŋokâfâcge erâ kikefuŋfâcge ŋoŋere faio fezejec, me taha gieo bâbâsifuc moc fuame irec kiŋ i iŋuc jaha ŋoŋe âsickenʒepieŋ.
2 Qomâfâcge, Lewiŋic guru, mamacgere kikefuŋ hâcne, jaŋe mana‐jaretec qâtec‐ŋoparâ, go â ŋokâfâcge ŋoŋe tiri bozeo taha gie bahuc juhapie kiŋaŋ qaŋarenʒepieŋ.
3 Jaŋe iŋuc ehuc tiri bozere kiŋaŋ gie gâcne wâc banʒepieŋ, mâc jaŋe mecne â ŋoŋe mecne mâmâc hâmonʒipiŋte alata â furuficte wâcwiac gâcne mi maickenʒepieŋ.
4 Jaŋe hâcne qâtec‐ŋoparâ tutumaŋ qoruc bozere wiac gâcne bahapie ŋic omane jaŋe moc mi siŋŋopanʒepieŋ.
5 Ehame ŋoŋe furufic â alatare gie bahuc juhapie kimbeŋ aariczi Israe ŋic jaŋere faio mocwâc mi fezejec.
6 Erâ manakic, no qomâfâcge, Lewiŋic hâcne, Israe ŋic gâcne jaŋeraonec rowosâec‐jopapo, jaŋe Wofuŋ nore biŋe erâ juhuc tutumaŋ qoruc bozere kiŋaŋ gie baniŋte ŋoŋe tahac‐ŋopapo.
7 Go â ŋokâfâcge ŋoŋe sawa ine alatao â tiri boze maŋnao taha gie banʒepieŋ, gie izi hâcne ŋoŋere biŋe ekac. Taha bapa gie i ŋoŋe hâcne tahac‐ŋopakopac. Ŋic omane moczi gie i bame qâhâmozo.”
8 Eme Wofuŋzi ʒuhuckerâ Aroŋ ʒiŋuc âzâcnewec: “Manakic, Israe ŋic jaŋe taha wiac sasawa bâtirihuc nare tahac eeŋgopieŋ irec tiwâne gâcne i gore biŋe qakopac. Go â ŋokâfâcge ŋoŋe mimiŋzi ɋâric wiac i nâ bac ehuc juniŋte qikiŋne‐ŋarekopac.
9 Wiac tirine kecʒiŋuc i ʒoczi mi ʒâtâcneha ŋoŋere biŋe ezejec: Nânâ wiaczi taha bâzi me sâqocne tâtâmire taha bâzi, me kiŋ tatara taha bâzi; taha bâzi wiac‐jeŋic sasawa hâcne nore biŋe râeŋgopieŋ i go â ŋokâfâcge ŋoŋe ŋare tahac epe ro rauc ehuc irec manapie tirine jâmbâŋ ezejec.
10 Ehame ŋoŋe tirificko juhuc nânʒepieŋ, ehuc irec manapie tirine eha ŋiczi sawa nânʒepieŋ.
11 Erâ wiac kecʒiŋuc izi wâc ŋoŋere biŋe ezejec: Israe ŋic jaŋe taha wiac fenʒoŋkeeŋgopieŋ i go â ŋokâfâcge ŋoŋere biŋe qape mimiŋzi ɋâric nâ bac erahuc junʒepieŋ. Wiacfâcge jaŋeraonec e me e ɋaɋacne juocmuzi nâzo murâ nâzejec.
12 Ehame wokemaŋ opâne me waiŋ opâne me padi wiac biaŋne jâmbâŋ me nânâ bâbâsu Wofuŋ nore biŋe qaeŋgopieŋ i go qikiŋne‐garekopac.
13 Erâ mâreŋ‐jeŋicko wiac nânâne sasawa fuŋkerâ woze qeuc eha Wofuŋ norao râeniŋmu i gore biŋe jaha; ehame wiacfâcge jaŋeraonec e me e ɋaɋacne juocmuzi nâzo murâ nâzejec.
14 Israe ŋic jaŋere ŋondeŋko wiac i me i Wofuŋte biŋe mupaŋkekicne izi gore biŋe jaha efârezejec.
15 Ŋic me qowi mârâc fufua sasawa Wofuŋ nore biŋe râeeŋgopieŋ i gore biŋe jaha ezejec; ehame ŋic mârâc fufua me qowi sâqocne mârâc fufua irec okacne ine moneŋ garepie rozemec.
16 Jaŋe mosa wâŋ bazupie iŋuc ehuc furi‐jeŋic siliwa moneŋ 5 rozemec. Ine furuficte moneŋ hawari fokac irec sâc hâcne rozemec. Gera moneŋ 20 izi ine siliwa moneŋ wâŋ ekac.
17 Bulimakao me lama me noniŋ mârâc fufua jaŋe tiri bozere biŋe eeŋgopieŋte akic‐jopahuc okacne moneŋ mi rozemec. Go socjeŋic alatao tierâ wokemaŋ‐jeŋic ʒocko rike siŋsiŋketec Wofuŋte maio âsu biaŋ fuazejec.
18 Ehame amec siec‐jeŋic fenʒoŋkekicne â ŋefac‐jeŋic gore biŋe eekac irec sâc jaha biuc‐jeŋiczi gore biŋe ezejec.
19 Israe ŋic jaŋe taha wiac tirine no nare tahac eeŋgopieŋ i go â ŋokâfâcge ŋoŋe tahac‐ŋopape ŋoŋere biŋe erâ forahuc juzejec. Wiac izi Wofuŋ nore maio ʒâʒâfic fofosanaŋ erâ go â ɋâricfâcge ŋoŋere biŋe fozejec.”
20 Wofuŋ e iŋuc muhuc ʒuhuckerâ Aroŋ ʒiŋuc âzâcnewec: “Go Israe ŋic mâreŋ‐jeŋicko merâfâc mâreŋ me jufu sesuc moc mi fua‐garezejec. Go jaŋere ŋondeŋko juhaŋtec noni hâcne merâfâc mâreŋ â jufu sesucge erâ jupemu.
21 “Israe ŋic jaŋe wiac sasawa irec teŋkonec wâŋ râeŋgopieŋ i Lewiŋic jaŋe tutumaŋ qoruc bozeo kiŋaŋ gie baeŋgopieŋte jaŋere biŋe eocte jarepo.
22 Israe ŋic jaŋe sâqocne âsickerâ hâmonʒipiŋte jefuhuc tutumaŋ qoruc boze maŋfuŋnao moc mi ranʒepieŋ.
23 Irec Lewiŋic jaŋe hâcne sâqocne‐jeŋic qâŋkerâ tutumaŋ qoruc bozeo kiŋaŋ qahuc junʒepieŋ. Sâcmutâc dâŋ izi ŋoŋerao mimiŋzi ɋâric forahuc juzejec. Ehame Lewiŋic jaŋe Israe ŋic jaŋere ŋondeŋko juhuc merâfâc mâreŋ moc mi bâfuanʒepieŋ.
24 Israe ŋic jaŋe wiac sasawa teŋkonec wâŋ Wofuŋ no nare tahac eeŋgopieŋ i Lewiŋic jaŋere biŋe eocte qikiŋne‐jarepo hâcne. Irec erâ jaŋere kecʒiŋuc mupo: Jaŋe Israe ŋic jaŋere ŋondeŋko juhuc merâfâc mâreŋ moc mi bâfuanʒepieŋ.
25 Eme Wofuŋzi Mose kecʒiŋuc âzâcnewec:
26 “Go Lewiŋic ʒiŋuc ʒuhuckerâ jazac: Ŋoŋe Israe ŋic jaŋe wiac teŋkonec wâŋ râepie ŋoŋere biŋe eocte qikiŋne‐ŋarepo irecnec teŋkonec wâŋ jaha Wofuŋ nore tiri taha eocte râenʒepieŋ.
27 Eme no taha wiac irec manape ŋaŋacne gieonec me waiŋ rowaŋ‐ŋeŋickonec râeŋgopieŋ ezejec.
28 Ŋoŋe Israe ŋic jaŋeraonec wiac teŋkonec wâŋ roeŋgopieŋ irecnec gâcne Wofuŋ no nare tahac enʒepieŋ, erâ nore taha i taha bapa Aroŋ râcnepie ere biŋe ezejec.
29 Wiac ŋareniŋmu sasawa irecnec Wofuŋ nore biŋe mukicne i nare tahac enʒepieŋ, ine wiac biaŋne jâmbâŋ irecnec bâtirihuc nore biŋe qanʒepieŋ.
30 Irec hâcne kecʒiŋuc jazazemec: ‘Ŋoŋe wiac biaŋne jâmbâŋ taha bâzire biŋe râepie ine manape Lewiŋic ŋaŋacne gieonec me waiŋ rowaŋ‐ŋeŋickonec râeŋgopieŋ ezejec.
31 Ehame ŋoŋe â kikefuŋfâc‐ŋeŋic ŋoŋe ira me ira nâzo murâ nânʒepieŋ, i tutumaŋ qoruc bozeo kiŋaŋ gie baeŋgopieŋ irec suanʒeŋ‐ŋeŋic ekac hâcne.
32 Ŋoŋe wiac biaŋne jâmbâŋ taha bâzire biŋe râehuc kiŋ moc mi hotâckeniŋmu. Ehuc Israe ŋic jaŋere wiac tirine mi hegâpâreniŋmu, erâ wâc mi hâmoniŋmu.’ ”