19
Ŋic wâwânâŋhec ekicne jaŋe ʒure ɋaɋac‐jopazo
1 Eme Wofuŋ e Mose â Aroŋ kecʒiŋuc jasawec:
2 “Wofuŋzi sâcmutâc dâŋte dâŋsanaŋ kecʒiŋuc muwec: Ŋohe Israe ŋic jazapire bulimakao biaŋne bâbâroŋzi sahac fâfâsac, erâ upenao kioŋ mi râekicne iŋucne moc noherao bafisinʒepieŋ.
3 Bafisipie taha bapa Eleaʒa râcnepire eki teuŋ râpenao jowa hume ere maio qâhâmonʒepieŋ.
4 Qâhâmopie taha bapa Eleaʒazi memotec‐ticne socko âke uruckerâ tutumaŋ qoruc boze maŋfuŋnao tieme arec 7 ezejec.
5 Eme eki honehame bulimakao sahac biuc‐ticne â socticne erâ hoticne i ʒocko râepie ʒazejec.
6 Ehame taha bapa e jâmâzâc jâc erâ wiac âsu biaŋ â muc bâbâroŋ rorâ bulimakao ʒakac ʒoc ira wâc beheme ʒazejec.
7 Taha bapa e iŋuc erâ ŋaqi wiac‐ticne ʒurehuc e jahacne wâc opâ ruarâ teuŋko risierâ wâwânâŋhec juhame hae ŋafezejec.
8 Â ŋic bulimakao ʒocko rikeocmu e wâc iŋuc jaha ŋaqi wiac‐ticne ʒurehuc e jahacne opâ ruarâ wâwânâŋhec jaha juhame hae ŋafezejec.
9 Ehame ŋic moc wâwânâŋ tâmiric juocmuzi bulimakao ʒafe‐ticne hezurâ teuŋ râpenao hae mâreŋ biaŋnao hoŋkezejec. Eme ʒafe i Israe kikefuŋ jaŋe opâhec bâsifuckepie sâqocne tâtâmire opâ eocte irec biŋe fozejec.
10 Â bulimakao ʒafe hezuocmu ŋic e iŋuc jaha ŋaqi wiac‐ticne ʒurerâ wâwânâŋhec juhame hae ŋafezejec. Dâŋ izi Israe ŋic â ŋic jabane ŋondeŋ‐jeŋicko jueŋgopieŋ jaŋere dâŋsanaŋ erâ forahuc juzejec.
11 “Ŋic moczi qâŋɋâŋ moc ba bâuac eocmu e wâwânâŋhec juhame ʒoaŋ gie bapa 7 tarazejec.
12 E ʒoaŋ gie bapa 3 â 7 ira sâqocne tâtâmire opâ ruarâ ɋaɋackezejec, me ʒoaŋ ira opâ i mi ruaocmu ine mi ɋaɋackeocmu.
13 Moc e ŋic hâmokicne jaŋere qâŋɋâŋ ba bâuac erâ opâ mi ruaocmu e Wofuŋte tiri boze wâwânâŋ ecneocmu, eme ŋic iŋucne e Israe kikefuŋkonec bâsirowezo. Wemocte? E sâqocne tâtâmire opâ mi ruawecte wâwânâŋhec jaha ʒuhuckerâ jukac hâcne.
14 “Ŋic moczi qoruc bozeo hâmome ine sâcmutâc dâŋ kecʒiŋuc fokac irec sâc enʒepieŋ. Boze ira juniŋmu me ira fisirâ raʒiniŋmu jaŋe wâwânâŋhec erâ juhapie ʒoaŋ 7 tarazejec.
15 Ehame boze ira kuʒi hapec wiac tapa tâmiric ŋeocmu i wâc iŋuc jaha wâwânâŋhec eocmu.
16 Me moc e ŋic ʒikazi qâhâmokicne, me qâŋɋâŋ moc, me ŋicsiec ba bâuac ehuc ʒâŋeruŋko rac warec eocmu e iŋuc jaha wâwânâŋhec juhame ʒoaŋ 7 tarazejec.
17 Wiac wâwânâŋhec iŋucnere ine sâqocne tâtâmire bâzi rikekicne irec ʒafe fiarâ râqâcko opâ ɋâricnehec bâsifuckenʒepieŋ.
18 Erâ ŋic moc wâwânâŋ tâmiric e ʒariŋ moc âsunehec irec tieŋne bazurâ opâ ira âke uruckerâ qoruc boze mecne, erâ kuʒi hapec â ŋic sasawa mecne, erâ ŋicsiec bâuambiŋ, me ʒikazi qâhâmoc‐jopakicne, me mâc hâmokicne ba bâuac ejarehuc ʒâŋeruŋko rac warec embiŋ jaŋe tieme rua‐jare‐fârezejec.
19 Ehuc wâwânâŋ tâmiriczi wâwânâŋhec jaŋe ʒoaŋ gie bapa 3 â 7 ira tieme rua‐jarezejec. Iŋuc hâcne ehuc ʒoaŋ 7 ira ʒure ɋaɋac‐jopazejec. Erâ ŋaqi wiac‐ticne ʒurerâ e jahacne wâc opâ ruarâ juha hae ŋafeme ɋaɋackezejec.
20 “Ŋic moc wâwânâŋhec juhuc ɋaɋackeocte giene mi baocmu e kikefuŋkonec bâsirowezo. E sâqocne tâtâmire opâ mi ruawecte wâwânâŋhec juhuc Wofuŋte furufic hegâpâreocmu.
21 Sâcmutâc dâŋ izi ine foŋare rahuc juzejec. Sâqocne tâtâmire opâ tieocmu ŋic e ŋaqi wiac‐ticne ʒurezejec, â sâqocne tâtâmire opâ bâuaocmu ŋic e wâwânâŋhec juha hae ŋafezejec.
22 Ŋic wâwânâŋheczi wiac i me i ba bâuac eme wâwânâŋhec jaha ezejec, ehame moc e wiac i bâuarâ iŋuc jaha wâwânâŋhec juha hae ŋafezejec.”