20
Opâ qânâonec wahawec
(Wah 17:1–7)
1 Eme Israe kikefuŋ sasawa jaŋe mosa wâŋko Ziŋ mâreŋ burocnao Kadesi haeo fisirâ ira ŋec juc embiŋ; ehame Miriam e ira hâmome duckembiŋ.
2 Eme kikefuŋ jaŋe mâreŋ irâ opâ basarâ tumaŋnehuc Mose â Aroŋ dâŋ mujactembiŋ.
3 Erâ Mosere aaric manahuc ʒiŋuc âzâcnembiŋ: “Qomâfâc‐nâŋe jaŋe Wofuŋte maio hâmombiŋkoa hâmonʒapeŋ me!
4 Wofuŋte kikefuŋ nâŋe â bulimakaofâc‐nâŋec mâreŋ burocnao ʒira hâmonaŋte wemocte jowac‐nâpo waremeŋ?
5 Erâ wemocte Aigita mâreŋkonec enâretec mâreŋ sâqocne ʒira warembeŋ? Mâreŋ ʒira padi jacgoŋ me jâmbo me waiŋ me jâcfâri gâcne sâcne mi fuaekac, erâ opâ wâc mi fokac.”
6 Iŋuc mupie Mose â Aroŋ jahe kikefuŋ behec‐joparâ tutumaŋ qoruc bozere motâcko rarâ mâreŋko hetutuckerâ fopic. Ehame Wofuŋte huriri qâreŋzi batamaec‐jofame
7 Wofuŋzi Mose ʒiŋuc âzâcnewec:
8 “Go gunuge rorâ kikefuŋ sasawa hetumaŋ‐joparâ hahacge Aroŋhec ŋohe ʒâŋe fai‐jeŋicko qânâ dâŋ âzâcnepire opâ wahame kikefuŋ jaŋe â bulimakaofâc‐jeŋic opâ gumec‐jopa‐fârezepirec.”
9 Eme Mose e Wofuŋzi mutâcnecnewec irec sâc eocte gunu‐ticne rowec.
10 Eme Mose â Aroŋ jahe kikefuŋ sasawa qânâ maŋfuŋko hetumaŋ‐jopa‐fârerâ Mosezi ʒiŋuc muhuc jazawec: “Ŋic râŋgeŋ qaŋqaŋne ŋoŋe mananiŋ! Nâhe sâcne ŋoŋere opâ qânâ ʒirecnec bâfua‐ŋarenacmu me?”
11 Mose e iŋuc muhuc meticne bafahararâ gunu‐ticnezi qânâ qame arec jajahec ewec; iŋuc eme opâ sâro sâko jâmbâŋ wahahuc domawec, eme kikefuŋ jaŋacne â bulimakaofâc‐jeŋic mâmâc nâfârembiŋ.
12 Eme Wofuŋzi Mose â Aroŋ ʒiŋuc jasawec: “Ŋohe wemocte Israe kikefuŋ jaŋere maio ʒâŋe‐nane bâtirihuc mi manasiŋnupirec? Irec erâ ŋohe kikefuŋ jaŋe mâreŋ biŋe qajarepo ira jowac‐joparâ sâcne mi ranicmu.”
13 Eme opâ irec ʒâŋe Meriba mumbiŋ, ira hâcne Israe kikefuŋ jaŋe Wofuŋ mana sâqorecnehapie eki tiri juju‐ticnere fuŋne jaŋerao bataniŋkewec.
Edom mâreŋ fotâcnezo mupie aka fua‐jarewec
14 Eme Mose e Kadesi haeo juhuc Edom ŋicwofuŋtao dâŋ ʒiŋuc râeme rawec: “Qomâfâcge Israe ŋic nâŋe ʒiŋuc muŋgopeneŋ: Ʒârâ hâriŋ maŋko juwefumbeŋ i go manaekic.
15 Mamacfâc‐nâŋec jaŋe Aigita mâreŋko hurâ ira dameŋ ʒora jumbiŋ; ehame Aigita ŋic jaŋe mamacfâc‐nâŋec jaŋe mecne â nâŋe mecne boc bomac‐nâpombiŋ.
16 Iŋuc epie Wofuŋ wira wâwâsic ecnepene dâŋnâŋec manarâ aŋelo‐ticne moc soreme eki Aigita mâreŋkonec jowac‐nâpo wefume gore mâreŋ qaŋeŋnao Kadesi haeo warembeŋ juŋgopeneŋ.
17 Irec mana‐nârehaŋ mâreŋge fotâcnenaŋte muŋgopeneŋ. Nâŋe giegaŋ me waiŋ gie‐ŋeŋic mi fotâcnenaŋmu, erâ opâ nombâŋ forakac irecnec opâ nanaŋte wâc mi manasuŋgopeneŋ; nâŋe fâreopec me qanaopec mâcne, hata sâkooa rahuc juku mâreŋge fotâcnenaŋte muŋgopeneŋ hâcne.”
18 Edom ŋicwofuŋzi ine ʒiŋuc muwec: “Ŋoŋe mâreŋ‐nane moc mi fotâcnerâ ranʒepieŋ, sifu raniŋmuo ine râsi eŋarehuc ʒikazi ŋopa jâpec eŋarenaŋmu.”
19 Iŋuc mume Israe ŋic jaŋe dâŋ ʒiŋuc bâtikiecnembiŋ: “Nâŋe hata sâko sawa bâjâperâ ranaŋmu, ehuc nâŋe nâŋâcne mecne bulimakaofâc‐nâŋec mecne nâŋe opâ wiacge moc nanaŋmuo ine furine râenaŋmu, nâŋe mana‐nârehaŋ mâreŋge mâc fotâcnerâ ranaŋte muŋgopeneŋ.”
20 Edom ŋicwofuŋ eki ine dâŋ kecʒiŋuc bâtikie‐jarewec: “Aricne, ŋoŋe mi fotâcnenʒepieŋ.” Ŋicwofuŋ e iŋuc murâ momorifâc‐ticne bocjaha rocjopame haeonec wahambiŋ.
21 Edom ŋic jaŋe iŋuc ehuc Israe ŋic jaŋe mâreŋ‐jeŋic fotâcnenʒipiŋte aka hejarembiŋ. Iŋuc epie Israe ŋic jaŋe behec‐joparâ hata kizurâ rambiŋ.
Aroŋ Hora tikio hâmowec
22 Eme Israe kikefuŋ jaŋe ʒeŋgoma Kadesi hae beherâ raku Hora tikio fisimbiŋ.
23 Eme tiki ira fisipie Wofuŋzi Edom mâreŋ qaŋeŋnao Mose â Aroŋ ʒiŋuc jasawec:
24 “Aroŋ e ʒira apafâc‐ticne qâtec‐jopahuc hâmozejec. Ŋohe Meriba opâo dâŋ ŋasapo i qatarapicte e Israe ŋic mâreŋ biŋe qajarepo ira mi raʒizejec.
25 Irec go Aroŋ â ŋokâ‐ticne Hora tikio jowac‐jofa fezemec.
26 Ferâ Aroŋ gie ŋaqi wiac‐ticne hetararâ ŋokâ‐ticne Eleaʒa hecnetec huzejec. Aroŋ e ira hâcne apafâc‐ticne jaŋe qâtec‐joparâ hâmozejec.”
27 Eme Mose e Wofuŋzi dâŋ âzâcne mutâc ewec irec sâcko ehuc kikefuŋ jaŋere ʒâŋe faio jowac‐jofame tikio fembiŋ.
28 Fe fisirâ Mosezi Aroŋte ŋaqi hetararâ ŋokâ‐ticne Eleaʒa hecneme huwec. Ehame Aroŋ e tiki botâŋnao ira hâmowec. Hâmome Mose â Eleaʒa jahe tikionec wahapic.
29 Aroŋ hâmowec, Israe kikefuŋ jaŋe biŋe iŋuc manarâ Aroŋte ki busâqoc ehuc juhapie ʒoaŋ gie bapa 30 tarawec.