28
Ʒoaŋ sâc taha bâzi ririke irec dâŋ
(Wah 29:38–46)
1 Eme Wofuŋzi Mose dâŋ kecʒiŋuc âzâcnewec:
2 “Go Israe ŋic ʒiŋuc mutâcne‐jarezemec: ‘Nore taha bâzi rikepie âsu biaŋ fuaekac i dameŋ mupaŋkekicnao rike râec enʒepieŋ.’
3 Erâ ʒiŋuc wâc ʒuhuckerâ jazazemec: Ŋoŋe wiac kecʒiŋuc rorâ Wofuŋte bâzi rikenʒepieŋ: Lama ŋicne biaŋne jajahec jara‐jekic wâŋ ekicne i ʒoaŋne ʒoaŋne rikec‐jofahuc junʒepieŋ.
4 Moc i furicte â moc i owâcne rikenʒepieŋ.
5 Ehuc taha bâzire wiac kecʒiŋuc wâc ʒuhuckerâ râenʒepieŋ: Poroŋ uucne i oto moc irecnec teŋkonec wâŋ rorâ wokemaŋhec bâsifuckenʒepieŋ. Wokemaŋ ine fifia râqâc moc irecnec 4‐onec wâŋ irec sâc ronʒepieŋ.
6 Taha bâzi iŋucne hâcne ʒoaŋ sâc rikehuc juniŋte Sinai tiki mâreŋko fuŋkerâ rikepie Wofuŋte maio âsu biaŋ fua jujec.
7 Lama mocko ine waiŋ taha bâzi fifia râqâc moc irecnec 4‐onec wâŋ irec sâc ʒuhuckenʒepieŋ, ehuc waiŋ izi Wofuŋte bâzi eocte tirificko hoŋkenʒepieŋ.
8 Â lama moc ine hae owâeme rikenʒepieŋ, ehuc furicte taha bâzi â waiŋ bâzi rike râec eeŋgopieŋ irec sâc jaha rikepie Wofuŋte maio âsu biaŋ fuazejec.
Sabata hombaŋko â mosa sâc taha bâzi rârâe
9 “Sabata hombaŋko ira ine lama ŋicne biaŋne jajahec jara‐jekic wâŋ ekicne, erâ poroŋ uucne oto moc irecnec teŋkonec 2 wokemaŋhec bâsifuckekicne, erâ waiŋ taha bâzi i mâmâc râenʒepieŋ.
10 Sabata hombaŋ sâc wiac iŋuc hâcne ʒoaŋ sâc taha bâzi rikeeŋgopieŋ ira ʒuhuckerâ rike râec enʒepieŋ.
11 “Mosa fufuŋkenao ira wiac kecʒiŋuc i Wofuŋte bâzi rikenʒepieŋ: Bulimakao ŋicnezi motecne jajahec, lama sokakicne ŋicne moc erâ lama ŋicnezi motecne 7 jara‐jeŋic wâŋ ekicne.
12 Erâ bulimakao rikeniŋmu sâc ira taha bâzire biŋe poroŋ uucne oto moc irecnec teŋkonec 3 wokemaŋhec bâsifuckekicne i mâmâc râezo. Ehuc lama ŋicne ira taha bâzire biŋe wiac kecʒiŋuc ʒuhuckerâ râezo: Poroŋ uucne oto moc irecnec teŋkonec 2 wokemaŋhec bâsifuckekicne.
13 Erâ lama sasawa jaŋerao taha bâzire biŋe poroŋ uucne oto moc irecnec teŋkonec wâŋ wokemaŋhec bâsifuckekicne râenʒepieŋ. Wiac i sasawa rikepie Wofuŋte maio âsu biaŋ fuazejec.
14 Waiŋ taha bâzi ine kecʒiŋuc râenʒepieŋ: Bulimakao mocte sâc ine fifia râqâc moc irec nâfocne, lama ŋicnere sâc ine fifia râqâc moc irecnec 3‐onec wâŋ â lama motecnere ine fifia râqâc moc irecnec 4‐onec wâŋ. Jara mocte maŋnao mosa sâc taha bâzi wiac iŋuc hâcne râehuc junʒepieŋ.
15 Ehuc sâqocne tâtâmire bâzire biŋe noniŋ ŋicne moc Wofuŋ rikecnenʒepieŋ, noniŋ i taha bâzi â waiŋ bâzi rike râec eeŋgopieŋ ira hâcne ʒuhuckenʒepieŋ.
Hombaŋ mupaŋkekicne ira taha bâzi rârâe
(Tah 23:1–44)
16 “Mosa wâŋ irec ʒoaŋ gie bapa 14 ira Wofuŋte aakic hombaŋ ŋenʒepieŋ.
17 Erâ mosa irec ʒoaŋ gie bapa 15 ira ine tiwâ bâzi hombaŋ fuazejec. Ira hâcne fuŋkerâ poroŋ goreŋ tâmiric nâhuc juhapie ʒoaŋ gie bapa 7 tarazejec.
18 Ʒoaŋ namba wâŋ ira tiri bozeo tumaŋnehuc gie moc mi banʒepieŋ.
19 Ehuc Wofuŋ qowi bâzi kecʒiŋuc rikecnenʒepieŋ: Bulimakao ŋicnezi motecne jajahec, erâ lama ŋicne sokakicne moc, erâ lama ŋicnezi motecne 7 jara‐jeŋic wâŋ ekicne, erâ qowi râeniŋmu i qowi biaŋne sasawa râe‐fârenʒepieŋ.
20 Ehuc qowi i jaŋerao taha bâzire biŋe poroŋ uucne waiŋhec bâsifuckekicne kecʒiŋuc râenʒepieŋ: Bulimakao moc ira oto moc irecnec teŋkonec 3 ʒuhuckenʒepieŋ. Lama ŋicne moc ira oto moc irecnec teŋkonec 2,
21 â lama motecne 7 ru sâc jaŋerao ine oto moc irecnec teŋkonec wâŋ ʒuhuckenʒepieŋ.
22 Erâ kiwiric‐ŋeŋic roniŋte sâqocne tâtâmire tahare biŋe noniŋ ŋicne moc rikenʒepieŋ wâc.
23 Furic sâc qowi bâzi rikehuc jueŋgopieŋ ira ʒuhuckerâ wiac i hâcne rike râec enʒepieŋ.
24 Ŋoŋe ʒoaŋ gie bapa 7 ira iŋuc hâcne ehuc taha bâzi wiac rikepie Wofuŋte maio âsu biaŋ fuazejec. Wiac i ʒoaŋ sâc taha bâzi â waiŋ bâzi rike râec eeŋgopieŋ ira hâcne ʒuhuckerâ rikenʒepieŋ.
25 Ʒoaŋ gie bapa 7 ira ine tiri bozeo tumaŋnehuc gie wiac moc mi banʒepieŋ.
26 “Mâc nânâ bâbâsu ʒoaŋ ira ŋoŋe padi wiac nâsuniŋmu â woka irec maŋnao Wofuŋ taha bâzi rikecnehuc irec hombaŋ ŋeniŋmu ira tiri bozeo tumaŋnenʒepieŋ. Ehuc gie wiac moc mi banʒepieŋ.
27 Mâc qowi bâzi kecʒiŋuc rikepie Wofuŋte maio âsu biaŋ fuazejec: Bulimakao ŋicnezi motecne jajahec, â lama ŋicne sokakicne moc, erâ lama ŋicnezi motecne 7 jara‐jeŋic wâŋ ekicne.
28 Ehuc qowi i jaŋerao taha bâzire poroŋ uucne waiŋhec bâsifuckekicne kecʒiŋuc râenʒepieŋ: Bulimakao buc buc ira oto moc irecnec teŋkonec 3 ʒuhuckenʒepieŋ. Lama ŋicne moc ira oto moc irecnec teŋkonec 2
29 â lama motecne 7 ru sâc jaŋerao oto moc irecnec teŋkonec wâŋ ʒuhuckenʒepieŋ.
30 Erâ kiwiric‐ŋeŋic roniŋte ine noniŋ ŋicne moc rikenʒepieŋ wâc.
31 Ʒoaŋ sâc qowi bâzi â taha bâzi gâcne rike râec eeŋgopieŋ ira wiac i â waiŋ taha bâzi ʒuhuckenʒepieŋ. Erâ qowi râeniŋmu i qowi biaŋne sasawa râe‐fârenʒepieŋ.