29
Hombaŋko taha bâzi rârâe irec dâŋ jaha
1 “Mosa 7 irec ʒoaŋ gie bapa wâŋ ira tiri bozeo tumaŋnehuc gie wiac moc mi banʒepieŋ. Ŋoŋe ʒoaŋ ira hâcne qeŋ qahuc domanʒepieŋ.
2 Ehuc qowi bâzi wiac kecʒiŋuc rikepie Wofuŋte maio âsu biaŋ fuazejec: Bulimakao ŋicnezi motecne moc â lama ŋicne sokakicne moc erâ lama ŋicnezi motecne biaŋne 7 jara‐jeŋic wâŋ ekicne.
3 Ehuc qowi i jaŋerao taha bâzire poroŋ uucne wokemaŋhec bâsifuckekicne kecʒiŋuc râenʒepieŋ: Bulimakao ira oto moc irecnec teŋkonec 3 ʒuhuckenʒepieŋ. Lama ŋicne ira oto moc irecnec teŋkonec 2
4 â lama motecne 7 ru sâc jaŋerao oto moc irecnec teŋkonec wâŋ ʒuhuckenʒepieŋ.
5 Erâ kiwiric‐ŋeŋic roniŋte sâqocne tâtâmire tahare biŋe noniŋ ŋicne moc rikenʒepieŋ wâc.
6 Mosare qowi bâzi â taha bâzi‐ticne gâcne, â ʒoaŋ sâc irec qowi bâzi â taha bâzi‐ticne erâ waiŋ taha bâzi rike râec eniŋte mutâcne‐jarekicne ijaha wiac i wâc ʒuhuckerâ rikepie Wofuŋte maio âsu biaŋ fuazejec.
7 “Mosa 7 irec ʒoaŋ gie bapa 10 ira sowa juhuc tiri bozeo tumaŋnenʒepieŋ, ehuc ʒoaŋ ira gie wiac moc mi banʒepieŋ.
8 Ŋoŋe ira qowi bâzi wiac kecʒiŋuc rikepie Wofuŋte maio âsu biaŋ fuazejec: Bulimakao ŋicnezi motecne moc â lama ŋicne sokakicne moc erâ lama ŋicnezi motecne 7 jara‐jeŋic wâŋ ekicne. Qowi râec‐jopaniŋmu jaŋe biaŋne sasawa râec‐jopanʒepieŋ.
9 Ehuc qowi jaŋerao taha bâzire poroŋ uucne wokemaŋhec bâsifuckekicne kecʒiŋuc râenʒepieŋ: Bulimakao ira oto moc irecnec teŋkonec 3 ʒuhuckenʒepieŋ. Lama ŋicne ira oto moc irecnec teŋkonec 2
10 erâ lama motecne 7 ru sâc jaŋerao oto moc irecnec teŋkonec wâŋ ʒuhuckenʒepieŋ.
11 Erâ kiwiric rorore sâqocne tâtâmire taha â ʒoaŋ sâc irec qowi bâzi â taha bâzi‐ticne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
12 “Mosa 7 irec ʒoaŋ gie bapa 15 ira gie moc mi bahuc tiri bozeo tumaŋnenʒepieŋ, erâ Wofuŋte erâ hombaŋ ŋehuc juhapie ʒoaŋ 7 tarazejec.
13 Ŋoŋe ʒoaŋ ira qowi bâzi wiac kecʒiŋuc rikepie Wofuŋte maio âsu biaŋ fuazejec: Bulimakao ŋicnezi motecne 13 â lama ŋicne sokakicne 2 erâ lama ŋicnezi motecne 14 jara‐jeŋic wâŋ ekicne. Jaŋe biaŋne sasawa râec‐jopanʒepieŋ.
14 Ehuc qowi jaŋere taha bâzire poroŋ uucne wokemaŋhec bâsifuckekicne kecʒiŋuc râenʒepieŋ: Bulimakao ru sâc ira oto moc irecnec teŋkonec 3 ʒuhuckenʒepieŋ. Lama ŋicne 2 ru sâc ira oto moc irecnec teŋkonec 2
15 erâ lama motecne 14 ru sâc ira oto moc irecnec teŋkonec wâŋ ʒuhuckenʒepieŋ.
16 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
17 “Ʒoaŋ gie bapa 2 ira ine bulimakao ŋicnezi motecne 12 â lama ŋicne sokakicne 2 erâ lama ŋicnezi motecne biaŋne 14 jara‐jeŋic wâŋ ekicne rike râec enʒepieŋ.
18 Ehuc bulimakao mecne, lama ŋicne mecne, â lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
19 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
20 “Ʒoaŋ gie bapa 3 ira bulimakao 11 â lama ŋicne sokakicne 2 erâ lama ŋicnezi motecne biaŋne 14 jara‐jeŋic wâŋ ekicne i rike râec enʒepieŋ.
21 Ehuc bulimakao mecne, lama ŋicne mecne, â lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
22 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
23 “Ʒoaŋ gie bapa 4 ira bulimakao 10 â lama ŋicne sokakicne 2 erâ lama ŋicnezi motecne biaŋne 14 jara‐jeŋic wâŋ ekicne rike râec enʒepieŋ.
24 Ehuc bulimakao mecne, lama ŋicne mecne â lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
25 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
26 “Ʒoaŋ gie bapa 5 ira bulimakao 9 â lama ŋicne sokakicne 2 erâ lama ŋicnezi motecne biaŋne 14 jara‐jeŋic wâŋ ekicne i rike râec enʒepieŋ.
27 Ehuc bulimakao mecne, lama ŋicne mecne, erâ lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
28 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
29 “Ʒoaŋ gie bapa 6 ira bulimakao 8 â lama ŋicne sokakicne 2 erâ lama ŋicnezi motecne biaŋne 14 jara‐jeŋic wâŋ ekicne i rike râec enʒepieŋ.
30 Ehuc bulimakao mecne, lama ŋicne mecne â lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
31 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
32 “Ʒoaŋ gie bapa 7 ira bulimakao 7 â lama ŋicne sokakicne 2 erâ lama ŋicnezi motecne biaŋne 14 jara‐jeŋic wâŋ ekicne i rike râec enʒepieŋ.
33 Ehuc bulimakao mecne, lama ŋicne mecne â lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
34 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
35 “Ʒoaŋ gie bapa 8 ira gie i me i moc mi bahuc tiri bozeoa tumaŋnenʒepieŋ.
36 Ehuc ine qowi taha bâzi kecʒiŋuc rikepie Wofuŋte maio âsu biaŋ fuazejec: Bulimakao moc â lama ŋicne sokakicne moc erâ lama ŋicnezi motecne biaŋne 7.
37 Ehuc bulimakao mecne, lama ŋicne mecne â lama motecne ʒare‐jeŋic manasuhuc taha bâzire poroŋ uucne â waiŋ taha bâzi mukicne irec sâc ʒuhuckerâ râenʒepieŋ.
38 Erâ ʒoaŋ sâc qowi bâzi â taha bâzi‐ticne gâcne erâ waiŋ taha bâzi rike râec eeŋgopieŋ ijaha noniŋ ŋicne moc sâqocne tâtâmire tahare biŋe ʒuhuckerâ râenʒepieŋ wâc.
39 “Bâzi wiac iŋuc hâcne hombaŋ‐ŋeŋic mupaŋkekicnao Wofuŋ rikecnenʒepieŋ. Erâ i qowi bâzi mecne, taha bâzi mecne, waiŋ bâzi mecne, erâ wama bâzi mumupaŋ‐ŋeŋicte erâ me buafec faio rike râec eniŋmu ira hâcne ʒuhuckerâ râenʒepieŋ.”
40 Eme Mose e Wofuŋzi dâŋ mutâcnecnewec i Israe ŋic ŋokac jaza‐fârewec.