32
Rubeŋ, Gade â Manase jaŋere ɋâricfâc jaŋe Jordaŋ opâ ocniŋucnao ŋec juc embiŋ
(Sâc 3:12–22)
1 Rubeŋ â Gade jahere ɋâricfâc jaŋere bulimakao guru sâko jumbiŋ. Ehame jaŋe Jazere â Gileade mâreŋ honepie bulimakao jaŋe jujunere sâc ewec.
2 Jaŋe iŋuc honerâ Mose â taha bapa Eleaʒa erâ kikefuŋ jaŋerao fisirâ ʒiŋuc jazambiŋ:
3 “Ataroti, Diboŋ, Jazere, Nimira, Hesiboŋ, Eleale, Sebem, Nebo â Beoŋ mâreŋ
4 i bulimakao jaŋe jujunere sâc jâmbâŋ; mâreŋ i hâcne Wofuŋzi Israe ŋic nâŋâcne maio ima bawec. Kiŋaŋŋicfâc‐ŋeŋic nâŋe ine bulimakaofâc‐nâŋec bocjaha.”
5 Jaŋe iŋuc murâ ʒuhuckerâ ʒiŋuc mumbiŋ: “Ŋoŋe nâŋere manapie sâckekacko ine mâreŋ muŋgopeneŋ i kiŋaŋŋicfâc‐ŋeŋic nâŋe nârepie ro rauc erâ Jordaŋ ocniŋucnao mi ranʒepeneŋ.”
6 Iŋuc mupie Mosezi ʒiŋuc jazawec: “Hâc, ŋoŋe qomâfâc‐ŋeŋic ʒikao buc rahapie ʒira ŋezo muŋgopieŋ me?
7 Ŋoŋe wemocte Wofuŋzi Israe ŋic mâreŋ jarezo mukac i ocniŋucnao raʒirâ mi roniŋte mu bawahac ejareŋgopieŋ?
8 Mamacfâc‐ŋeŋic jaŋe mâreŋ hone tâcneniŋte Kadesi‐Baranea haeonec sorec‐jopape mâsi ijaha embiŋ.
9 Jaŋe Esikola wâneŋko ferâ mâreŋ honehuc, ine Wofuŋzi mâreŋ jareocte muwec ira Israe ŋic jaŋe mi raniŋte mu bawahac ejarembiŋ.
10 Irec Wofuŋ e ʒoaŋ ira aaricke sâqoreme dâŋ kecʒiŋuc mupaŋkewec:
11 ‘Aigita mâreŋkonec wahambiŋ, jara‐jeŋic 20‐o domarâ fekac, ŋic i jaŋeraonec moczi moc Abraham, Isaka â Jakobo mâreŋ jarepemurâ mupaŋkepo ira moc mi raʒi‐jâmbâŋkezejec; jaŋe norao mi qohota sanaŋkembiŋ irec.
12 Mâc Keniʒi ŋic Jefune ere ŋokâ Kalebe â Nuŋte ŋokâ Josua jahe sawa norao qohota sanaŋkepicte raʒinicmu.’
13 Eme Wofuŋ e Israe ŋic jaŋere aaricke sâqoreha ejareme mâreŋ burocnao juhapie jara 40 tarame Wofuŋte maio hehesic bâfuambiŋ ŋic i jaŋe hâmo sipiric efârembiŋ.
14 Erâ manaŋgopieŋ, ŋoŋe ŋicguru sâqoc qaqocnezi mamacfâc‐ŋeŋic jaŋere âkehoc Wofuŋ maŋbâiŋ ecnepie Israe ŋic jaŋere mocwâc aaricke sâqore‐jâmbâŋkeocte faharembiŋ.
15 Ŋoŋe e râpeckehuc mi bâjâpeniŋmuo ine Israe ŋic jaŋe ejareme mâreŋ burocnao jaha ʒuhuckerâ juku hâmo sipiric efâreniŋmu hâcne.”
16 Iŋuc jazame jaŋe maŋfuŋnao rarâ ʒiŋuc âzâcnembiŋ: “Naŋe mâreŋ ʒira lama bulimakaofâc‐nâŋec jaŋere sapa bahuc ŋokac naru motecfâc‐nâŋec jaŋere fic hae sawa banaŋmu.
17 Ŋic nâŋe nâŋâc ine sându maro rorâ Israe ŋic bânie‐jarehuc, mâreŋ ro rauc eniŋmu ira râec‐jopahapene ŋokac naru motecfâc‐nâŋec jaŋe mâreŋ rune jaŋere erâ hae basanaŋkekicnao ŋenʒepieŋ.
18 Nâŋe hae mâreŋ‐nâŋecko mi risiehapene Israe ŋic jaŋe ru sâc merâfâc mâreŋ‐jeŋic rauckenʒepieŋ.
19 Nâŋere merâfâc mâreŋ i Jordaŋ opâ ʒiŋucnao ʒoaŋ wewefunaopec fokacte mâreŋ Jordaŋ ocniŋucnao me ʒuhuckerâ forakac i ro rauc mi enaŋmu.”
20 Jaŋe Mose iŋuc âzâcnepie kecʒiŋuc jazawec: “Ŋoŋe iŋuc ejâmbâŋkehuc Wofuŋte maio ʒikare ʒawieniŋmu
21 erâ ʒikare ʒawiekicne sasawa ŋoŋe Wofuŋte maio Jordaŋ fotâcnerâ râsifâc‐ŋeŋic jopa jâpec ejarehuc
22 mâreŋ‐jeŋic jowac roniŋmuo ine risierâ Wofuŋte maio me Israe ŋic jaŋere maio kiŋ tâmiric eniŋmu, ehuc Wofuŋte maio mâreŋ ʒi ro rauc epie ŋoŋere biŋe ezejec.
23 Iŋuc mi eniŋmuo ine Wofuŋ bunao bahuc sâqocne bâfuapie sâqocnere okacne fua‐ŋare‐jâmbâŋkeocmu.
24 Irec ʒi naru motecfâc‐ŋeŋic jaŋere fic hae mecne â lamafâc‐ŋeŋic jaŋere sapa i mâmâc baniŋ, ehuc dâŋ mupaŋkembiŋ irec fârine wâc bâfuaniŋ.”
25 Eme Rubeŋ â Gade jahere ɋâricfâc jaŋe Mose ʒiŋuc âzâcnembiŋ: “Kiŋaŋŋicfâcge nâŋe dâŋ nâzâ mutâc ekomec irec sâc enaŋmu hâcne.
26 Ŋokac naru motecfâc‐nâŋec mecne â lama bulimakaofâc‐nâŋec jaŋe mâmâc Gileade mâreŋko hae ŋerakac ira ŋec juc efârenʒepieŋ.
27 Kiŋaŋŋicfâcge nâŋe ine ʒeŋgoma sându maro rorâ Wofuŋte maio opâ fotâcnerâ ʒikao ranaŋmu. Bomboŋ‐nâŋec goki dâŋ mutâcne‐nârekomec irec sâc enaŋmu hâcne.”
28 Iŋuc mupie Mosezi jaŋere erâ taha bapa Eleaʒa â Nuŋte ŋokâ Josua erâ Israe ŋic gurune gurune garikiŋfâc‐jeŋic jaŋere micnefâc mumutâc dâŋ jaza mutâc ewec.
29 Ehuc kecʒiŋuc muwec: “Gade â Rubeŋ jahere ɋâricfâc jaŋe ru sâc Wofuŋte maio ʒikare ʒawierâ ŋoŋehec Jordaŋ opâ fotâcnerâ bânie‐ŋarehuc mâreŋ getâckepie ŋoŋere biŋe eha Gileade mâreŋ jarepie ro rauc enʒepieŋ.
30 Me ŋoŋehec ʒikao rahuc opâ mi fotâcneniŋmuo ine ŋondeŋ‐ŋeŋicko Kanaaŋ mâreŋ gâcne ro rauc enʒepieŋ.”
31 Iŋuc mume Gade â Rubeŋ jahere ɋâricfâc jaŋe dâŋ ʒiŋuc bâtikiecnembiŋ: “Wofuŋzi kiŋaŋŋicfâcge nâŋe dâŋ nâza mutâc ewec irec sâc enʒepeneŋ.
32 Nâŋe sându maro rorâ Wofuŋte maio opâ fotâcnerâ Kanaaŋ mâreŋko raʒinʒepeneŋ, ehame merâfâc mâreŋ‐nâŋeczi ine Jordaŋ opâ ʒiŋucnao fozejec.”
33 Eme Mose e Amori ŋicwofuŋ Sihoŋ â Basaŋ ŋicwofuŋ Ogo jahere uucmaŋ irec maŋnao hae mâreŋ forawec i Gade â Rubeŋ jahere ɋâricfâc erâ Josefere ŋokâ Manase ere ɋâricfâc dâkâne jaŋe jare‐fârewec.
34 Eme Gadere ɋâricfâc jaŋe hae kecʒiŋuc barambiŋ: Diboŋ, Ataroti, Aroe,
35 Ataroti‐Sofaŋ, Jazere, Jobeha,
36 Bete‐Nimira erâ Bete‐Haraŋ. Hae i hae sanaŋne â lamafâc‐jeŋic jaŋere sapa hâcne.
37 Rubeŋte ɋâricfâc jaŋe ine hae kecʒiŋuc barambiŋ: Hesiboŋ, Eleale, Kiriataim,
38 Nebo, Baali‐Meoŋ (hae i jaŋere ʒâŋe moc mukicne) erâ Sibema. Hae barambiŋ jaŋere ʒâŋe iŋuc hâcne mumbiŋ.
39 Manasere ŋokâ Makiri ere ɋâricfâc jaŋe Gileade mâreŋ ro rauc ehuc Amori ŋic mâreŋ rune jopa jâpec ejarembiŋ.
40 Ehame Mose e Gileade hae mâreŋ Manasere ŋokâ Makiri ere ɋâricfâc jareme jaŋe ira ŋec juc embiŋ.
41 Eme Manasere ŋokâ moc ʒâŋene Jairi ere ɋâricfâc jaŋe ine Amori ŋic jaŋere hae boze wiac gâcne ro rauc ehuc ʒâŋe‐jeŋic Jairi ere hae boze iŋuc mumbiŋ.
42 Erâ Nobare garikiŋfâc jaŋe ine rarâ Kenati hae sâko â hae piticfâc‐ticne ro rauc ehuc ʒâŋene Noba jaha mumbiŋ.