8
Aroŋzi lambe biric‐jopawec
1 Wiac tara‐fâreme Wofuŋzi Mose kecʒiŋuc âzâcnewec:
2 “Aroŋ ʒiŋuc âzâcnec: Go lambe jaŋe birio hecjopatec mai jaha ŋehuc tamaenʒepieŋ.”
3 Eme Aroŋ e Wofuŋzi Mose mutâcnecnewec irec sâc ehuc lambezi mai jaha ŋehuc tamaeniŋte biric‐jopawec.
4 Lambe dodoma i gol hedapirekicnezi bakicne; fuŋnaonec feku tieŋnao tarakac wiac‐ticne i sasawa gol hedapirekicnezi bafârekicne; Wofuŋzi Mose âzâcne jâutuc ewec irec sâc lambe dodoma bawec hâcne.
Lewiŋic kiŋaŋ giere rowosâec‐jopakicne
5 Eme Wofuŋzi Mose kecʒiŋuc âzâcnewec:
6 “Go Israe ŋic jaŋere ŋondeŋkonec Lewiŋic rowosâec‐joparâ ʒure ɋaɋac‐jopazemec.
7 Wiac kecʒiŋuc hâcne ejarehuc ʒure ɋaɋac‐jopazemec: Sâqocne tâtâmire opâ rua‐jarehuc ejaretec jaŋe sahac ʒâwâ‐jeŋic resazi hefârerâ ŋaqi wiac‐jeŋic â mesahac‐jeŋic ʒure emasaŋ enʒepieŋ.
8 Iŋuc erâ bulimakao ŋicnezi motecne moc â taha bâzire biŋe poroŋ uucne wokemaŋ opâhec bâsifuckekicne i ronʒepieŋ. Ehame goki bulimakao ŋicnezi motecne moc sâqocne tâtâmire tahare biŋe rozemec.
9 Ehuc Lewiŋic tutumaŋ qoruc bozere motâcko râec‐jopahuc Israe kikefuŋ furu jaha hetumaŋ‐jopazemec.
10 Iŋuc ejarehuc Wofuŋte maio râec‐jopahaŋtec Israe ŋic jaŋe mejeŋic Lewiŋic jaŋere qizecko râe‐fârenʒepieŋ.
11 Ehame Aroŋzi Israe ŋic jaŋere taha, Lewiŋic hâcne, Wofuŋte maio râec‐jopame Wofuŋte kiŋaŋ gie bahuc junʒepieŋ.
12 Eme Lewiŋic jaŋe mejeŋic bulimakao qizecko râepie kiwiricjeŋic rozore bulimakao moc i sâqocne tâtâmire tahare biŋe â moc ine qowi bâzire biŋe Wofuŋ rikecnezemec.
13 Iŋuc erâ Lewiŋic jaŋe Aroŋ â ŋokâfâcne jaŋere maio râec‐jopatec Wofuŋte taha fuŋmoc enʒepieŋ.
14 “Go iŋuc ehuc Lewiŋic Israe ŋic jaŋere ŋondeŋkonec rowosâec‐jopatec nore biŋe erâ junʒepieŋ.
15 Irec faicnao ine ʒure ɋaɋac‐joparâ nore maio râec‐jopatec tutumaŋ qoruc bozeo raʒirâ kiŋaŋ gie‐jeŋic fuŋkenʒepieŋ.
16 Jaŋe hâcne nore biŋe Israe ŋic jaŋere ŋondeŋkonec rowosâec‐jopapo. Israe ŋic jaŋere mârâc fufua sasawa irec okacne Lewiŋic hâcne nore biŋe erâ juniŋte rowosâec‐jopapo.
17 Israe ŋic jaŋere mârâc fufua ŋic me qowi jaŋe nore biŋe sasawa; no Aigita mâreŋko mârâc fufua qâhâmoc‐jopa‐fârepo dameŋ ira hâcne rowosâec‐jopapo.
18 No Israe ŋic jaŋere mârâc motecfâc jaŋere âkehoc Lewiŋic rowosâec‐jopapo.
19 Ehuc Israe ŋic jaŋere taha, Lewiŋic hâcne, Aroŋ â ŋokâfâcne jaŋerao râec‐jopapo. Jaŋe tutumaŋ qoruc bozeo Israe ŋic jaŋere erâ kiŋaŋ gie bahuc kiwiric‐jeŋic roniŋte iŋuc ejarepo. Jaŋe iŋuc epie Israe ŋic jaŋe furufic maickehapie wiac hâhâwicne mi fua‐jarezejec.”
20 Mose â Aroŋ erâ Israe kikefuŋ sasawa jaŋe Wofuŋzi Mose mutâcnecnewec irec sâc Lewiŋic ejarehuc mutiric‐jopambiŋ.
21 Eme Lewiŋic jaŋe sâqocne tâtâmire opâ ruahuc ŋaqi‐jeŋic ʒure bâpiaŋ embiŋ. Ehame Aroŋzi Wofuŋte maio râec‐jopahuc ɋaɋackeniŋte kiwiric‐jeŋic rowec.
22 Eme irec faicnao Lewiŋic jaŋe Aroŋ â ŋokâfâcne jaŋe hone soŋaŋ ejarehapie kiŋaŋ gie‐jeŋic fuŋkerâ baniŋte tutumaŋ qoruc bozeo raʒimbiŋ. Wofuŋzi Lewiŋic jaŋere dâŋ Mose mutâcnecnewec irec sâc hâcne ejarembiŋ.
Lewiŋic jaŋere gie dameŋ
23 Eme Wofuŋzi Mose kecʒiŋuc âzâcnewec:
24 “Lewiŋic jaŋere dâŋ ʒiŋuc fokac: Ŋic jara‐jeŋic 25‐ko domarâ fekac jaŋe hâcne tutumaŋ qoruc bozeo kiŋaŋ gie banʒepieŋ.
25 Jara‐jeŋic 50 bazurâ ine kiŋaŋ gie i râerâ mâc junʒepieŋ.
26 Mâc qomâfâc‐jeŋic tutumaŋ qoruc bozeo gie baeŋgopieŋ jaŋe bafic‐jopazo murâ bafic‐jopanʒepieŋ, jaŋe jaŋac gie mocwâc ruckerâ bapa ine mi enʒepieŋ. Go Lewiŋic giedâŋ mujarehuc iŋuc jazazemec.”