9
Aakic hombaŋ ŋeŋe irec dâŋ
1 Israe ŋic jaŋe Aigita mâreŋkonec waharâ juhapie jara 2 irec mosa 1 maickeme Wofuŋzi Sinai mâreŋ burocnao Mose kecʒiŋuc muhuc âzâcnewec:
2 “Israe ŋic jaŋe dameŋ mukicnao aakic hombaŋ ŋenʒepieŋ.
3 Mosa ʒirec ʒoaŋ gie bapa 14 ira hae owâeme dameŋ mukicne ira ŋenʒepieŋ; dâŋsanaŋ â mumutâc dâŋticne fokac irec sâcko hâcne ŋenʒepieŋ.”
4 Iŋuc âzâcneme Mosezi Israe ŋic jaŋe aakic hombaŋ ŋeniŋte jazawec.
5 Eme jaŋe mosa 1 irec ʒoaŋ gie bapa 14 ira hae owâeme Sinai mâreŋ burocnao aakic hombaŋ ŋembiŋ. Israe ŋic jaŋe Wofuŋzi Mose dâŋ âzâcne mutâc ewec irec sâc efârembiŋ hâcne.
6 Ehame ŋic gâcne jaŋe ŋicqâŋɋâŋ ba bâuac ehuc wâwânâŋhec embiŋte ʒoaŋ ira aakic hombaŋ ŋeniŋte quŋkembiŋ. Ehuc ʒoaŋ ijaha Mose â Aroŋ jaherao fuarâ
7 Mose ʒiŋuc âzâcnembiŋ: “Nâŋe qâŋɋâŋ bâuarâ wâwânâŋhec embeŋ. Eme irec erâ wemocte dameŋ bakicne ira Israe ŋic jaŋehec juhuc Wofuŋ taha bacnenaŋte muac‐nâpokicne?”
8 Iŋuc mupie Mosezi ʒiŋuc jazawec: “Ŋoŋe behehapie, no Wofuŋzi ŋoŋere dâŋ weniŋuc nazame manarâ ŋazapemu.”
9 Wofuŋzi Mose kecʒiŋuc âzâcnewec:
10 “Go Israe ŋic ʒiŋuc jazac: Ŋoŋeraonec me ɋâricfâc‐ŋeŋic jaŋeraonec moczi qâŋɋâŋ moc bâuahuc wâwânâŋhec eocmu me mâreŋ ʒoricko ra juocmu e sifu Wofuŋte manasuhuc aakic hombaŋ ŋezejec.
11 Jaŋe mosa 2 irec ʒoaŋ gie bapa 14 ira hae owâeme ŋenʒepieŋ, ehuc aakic lama i poroŋ goreŋ tâmiric â monʒaŋ hâtâne ihec nânʒepieŋ.
12 Ehuc tiwâne moc mi behepie foha hae furezejec, â siecne wâc mi qazunʒepieŋ. Aakic hombaŋte dâŋsanaŋ fokac irec sâc efârehuc ŋenʒepieŋ.
13 Me ŋic moc e wâwânâŋ tâmiric juhuc hombaŋ mi ŋeocmu me mâreŋ ʒoricko wâc mi raocmuzi sifu aakic hombaŋ mi ŋeocmu e ŋic âgofâcne jaŋere ŋondeŋkonec bâsirowezo. E dameŋ mukicnao Wofuŋ taha mi bacnewecte iŋuc hâcne ecnezo, ehame kiŋticnere okacne fisicnezejec.
14 Me ŋic furune moczi ŋoŋehec juhuc Wofuŋte manasuhuc aakic hombaŋ ŋezo murâ ine aakic hombaŋte dâŋsanaŋ â mumutâc dâŋ fokac irec sâc ŋezejec. Ŋaŋacne mecne â ŋic furune jaŋe mecne ŋoŋere dâŋsanaŋ mocjaha fozejec.”
Karoraczi tiri boze qofackewec
(Wah 40:34–38)
15 Tiri boze bafârembiŋ ʒoaŋ ira karoraczi tiri boze, sâcmutâc dâŋte tiri boze hâcne i qofackewec, eme hae ŋafeme ʒocbâruŋ iŋucne tamaehuc domaha hae furewec.
16 Eme iŋuc hâcne ʒuhuckerâ fua‐jare jujec, ʒoaŋko karoraczi boze mâc qofacke jujec â ŋafeo ine ʒocbâruŋ iŋucne tamae jujec.
17 Ehuc karorac e qoruc bozeonec fahare feme sâc Israe ŋic jaŋe hata fuŋkerâ rajumbieŋ, me karoraczi waha boze qofackeme sâc Israe ŋic jaŋe teuŋ âterâ ŋejumbieŋ.
18 Jaŋe Wofuŋte micte hata rajumbieŋ â Wofuŋte micte jaha teuŋ âterâ ŋejumbieŋ, ehuc karoraczi boze qofacke jujec sâc teuŋko ŋec foc ejumbieŋ.
19 Ehame karoraczi tiri bozeo waharâ dameŋ ʒora qofackerâ ŋeme Israe ŋic jaŋe Wofuŋte dâŋ reŋkehuc mocwâc mi rajumbieŋ.
20 Dameŋ gâcnao ine karoraczi tiri bozeo waharâ ʒoaŋ jahec mac sawa qofackerâ ŋeme jaŋe Wofuŋte mic reŋkehuc ijaha ŋejumbieŋ. Erâ Wofuŋte dâŋ jaha reŋkehuc mocwâc ʒuhuckerâ rajumbieŋ.
21 Dameŋ gâcnao ine karoraczi tiri bozeo waha ŋeha hae fure jujec. Hae fureme mocwâc fahare feme ŋic jaŋe hata‐jeŋic ʒuhuckerâ rajumbieŋ. Me ŋafe ʒoaŋ moc ʒuhuckerâ ŋeku fahareme ŋic jaŋe ʒuhuckerâ rajumbieŋ wâc.
22 Me karorac e ʒoaŋ gie bapa jajahec, me mosa moc, me mosa moc jâuruhuc dameŋ ʒoʒoricne ŋeme ŋic jaŋe iŋuc jaha ʒuhuckerâ mi rahuc ŋejumbieŋ. Izi ine mocwâc fahare feme ʒuhuckerâ rajumbieŋ.
23 Ine hâcne, jaŋe Wofuŋte micte teuŋ âterâ ŋec foc ejumbieŋ, erâ wâc Wofuŋte micte jaha hata rajumbieŋ. Wofuŋzi Mose dâŋ âzâcne mutâc ewec i reŋkehuc iŋuc efârembiŋ hâcne.