11
1 Ŋemâc bâbâfuare sâc sâcti qâtiri bajueŋgopieŋ ŋic i jaŋe Wofuŋzi qaisoc‐jopaekac, â ŋemâc bâbâfuare sâc sâckoa bajueŋgopieŋ jaŋere ine maname sâckeekac.
2 Ŋic sahac fefe jueŋgopieŋ jaŋe mimi qaqa ejarehuc bawahac‐jopaekac, â ŋic maŋhuhuŋ jueŋgopieŋ jaŋe ine maŋɋârâŋ bâfua‐jareekac.
3 Ŋic biaŋne jaŋe siocmâc juju‐jeŋiczi jowa qataŋ ejareekac, ŋic otec keŋgoŋne jaŋe ine eeatuc‐jeŋiczi bâsirowec‐jopaekac.
4 Moneŋ mafazi dameŋ sâkoo sâcne mi ŋezic‐nâpoocmu, siocmâc juju‐nâŋeczi ine hâmockonec batarac‐nâpoocmu.
5 Nâŋâc siocmâc junaŋmuo ine juju‐nâŋec fâretiŋ jaha foocmu, ŋic sindaŋne jaŋe ine jaŋacne jujuzi bawahac‐jopaocmu.
6 Ŋic siocmâc jaŋe tiŋne juju‐jeŋiczi ŋezic‐jopaekac, â doc bapa ŋic jaŋe ine eeatuc‐jeŋiczi bitiŋ ejareha ira raʒipie kicjopaekac.
7 Ŋic sindaŋne jaŋe hâmohapie woworic‐jeŋiczi wâc omaeocmu, moneŋ mafao roweckehuc juju izi fâri tâmiric eocmu hâcne.
8 Ŋic tiŋne jaŋe ʒârâ hâriŋkonec batarac‐jopazo, ehuc jaŋere okacne ŋic sindaŋne ʒârâ hâriŋko râec‐jopazo.
9 Ŋic hehesicne jaŋere dâŋzi ŋic âgofâc‐jeŋic sipiric‐jopaekac, â ŋic tiŋne jaŋere maŋɋârâŋ dâŋzi ine bafic‐jopaekac.
10 Ŋic tiŋne jaŋe hae maŋnao juhâc qâhâmohapie ʒeri bubiaŋ fuarâ foekac, ehame ŋic sindaŋne jaŋe hâmopie ʒeri ehuc kiwac qawac eeŋgopieŋ.
11 Hae moc irec maŋnao ŋic jaŋe tiŋne juhapie hae irec ʒâŋe biŋe faharehuc foekac, ŋic sindaŋne jaŋere dâŋzi ine hae bâsâqoreekac.
12 Ŋic maŋ mamanasu tâmiriczi ŋic âgo‐ticne manacneme wawahane eha râpedâŋ ecneekac, â ŋic mamana taraheczi ine dâŋemâc juekac.
13 Gupe baekac ŋic e dâŋ moc âzâcnehuc mic muac ecneeŋgopeneŋ i kosa mutaniŋkeekac, â ŋic aki metânezi ine maŋticnao râeme foekac.
14 Ŋicguru moc jaŋe guriŋ bapa tâmiric juniŋmuo ine siŋsaŋ qahuc sipiricke‐fâreniŋmu, mumutâc ŋic bocjaha jujarepie ine sâcne juniŋmu.
15 Ŋic furune jaŋe tofa‐jeŋic bazunaŋte numu‐nârepie bafic‐jopahuc busâqoc bâfuanʒipeŋte biac mi mupaŋkenʒepeneŋ, irec moc e wiac iŋucnere mumupaŋ dâŋ mi muocmuzi sâcne juocmu.
16 Ŋokac biaŋnere manapene fefene eekac, â ŋokac iriŋ biriŋnere ine manapene wawahane eekac. Ŋic otec ɋeticnezi moneŋ mafa moc mi bâfuaocmu, ŋic ʒoɋacheczi ine mafa mâririhec eocmu.
17 Ŋic maŋjauŋheczi ŋic gâcne bafic‐jopahuc e jahacne sahac bafickeocmu, â moc e ine ŋic âgofâcne bâʒâic‐jopahuc e jahacne sahac bâʒâickeocmu.
18 Ŋic sindaŋne jaŋe wiac fârine moc mi hureeŋgopieŋ, â wiac tiŋne ebac eeŋgopieŋ jaŋe ine irec fârine biaŋne jaha bâfuaeŋgopieŋ.
19 Ŋic moc e wiac tiŋne jaha ebac eocte sanaŋkeocmu e juhâmoocmu, â moc e sâqocne bâfuaocte ʒoɋac eocmu eki ine hâmo‐jâmbâŋkeocmu.
20 Wofuŋ e ŋic maŋʒoc‐jeŋichec jaŋe qaisoc‐jopaekac, â maŋ ɋaɋacne jueŋgopieŋ jaŋere ine maname biaŋkeekac.
21 Go ʒiŋuc manapaŋkec: Ŋic hehesicne jaŋe okacne fua‐jareocmu, ŋic tiŋne â ɋâricfâc‐jeŋic jaŋe ine juhâc qâhâmoniŋmu.
22 Ŋokac sahac hawari biaŋzi mimi jaŋgeŋ juekac e, golzi finʒuŋ bakicne i bec masunao râepene foipieha sifu mâreŋ suahuc sohoŋ ruaekac irec sâc eekac.
23 Ŋic tiŋnere woworic gie i raku bibiaŋkoa fisiocmu, ŋic sindaŋnere wosaŋeŋ gie raku kimbeŋ sanaŋ bâfuaocmu.
24 Ŋic gâcne jaŋe moneŋ‐jeŋic mi sakarehuc boki bapie moneŋ mafa sifu ʒuhuckerâ fua‐jareekac, â ŋic gâcne jaŋe ine sakarehuc sifu kitac qatac erâ jueŋgopieŋ.
25 Ŋic moc e wiac‐ticne buafec jaha qikiŋneme sifu fofo dunduŋ fuarâ focneocmu, â ŋic moc e ŋic âgofâcne bafic‐jopame jaŋe wâc iŋuc jaha bafickeniŋmu.
26 Ŋic moc e padi jacgoŋ‐ticne furi fekicne roocte sakareme sâweckeniŋmu, â moc e ine furi wahakicne i hone‐bipiehuc sifu furi bajareme mumbiaŋkeniŋmu.
27 Moc e wiac biaŋnere gie baocte henʒiriŋneocmu ere manapie biaŋkeocmu, â moc e gie hehesicne baocmu ere faio ine hehesic jaha feocmu.
28 Moneŋ mafa‐jeŋicko roweckeniŋmu ŋic i jaŋe jâcrehac mârâŋkerâ wahaekac irec sâc waha jopaocmu, â ŋic tiŋne jaŋe ine jâcrehac fie ruruckeekac irec sâc eniŋmu.
29 Ŋic moc e wiacfâcne ʒârâ hâriŋ bâfua‐jareocmu e wiac biaŋne moc mi bâfuaocmu, â ŋic mutuc matacne jaŋe ŋic maŋɋârâŋhec jaŋere kiŋaŋ qaqa erâ juniŋmu.
30 Ŋic moc e tiŋne juocmuzi irec fârine juju hotâckeocmu, â ŋic moc e ʒâʒâicne juocmuzi ine juju‐ticne sipirickeocmu.
31 Ŋic tiŋne jaŋe juju‐jeŋicte fârine mâreŋko roniŋmuo ine ŋic sindaŋne â hehesicne jaŋe juju‐jeŋicte fârine wâc rojâmbâŋkeniŋmu.