12
1 Ŋic moc e mamana tarahec juocmuzi mu bâtiŋ ecnepie maname biaŋkeocmu, â ŋic mutuc matacnezi ine mu bâtiŋ qikiŋneocmu.
2 Wofuŋ e gie biaŋne hone aŋac ejareekac, â ŋic wiac hehesicne mana biric eeŋgopieŋ jaŋe ine mana gâpâre‐jareekac.
3 Ŋic moc e wiac sindaŋne eocmuzi sâcne qiŋ herâ mi domaocmu, ŋic tiŋne jaŋe ine tie farane mi eniŋmu.
4 Ŋonâŋ biaŋnezi ŋowe‐ticnere eridu tinac eekac, â ŋokac moc e ŋowe‐ticne mimi qaqa ecneocmuzi ine, umbeŋzi ŋic siec‐ticne nâekac irec sâc eocmu.
5 Ŋic tiŋne jaŋe dâŋ biaŋne maŋkerâ jueŋgopieŋ, ŋic sindaŋne jaŋe ine eeatuc dâŋ sawa nâzâeŋgopieŋ.
6 Ŋic sindaŋne jaŋere dâŋ izi ʒika iŋucne ŋic bâʒâic‐jopaekac, â ŋic tiŋne jaŋere dâŋzi ine ŋic ʒâic busâqoc faio juhapie bafic‐jopaekac.
7 Ŋic sindaŋne jaŋe waha jopame omaeniŋmu, â ŋic tiŋne jaŋe ine mimiŋzi ɋâric jufehuc juniŋmu.
8 Ŋoŋe mamanahec jupie ŋic jaŋe mumbiaŋ‐ŋopaniŋmu, â mutuc matacne juhapie ine mana wahac‐ŋopaniŋmu.
9 Ŋic moc e maŋhuhuŋ juhuc nânâre hâmozacte gie bame biaŋkeocmu, â ŋic moc e ine ʒâŋe biŋe‐ticne sawa feocte manasuhuc ojoŋ juocmuzi nânâre hâmoocmu.
10 Ŋic biaŋne jaŋe qowifâc‐jeŋic aijakic jaha hone maiŋ ejareniŋmu, â ŋic sindaŋne jaŋe ine hone qâoma ejareniŋmu.
11 Ŋic moc e ʒoɋachec jaha hesarac gie baocmuzi nânâ sâcne bâfuaocmu, â ŋic moc e mutuc erâ qâoma juocmuzi ine roroc qaŋqaŋne juocmu.
12 Ŋic sindaŋne jaŋe wiac hehesicne sawa eniŋte maŋkeeŋgopieŋ, â ŋic tiŋne jaŋe ine sanaŋkerâ domaniŋte manasueŋgopieŋ.
13 Ŋic sindaŋne e jahacne dâŋzi bitiŋ ecneha raʒime kiocmu, â ŋic siocmâc eki ine ʒârâ hâriŋko mi feocmu.
14 Ŋic moc e miczi dâŋ muekac irec sâcko wiac roekac, â moc e mezi gie baekac irec sâc jaha wiac roekac.
15 Ŋic mutuc matacne e jahacne maname sâckeekac, â ŋic maŋɋârâŋheczi ine ŋic gâcne jaŋere dâŋ manaekac.
16 Ŋic mutucnezi maŋʒoc‐ticnere fuŋne onʒoŋ jaha bataniŋkeekac, ŋic mamanahec musoriŋkepie ine mamana sâqoc biac mi bâfuaekac.
17 Ŋic sioc tâmiriczi dâŋ fârine sawa muekac, â burecŋiczi ine eeatuc dâŋ muekac.
18 Ŋic maŋʒochec ere dâŋzi ʒika iŋucne kicnâpoekac, â ŋic maŋɋârâŋhec ere dâŋzi ine âgo bacnâpoekac.
19 Jâmbomac dâŋzi forahuc juocmu sanaŋ, â burecdâŋzi ine biac omaeocmu.
20 Wiac hehesicne mana biric eeŋgopieŋ jaŋere maŋko eeatuc foekac, â wiac biaŋne mana biric eeŋgopieŋ jaŋe ine bubiaŋ bâfuaeŋgopieŋ.
21 Ŋic tiŋne jaŋe wiac hâhâwicne mi fua‐jareekac, â ŋic sindaŋne jaŋe ine ʒârâ ʒâpâ faio boc feeŋgopieŋ.
22 Wofuŋ e burecŋic jaŋere maname mamakâcne eekac, â ŋic sioc tâmiric jaŋere ine maname biaŋkeekac.
23 Ŋic maŋɋârâŋhec jaŋe mamana‐jeŋic boc mi mutaniŋkeeŋgopieŋ, â ŋic mutucne jaŋe ine mutuc‐jeŋicte fuŋne musokaeŋgopieŋ.
24 Ŋic moc e gie ʒoɋachec baocmuzi ʒâŋe biŋehec erâ guriŋ bapa ŋic juocmu, â moc e ine ojoŋ juocmuzi kiŋaŋ gie sawa bahuc juocmu.
25 Mana mezac ee izi ŋic maŋnâŋec bawahaekac, â âgodâŋzi ine bubiaŋ bâfua‐nâreekac.
26 Ŋic tiŋne jaŋe sâqocne wisecneeŋgopieŋ, â ŋic sindaŋne jaŋe ine hata hehesicnao rahuc qâsorieeŋgopieŋ.
27 Ŋic ojoŋnezi wiac irec me irec ecneme sâcne mi bâfuaocmu, â ŋic moczi gie ʒoɋachec baocmu e ine wiac fofo dunduŋ fuarâ focneocmu.
28 Ŋic moc e siocmâc juocmuzi jujure hatao raocmu, â moc e ine sindaŋ hârindaŋ eocmuzi hâmocte hatao raocmu.