13
1 Motec maŋɋârâŋhec e mamacnezi mu bâtiŋ ecneme dâŋticne manaocmu, â motec ʒaubacnezi ine dâŋticnere takickeme qikiŋneocmu.
2 Ŋic biaŋne jaŋe dâŋjeŋicte fârine biaŋne jaha roeŋgopieŋ, â ŋic eeatucne jaŋe ine bâbâʒâic gie baniŋte boc ejareekac.
3 Ŋic moc e micticne soŋaŋkeocmuzi juju‐ticne ŋezickeocmu, â moc e ine manabâc mi ehuc dâŋ kosa muocmuzi juju‐ticne sipirickeocmu.
4 Ŋic ojoŋnezi wiac irec me irec boc ecneha sifu mi bâfuaocmu, â ŋic moc e gie ʒoɋachec baocmuzi ine wiac irec me irec ecneocmu sâc bâfuaocmu.
5 Ŋic siocmâc jaŋe burecdâŋ qaisockeeŋgopieŋ, â ŋic sindaŋne jaŋe wiac mu bac epie miminehec â mamakâcne eekac.
6 Tiŋne jujuzi ŋic bahacmâc ŋezic‐jopaekac, sâqocnezi ine ŋic sindaŋne bawahac‐jopaekac.
7 Ŋic hapetac gâcne jaŋe ŋic moneŋ mafa sâkohec jaŋere hawari eeŋgopieŋ, â ŋic mafa mâririhec gâcne jaŋe wiac‐jeŋic foipieha sifu ŋic hapetac jaŋere hawari jueŋgopieŋ.
8 Ŋic moneŋ mafa sâkoheczi juju‐ticne ŋezickeocte afeckerâ kiwiric‐ticne râeocmu, â ŋic hapetaczi ine iŋuc eocte eipieocmu.
9 Ŋic tiŋne jaŋe lambe tatamac sâko iŋucne, â ŋic sindaŋne jaŋe ine lambe tatamac gâkowaekac irec sâc.
10 Ŋic ʒaubacne jaŋe bahac fuŋne fuŋne bâfuaeŋgopieŋ, â ŋic maŋɋârâŋhec jaŋe ine ŋic âgofâc‐jeŋic dâŋko bafic‐jopaniŋte ejareekac.
11 Gie fâro faio sawa bahuc moneŋ mafa bâfuaeŋgopeneŋ i biac mocwâc omaeekac, â gie sâko aijakic jaha bahuc bâfuanaŋmuo ine ʒuhuckerâ fua‐nâreocmu.
12 Mamanac juju‐nâŋeczi fârimâc eme maŋnâŋec wahaocmu, â wiac mocte enâreha fârine fuame mamanac‐nâŋeczi soka ŋedâmârec eocmu.
13 Ŋic moc e Anuture dâŋ fâri hândâŋne qâsuaocmuzi okacne roocmu, â moc e Anuture sâcmutâc dâŋ araŋ bacneocmuzi ine sâcne juocmu.
14 Ŋic maŋɋârâŋhec jaŋere mu qaqazuc dâŋ izi jujure opâ ʒâŋe iŋucne, dâŋ izi hâcne hâmocte bitiŋko fenʒipeŋte hecke‐nâreekac.
15 Ŋic mamanahec jaŋere manapene fefene eekac, doc bapa ŋic jaŋe ine hâmoc sanaŋte hatao raeŋgopieŋ.
16 Ŋic maŋɋârâŋheczi gie i me i moc baocte qanaŋ mamanasu gie baocmu, â ŋic mutuc matacnezi ine iŋuc moc mi ehuc mutuc‐ticnere fuŋne bataniŋkeocmu.
17 Biŋe mumu ŋic hehesicnezi wiac hâhâwicne bâfuaekac, â kiŋaŋŋic biaŋnezi ine wamadâŋ bafisiekac.
18 Ŋic moc e giedâŋ biaŋne qikiŋneocmuzi ŋic hapetac â wawahane eocmu, â moc e mu bâtiŋ dâŋ mana rereŋ eme ine ere manapene fefene eocmu.
19 Wiac irec me irec aŋac‐nâpome fârine bâfuarâ bubiaŋ manaeŋgopeneŋ, ŋic mutucne jaŋe ine wiac hehesicne râpeckeniŋte takic‐jopaekac.
20 Ŋic moc e ŋic maŋɋârâŋhec qâtec‐joparâ juhuc maŋɋârâŋhec jaha eocmu, â ŋic mutuc matacne âgo ejarehuc ine sipirickeocmu.
21 Sâqocne bapa jaŋe okacne rorozi kikeo kikeo ejareekac, â ŋic tiŋne jaŋe ine katucne jujuhâmo roeŋgopieŋ.
22 Ŋic biaŋnere moneŋ mafa izi naru motec ŋosafâc‐ticne jaŋere biŋe eocmu, â sâqocne bapa jaŋere moneŋ mafazi ine ŋic tiŋne jaŋere biŋe eocmu.
23 Ŋic hapetac jaŋere nânâ wiac i mâreŋ furunao bocjaha fuazac, mâc ŋic hehesicne jaŋe mâreŋ irec aka hejarembiŋ.
24 Go ŋokâge qaisockehuc qa bâtiŋ mi ecnecmu, maŋzi jauŋkehuc ine qa bâtiŋ sâcne ecnecmu.
25 Ŋic tiŋne jaŋe nânâ wiac moc mi basaeŋgopieŋ, â ŋic sindaŋne jaŋe ine nânâ âmbâŋ nâipiehuc dameŋ sâc nânâre hâmoeŋgopieŋ.