17
1 Nânâ gukuckekicne i wama faio nâhuc sifu irec manapene fefene ezejec, â sisi hâhâŋ faio tiwâ bâzi nânâ irec ine manapene wawahane ezejec.
2 Kiŋaŋ qaqa maŋɋârâŋheczi bomboŋ‐ticnere ŋokâ hehesicne mu bâtiŋ ecnehuc sâcne bawahaocmu, e iŋuc erâ motec ere hahac ɋafâc jaŋere sâc jaha wâc ehuc merâfâc wiac rauckeocmu.
3 Ŋic jaŋe gol â siliwa wiac i ʒocko rike esâic epie wosâeekac irec sâc jaha Anutuzi ŋic maŋnâŋec ba esâic eekac.
4 Ŋic hehesicne jaŋe dâŋ hehesicnere hazec râeeŋgopieŋ, â burecŋic jaŋe dâŋ sisipirichec i mana rereŋ eeŋgopieŋ.
5 Ŋic moc e ŋic hapetac moc mu âke sisic ecneocmuzi Mamac bâbâfua‐ticne e wâc mâmâc ecneocmu, â moc e ŋic âgo‐ticne wiac hâhâwicne moc fuacneme honerâ bubiaŋ manaocmuzi ine bâbâtiŋte biŋe eocmu.
6 Ŋic mocte motecfâc jaŋe mamac‐jeŋicte manapie fefene eekac, irec sâc jaha ŋicqizec jaŋe ŋosafâc‐jeŋic jaŋere manapie fefene wâc eekac.
7 Ŋic mutuc matacne jaŋe dâŋ fârine mupie boc mi biaŋkeekac, â ŋic fekicne jaŋe burecdâŋ mupie sâqore‐jâmbâŋkeekac.
8 Ŋic gâcne jaŋe bâbâmiriŋ moneŋte manapie qaŋgec tinac eha izi gie i me i bazo murâ sâcne baocmu.
9 Ŋic jaŋe âgo egareniŋte manasukicko ine wiac esâqore‐garembiŋ irec kiŋ behe‐jarezemec. Jaŋe wiac egarembiŋ irec dâŋ i giŋkeme giŋ murahuc jutecne âgo ʒuʒuhuc‐ŋeŋic i tâcne‐fâreocmu.
10 Ŋic mamanahec e arec mocjaha sawa mu bâtiŋ ecnepene mana‐hâmoocmu, â ŋic mutuc matacne e ine arec 100 qa bâtiŋ ecnepene sifu mi manaocmu.
11 Wiac hâhâwicnere qaqafeŋ gie baniŋmu ŋic hehesicne i jaŋerao hâmoczi hata kiŋaŋ ʒocnehec raeŋgopeneŋ irec sâc fisiocmu.
12 Qowi mimicne ʒâŋene bea e motecfâcne jâoc rofârepie momori eha sifu jâuruzo murâ sâcne jâurunaŋmu mecne, â ŋic mutucne maŋsifuc‐ticnehec ere ine hâwic‐nâpo‐jâmbâŋkeme wisecnenʒepeneŋ.
13 Ŋic jaŋe wiac biaŋne eŋarehapie okacne wiac hehesicne bâtikie‐jareniŋmuo ine hehesiczi ficmaŋ‐ŋeŋicko mi omaeocmu.
14 Dâŋ fuŋkerâ muhuc mu qaqatarac ee i opâ kanaŋ hehapene hawec fuaekac irec sâc ekac, irec dâŋ fuŋkehuc izia mocwâc behezo.
15 Wofuŋ e ŋic sindaŋne mumbiaŋ‐jopaeŋgopieŋ jaŋere mecne, â ŋic tiŋne musâqorec‐jopaeŋgopieŋ jaŋere mâmâc maname mamakâcne eekac.
16 Ŋic moc e mamana tâmiric mutuc matacne juekaczi mamana roocte moneŋ beheme wemo fârine moc fuacneocmu?
17 Ŋic ââgo eeŋgopieŋzi maŋjauŋ eec eeŋgopieŋ, â qoqomâ jueŋgopieŋ jaŋe wiac ŋemâcne i babaficko de âsic eeŋgopieŋ.
18 Ŋic moc e maŋ mamanasu tâmiric juocmuzi mutuc erâ ŋic âgo‐ticnere tofa bazuocte mupaŋkeocmu.
19 Ŋic moc e mu qaqataracte aŋac bajuocmuzi sâqocnere aŋackeocmu, â moc e sahac fefe dâŋ muekaczi ʒârâ hâriŋ hefâreocmu.
20 Ŋic moc e maŋ mamanasu‐ticne sâqocne foha wiac ebac eme sifu mi biaŋkeocmu, â moc e dâŋ simbiŋne muhuc juocmuzi sisipiric bâfuaocmu.
21 Motec moc e wiac mutucne ebac eekaczi mamac‐ticne ʒâic busâqoc sawa bâfuacneekac.
22 Bubiaŋ faio juju izi nârâ bibiaŋ iŋucne erâ basanaŋ‐nâpohuc bâpiaŋ‐nâpoekac, â busâqoc faio juju izi ine tâpiri‐nâŋec bawahaekac.
23 Mumutara ŋic hehesicne jaŋe soŋsoŋko bâbâmiriŋ moneŋ rohuc dâŋgieo dâŋ muhasickeeŋgopieŋ.
24 Ŋic mamanaheczi wiac biaŋne ebac eocte mana tara‐fâreekac, â ŋic mamana tâmiric eki ine hata basaekac.
25 Motec mutuc matacne e mamac‐ticne ʒâic busâqoc bâfuacnehuc neŋgoc roro‐ticne iŋuc jaha ʒâic fâro bâfuacneekac.
26 Ŋic tiŋne jaŋe sahac taha moneŋ râeniŋte mujarepene mi sâckeocmu, â ŋic biaŋne jaŋe ʒika kiniŋte mupene sâqore‐jâmbâŋkeocmu.
27 Ŋic mamana taraheczi dâŋ bocjaha kosa mi muocmu, â ŋic maŋ mamanasuheczi maŋwamahec juocmu.
28 Ŋic mutuc matacnezi dâŋ moc mi muhuc mâc niniŋkerâ ŋeocmu ere wâc manapene mamana â maŋɋârâŋhec jukac eocmu.