18
1 Ŋic moc e ŋic gâcne âgo mi ejareocmuzi e jahacne sawa manasuhuc juocmu, ehuc ŋic gâcne jaŋe wiac irec me irec manapie sâckeha eki maname sâqoreocmu.
2 Ŋic mutucnezi wiac mana taraekac me mâcne irec manabâc mi eekac, ehuc e jahacne maŋko dâŋ fokac i sawa manaekac.
3 Ŋic moczi wiac sindaŋne eocmu ere faio mimi busâqoc feocmu, ehame ʒâŋe biŋe‐ticne omaeme mu âke sisic ecneniŋmu.
4 Ŋic gâcne jaŋere mickonec dâŋ wahaekac i manapene maŋɋârâŋte fuŋɋizecne ehuc opâ ʒâkâŋ ɋârâŋne â opâ fifisine irec sâc tinac eekac.
5 Ŋic sindaŋne âgo ejarehuc ŋic bahacmâc jaŋere dâŋ muhasickepene mi sâckeocmu.
6 Ŋic mutuc matacnezi fuŋkerâ dâŋ mu qaqatarac ehuc ʒika hotâckeocmu.
7 Ŋic mutuc matacnezi dâŋ muhuc juju‐ticne sipirickeekac, e jahacne dâŋzi bitiŋ ecneha raʒime kiekac hâcne.
8 Ŋic nâŋâc gupe micko âkec dâŋ irec manapene aŋacne eha maŋnâŋecko râepene hurâ foekac.
9 Ŋic ojoŋ juekac â ŋic wiac ima baekac jahe sâcjekic mocjaha.
10 Anuture dâŋ i huec sanaŋ iŋucne, irec ŋic tiŋnezi ira ferâ wamao sâcne ŋec foc eocmu.
11 Ŋic gâcne jaŋe moneŋ mafa wiac‐jeŋicte manapie haesac sanaŋ ʒoricne irec sâc ehuc ŋezic‐nâpokac tinac eekac.
12 Ŋic maŋhuhuŋ jueŋgopieŋ jaŋere manapene fefene eekac, â ŋic pepec penaroŋhec jaŋe ine sisipiricte hatao raeŋgopieŋ.
13 Go qanaŋ dâŋte hazec râezemec izi ʒâhec dâŋ okacne bâtikiezemec, go iŋuc mi ecmuo ine mutuc erâ mimi faio fecmu.
14 Ŋic moc e jujure ʒoɋac focneocmuzi huc ʒâic fuacneme sâcne qamaseocmu, â ʒoɋac‐ticne omaeme ie maŋticne gâcke‐fâreocmu.
15 Ŋic mamana sarichec jaŋe dameŋ sâc mamana ʒuhuckerâ roniŋte afeckerâ giene baeŋgopieŋ.
16 Go ŋic ʒâŋe biŋe sâkohec ere maio fuazo murâ ine bubiaŋte wiac moc afeckerâ bacne razemec.
17 Ŋic moc e dâŋgieo dâŋticne fuŋkerâ mume manapie fârine eekac, izi ʒâhec ine kisâ‐ticnezi ŋifecne mume fâri tâmiric eekac.
18 Ŋic jajahec ʒâŋe biŋe sâkohec jahe dâŋgieo dâŋ mu qaqatarac epire ɋâsâi qapie dâŋjekicte fuŋne taniŋkeekac.
19 Go qomâge baficketec eki wâc ŋifec sacsanaŋge erâ ŋezicguocmu, me ehec mu qaqatarac etec râpecguocmu.
20 Ŋic moc e dâŋ muocmu irec sâc jaha fârine bâfuaocmu.
21 Dâŋ sasawa mueŋgopeneŋ izi ŋifec juju‐nâŋec ŋezickeekac, â ŋifec ine sipirickeekac; irec dâŋ muekic sâc fârine bâfuarâ manatec sâckezejec.
22 Go ŋokac rohuc wiac biaŋne rocmu, ehame Wofuŋzi ehâmo‐gareekac irec fuŋne taniŋkeocmu.
23 Ŋic hapetaczi dâŋ mume nunumu hawari eekac, â ŋic moneŋ mafaheczi dâŋ mume ine ʒâʒâicne eekac.
24 Ŋic gâcne jaŋe âgo hawari burec burec sawa enâreeŋgopieŋ, â ŋic gâcne jaŋe ine hahac ɋa jaŋe ââgo eeŋgopieŋ irec sâc sirickehuc âgo enâreeŋgopieŋ.