21
1 Wofuŋ e opâ sâko guriŋ bacneme hata‐ticnaoa raekac irec sâc jaha ŋicwofuŋte mamanasu soŋaŋkeekac.
2 Ŋic nâŋâc wiac ebac eeŋgopeneŋ sâc i manapene sâckeekac, Wofuŋzi ine fuŋne weniŋucte wiac eeŋgopeneŋ i hone mana tarac eekac.
3 Wofuŋ e taha bâzire mâcne, bâbâtiŋ â tiŋne juju biaŋne irec maname fefene eekac, irec go wiac sasawa fâretiŋ jaha ebac efârezemec.
4 Pepec ʒâŋe fifi â maŋfefe ee, wiac sâqocne izi hâcne ŋic sindaŋne mufuac‐jopaekac.
5 Go giege aijakic jaha manasu biric ehuc batec fârine bocjaha fua‐gareocmu, â fâro faio bahuc ine fârine basacmu.
6 Go sioc ehuc mafa mâriri bâfuaekomec izi mi ʒoraha hâmocte micko râecgurâ mocwâc omaeocmu.
7 Ŋic sindaŋne jaŋe eebapa tiŋne qikiŋneeŋgopieŋte jaŋacne eebapa repicnezi bitiŋ ejareha raʒipie kicjopaekac.
8 Kiŋ bahac bâfuaeŋgopieŋzi hata hehesicnao raeŋgopieŋ, bahac fâsâc jaŋe ine wiac ebac epie tiŋke biaŋ efâreekac.
9 Ŋokac râŋgeŋne ehec fic biaŋnao juju izi wiac wawahane eekac, â e tâmiric kâte bozeo buc juju izi ine wiac fefene eekac.
10 Ŋic sindaŋne jaŋe dameŋ sâc wiac hehesicnere boc ejareekac, jaŋe ŋic mocte busâqoc moc mi manaeŋgopieŋ.
11 Ŋic mu âke sisicne qa bâtiŋ ejarepie mutucne jaŋe honerâ mamanahec eniŋmu, ŋic maŋɋârâŋhec jaŋe ine wiac qazu‐jarepie ʒuhuckerâ mamana fua‐jareocmu.
12 Tiŋne rune e ŋic sindaŋne jaŋere mamanasu hone manac efâreekac, ehuc sisipiricko râec‐jopaekac.
13 Ŋic moc e hapetac jaŋere wira wâwâsicte hazec mi râeocmuo ine juku e jahacnere wira wâwâsic eme e wâc iŋuc jaha mi bafickezo.
14 Ŋic moczi gore aaric manahame go soŋsoŋko wiac moc râcne tahac etec aaric‐ticne qaʒue wahaocmu.
15 Mumutiŋ gie biaŋne bapie ŋic tiŋne jaŋe bubiaŋ mananiŋmu, â ŋic hehesicne jaŋe ine bipic tatara ejareocmu.
16 Ŋic moc e mamana biaŋne qikiŋneocmuzi hâmokicne jaŋe qâtec‐jopaocmu.
17 Ŋic moc e sahacte wiacko mamaŋ gugutuŋ hurâ juhuc waiŋ â nânâ wiac nâ râmbe eocmuzi ŋic mafa sâkohec mi juocmu.
18 Ŋic sindaŋne jaŋe ŋic tiŋne jaŋere faio wiac ʒârâ ʒâpânehec râezo mueŋgopieŋ izi ŋerisierâ jaŋe jaŋacne faio feekac.
19 Ŋokac râŋgeŋ qaŋqaŋne â hâdi boŋkekicne ehec juju i wiac wawahane, â mâreŋ burocnao buc juju izi ine wiac fefene.
20 Ŋic maŋɋârâŋhec jaŋe moneŋ mafa wiac‐jeŋic biaŋne qâzuckepie fojareekac, â ŋic mutuc matacne â iric iricne jaŋe ine bâfuaeŋgopieŋ sâc kosa behepie rafâreekac.
21 Ŋic moc e tiŋne juju â miriŋ babac ee irec henʒiriŋneocmuzi ʒâŋe biŋehec erâ juhâmoocmu.
22 Momori ŋic maŋɋârâŋheczi ŋic tâpirihec jaŋere haesac sanaŋ henʒaŋ qanʒaŋneocmu, ehuc hae sanaŋ‐jeŋic ro rauc sâcne eocmu.
23 Ŋic moc e micticne soŋaŋkeocmuzi ʒârâ hâriŋ faio boc mi feocmu.
24 Sahac fefe juhuc pepec penaroŋ â picʒoŋ eeŋgopieŋ jaŋere “ŋic mu âke sisicne” muzo.
25 Ŋic moc e giere takickeme ojoŋ juocmuzi e jahacne sahac sipirickeocmu.
26 Ŋic sindaŋne jaŋe dameŋ sâc ŋic âgofâc‐jeŋic jaŋere wâcwiac irec andac eeŋgopieŋ, â ŋic tiŋne jaŋe ine wiac‐jeŋic mi sakarehuc buafec jaha qikiŋneeŋgopieŋ.
27 Ŋic sindaŋne jaŋe taha bâzi rikepie Wofuŋzi maname mamakâcne eekac, jaŋe maŋjeŋicko wiac qame gâpâcne foha bâzi rikepie iŋuc hâcne mana‐jareekac.
28 Mumutaniŋ ŋic burecnezi sipirickeocmu, â moc e dâŋticne manatâc qâtâc ehuc fâretiŋ jaha muocmuzi ine juhâc qâhâmoocmu.
29 Ŋic sindaŋne jaŋe râsi ʒâŋe fieŋgopieŋ, â ŋic tiŋne jaŋe ine hata‐jeŋic mana taraeŋgopieŋ.
30 Maŋɋârâŋ â mamana tara erâ mumutâc dâŋ biaŋne wiac i sasawa Wofuŋte maio wiac omane efâreekac.
31 Ŋoŋe becâsicfâc‐ŋeŋic ʒikare baʒawiec‐jopazo murâ baʒawiec‐jopanʒepieŋ, â ʒikao sasanaŋ bâbâfua i ine Wofuŋzi bâfua‐ŋareocmu.