20
1 Ŋic jaŋe opâ sanaŋ bocjaha nârâ mutuc bacjopame bebe qahuc dâŋ ojowa kosa eeŋgopieŋ. Opâ sanaŋ nâku maŋsifuc ee i wiac mutucne.
2 Ŋoŋe laioŋ owa‐ticnere hâwic‐ŋopaekac irec sâc jaha ŋicwofuŋ aaric‐ticnere hâwic‐ŋopazejec. Ŋoŋe ŋicwofuŋ maŋbâiŋ ecnehuc manapie juju‐nâŋec doc baŋgopeneŋ ezejec.
3 Ŋic mutucne jaŋe dâŋ mu qaqatarac eeŋgopieŋ; mu qaqatarac tâmiric juju izi ine wiac biaŋne ekac.
4 Ŋic moc e gie hesarac dameŋko qâoma juocmuzi qa roro dameŋ maickeme nânâ basaocmu.
5 Ŋic maŋ mamanasu‐nâŋec i nombâŋ ʒoricnao opâ ŋeekac irec sâc, i ŋic mamana taraheczi sawa fâreme wefuocmu.
6 Ŋic bocjaha jaŋe jaŋacne manapie tiŋne â biaŋne juŋgopeneŋ eekac, ehame sifu ŋic biaŋne moc bâfuanaŋte babasa gie sâko baeŋgopeneŋ.
7 Ŋic moc e siocmâc juhuc wiac tiŋne ebac eekac ere naru motecfâc jaŋere manapene ʒerine eekac.
8 Ŋicwofuŋ e dâŋ mumutara ŋeŋe‐ticnao ŋehuc wiac hehesicne hone ʒâŋitac efâreocmu.
9 Ŋic moczi ʒiŋuc sâcne muocmu: “No sâqocne tâmiric juekopacte maŋnanezi mumu hehec mocwâc mi enareekac?”
10 Ŋemâc bâbâfuare sâc â meda wiac sâctiri babaju i Wofuŋte maio wiac mamakâcne eekac.
11 Naru motec jaŋe eebapa‐jeŋiczi fuŋne‐jeŋic bataniŋkeekac, eme honec‐jopapene biaŋne â siocmâc jueŋgopieŋ irec fuŋne taniŋkeekac.
12 Wofuŋ e dâŋ mananaŋte hazec‐nâŋec râewec, â wiac hone taranaŋte ʒâŋe‐nâŋec wâc bâfuawec.
13 Go guŋgie sawa bahuc dameŋ sipirickecmuo ine hapetac erâ jucmu, â guŋɋâri juhuc gie ʒoɋachec bacmuo ine nânâ mâriri fofo dunduŋ fua‐gareocmu.
14 Ŋic moc e wiac furine baocte ehuc, “Furine boc fekac,” iŋuc manasurâ situâc rune ʒoɋac ecneme furine bawahacneme rorâ rahuc sahac‐ticne muteŋkeocmu.
15 Gol â qânâ furi sâko fuŋne fuŋne forakac, erâ sifu maŋɋârâŋ dâŋzi wiac i sasawa sirickerâ qânâ fuŋmoc furi sâko irec sâc ekac.
16 Ŋic moczi mutuc erâ ŋic âgo‐ticnere tofa bazuocte mupaŋkeocmuo ine ŋaqi qoruc‐ticne hotâ jâoc rorâ râepene foha mumupaŋ‐ticnere fârine bâfuazejec.
17 Go sioc ehuc wiac nânâne bâfuarâ nâtec qanaŋ aŋacne eocmu, izi ʒâhec ine nâkâcnehuc manatec maracgao hâtâ qiŋqiŋne eocmu.
18 Dâŋ biaŋne mutâcne‐garehapie irec sâcko gie batec fârinehec eocmu, irec go dâŋ manasu biric ehâmorâ ie ʒikao razemec.
19 Doc bapa ŋiczi dâŋ soŋne sâcne mi bajuocmu, irec ŋic moc dâŋ bocjaha woseekac e dic bacnenʒepieŋ.
20 Go neŋgoc mamac jahecge sâwec‐jofacmuo ine lambezi dapâcko hâpoekac irec sâc jujugezi omaeocmu.
21 Go biac jaha moneŋ mafa sâkohec ezepac, iŋuc muhuc fâro faio giene mi bâhâmocmuo ine ʒâhec soka sawec ehuc biaŋne mi baficguocmu.
22 Go ʒiŋuc mi muzemec: “Sâqocnere okacne i no nahac bazupemu,” aricne, go Wofuŋtao sawa roweckehuc juhaŋtec eki sâcne baficguocmu.
23 Ŋemâc bâbâfuare sâc wiac sâctiri bajueŋgopieŋ jaŋe Wofuŋzi qaisoc‐jopaekac.
24 Mâreŋŋic nâŋâc juju‐nâŋecte hata mi mana taraeŋgopeneŋ; Wofuŋzi sawa mutâcne‐nâreekacte raeŋgopeneŋ.
25 Go wiac irec me irec fâro faio ʒiŋuc mi muzemec: “I Wofuŋte biŋe.” Go ʒâhec irec busâqoc manahaŋtec mumupaŋgezi bitiŋ egarezacte iŋuc mi ezemec.
26 Ŋicwofuŋ maŋɋârâŋheczi ŋic sindaŋne hone ʒâŋitac ejarerâ busâqoc mi mana‐jarehuc qa bâtiŋ ejareekac.
27 Wofuŋ e maŋ hohone runezi maŋnâŋec batamaehuc maŋnâŋecte fuŋne bajaŋgeŋkeekac.
28 Ŋicwofuŋ moc guriŋ bapa gie‐ticne siocmâc, fâretiŋ â aijakic jaha bahuc juocmuzi ŋicwofuŋ ŋeŋe‐ticne basanaŋkeocmu.
29 Nâŋâc ŋicmotec jaŋe tâpiri‐jeŋicte hone warec ejareeŋgopeneŋ â ŋicraŋɋa jaŋe ine jaŋɋâŋ‐jeŋicte araŋ bajareeŋgopeneŋ.
30 Dameŋ gâcnao ʒika â wiac hâhâwicne sâko fua‐nâreme sawa eebapa‐nâŋec hehesicne qaisockehuc râpeckeeŋgopeneŋ.