24
19
1 Go ŋic hehesicne jaŋe iiŋguuŋ mi ejarezemec, ehuc jaŋehec ââgo ecmurâ mi fotariezemec.
2 Jaŋe bâbâʒâic gie baniŋte maŋjeŋic domaekac, â micjeŋickonec dâŋ wahaekac i sisipiric dâŋ sasawa.
20
3 Ŋic maŋɋârâŋheczi ficticne basarickeocmu, â ŋic mamanaheczi ficticne basanaŋkeme ŋehuc juocmu.
4 Ŋic mamana sarichec e ficticne maŋne maŋne ba bâpiaŋ ehuc wiac furi sâko râe raocmu.
21
5 Ŋic maŋɋârâŋheczi ŋic sasanaŋhec sirickeekac, â ŋic mamanaheczi ŋic tâpirihec ere sâc jâuruekac.
6 Go maŋɋârâŋ dâŋzi basanaŋgupie ʒikao sâcne racmu, â dâŋ biaŋne bocjaha mutâcne‐garepie irec sâcko ʒika qahuc sâcne sanaŋkecmu.
22
7 Maŋɋârâŋ dâŋ i ŋic mutuc matacne ere sâc sirickeekac, irec e tutumaŋko dâŋwiac fârine muc manac ehapie dâŋ biaŋne moc muocte quŋkeocmu.
23
8 Ŋic moc e wiac hehesicne eocte mana biric eocmu ere ŋic sindaŋne muniŋmu.
9 Ŋic mutuc matacnezi wiac kosa manasu biric eme sâqoreekac, â ŋic mu âke sisicne ere ine manapie mamakâcne eocmu.
24
10 Go dameŋ biaŋnao docke betaŋ ecmuo ine dameŋ ŋemâcnao iŋuc jaha betaŋke‐jâmbâŋkecmu.
25
11 Go ŋic moc hâmocko râezo ehapie mejeŋickonec bataracmurâ mâcne afecne mi ezemec.
12 Ehuc ʒiŋuc wâc mi muzemec: “No ŋic e mi manakopac.” Manakic, Anutu e dâŋ iŋucne i weniŋucte mukomec i manakac, e maŋgere fuŋne manahuc hone jâjâpecguekac. Eki hâcne ŋic eebapa‐jeŋicte okacne bazu‐jareekac.
26
13 Motec‐mae, go baŋac nâzemec, baŋac i wiac biaŋne hâcne. Baŋac opâne qâŋnaonec ro nâc etec maracgao aŋacne eocmu.
14 Eme go irec sâc jaha mamana tara â maŋɋârâŋ mana maŋ etec maŋ qâqâtâcge bâpiaŋkezejec.
27
15 Go ŋic tiŋne ere wiac fiuc rocmurâ ficticne mi somâckezemec, me fic hae‐ticne wâc mi hetâtiezemec.
16 Manakic, ŋic tiŋne e gâbâ jaha waha qarâ sifu mocwâc fahareekac, â ŋic sindaŋne e ine sisipiriczi bâsiroweocmu.
28
17 Go kisâge wiac hâhâwicne fuacnehame bubiaŋ mi manazemec.
18 Go iŋuc etec Wofuŋzi honerâ maname mi sâckeha kisâge ŋezickezacte iŋuc mi ezemec.
29
19 Go ŋic hehesicne jaŋere erâ maŋge mi faharezejec, â ŋic sindaŋne jaŋe wâc iiŋguuŋ mi ejarezemec.
20 Ŋic hehesicne jaŋe juku omaeniŋmu â ŋic sindaŋne jaŋere lambe tatamac i hâpoocmu.
30
21 O motec‐mae, go Wofuŋ â ŋicwofuŋ jahe mâmâc jaha araŋ bajactezemec, ehuc dâŋjekic qataraeŋgopieŋ ŋic i jaŋere ŋondeŋko mi juzemec.
22 Sisipiriczi ŋic iŋucne jaŋe ututuŋ jaha maic‐jopaocmu. Ehame Wofuŋ â ŋicwofuŋ jaheraonec sisipiric weniŋucne fuaocmu i goki moc manakic me?
Maŋɋârâŋ dâŋ gâcne gâcne
23 Ŋic maŋɋârâŋhec jaŋe dâŋ kecʒiŋuc mumbiŋ wâc:
Mumutara ŋic e ŋic bârâwiŋ‐joparâ gâcne jaŋere dâŋ muafeckehuc gâcne jaŋere mu mâmâckeme mi sâckeocmu.
24 E ŋic bahachec jaŋe ʒiŋuc jazaocmu mecne: “Ŋoŋe bahac tâmiric,” iŋuc jazame mâreŋ sâc ŋicne ŋicne jaŋe e qaisockehuc sâweckeniŋmu.
25 Â ŋic bahachec bâtiŋ‐jopaniŋmu mumutara ŋic i jaŋere ʒâŋe biŋe feha bubiaŋ manahuc juhâc qâhâmoniŋmu.
26 Dâŋ okacne fâretiŋ jaha mumu izi maŋ mocjaha jujure ma ekac.
27 Go qanaŋ hae ʒoŋage emasaŋkerâ nânâ giege he sarac ezemec, izi ʒâhec ine ficge bazemec.
28 Go fuŋne tâmiricko ŋic âgoge dâŋgieo mi râezemec, erâ dâŋticne wâc mi muhasickezemec.
29 Go ʒiŋuc mi muzemec: “E wiac enarewec irec sâc jaha ecnezepac, no okacne bazucnepemu hâcne.”
30 No ŋic ojoŋne â mutuc matacne ere giegaŋ â waiŋ gie fotâcnerâ rahuc wiac ʒiŋuc honepo:
31 Giegaŋ‐ticne i ʒârâ uupic â hofâ qinʒiŋzi sâcke‐fârewec, â râreckerâ sac fowec i ʒaŋke‐fârewec.
32 Eme no iŋuc honerâ manatâc qâtâc ehuc ʒiŋuc mana tarapo:
33 No rarâ guŋ piticne fopemu me ŋemanahuc sawa ropemuo
34 ine hapetac jujuzi fiuc roro iŋucne maicnuocmu â roroczi ʒikaŋic iŋucne fisi‐nareocmu.