25
Salomore maŋɋârâŋ dâŋ gâcne
1 Salomore muqâqiŋ dâŋ gâcne Juda ŋicwofuŋ Hisikiare qâreŋŋicfâc jaŋe qâreŋkembiŋ ʒine hâcne.
2 Anutu e wiac sasawa maŋbuc‐ticne maname foekacte araŋ bacneeŋgopeneŋ, â ŋicwofuŋ jaŋe ine wiac nâzâ mutâc eeŋgopieŋ irec sâsec‐jopaeŋgopeneŋ.
3 Ŋicwofuŋ jaŋe maŋjeŋicko dâŋ weniŋuc foekac i mi manaeŋgopeneŋ, jaŋere mamanasu i nâŋâcne mamanasu sirickeekac, i qânikiŋ faic jâmbâŋ ferâ fokac â hâwec fâhâŋne juwic jâmbâŋ hurâ fokac irec sâc.
4 Ŋoŋe siliwa ʒocko rikepie wosâeme metâ bapazi wiac biaŋne i me i bazo murâ sâcne baocmu.
5 Ŋoŋe ŋic sindaŋne ŋicwofuŋte maionec bârâriec‐jopahapie guriŋ bapa gie‐ticne fâretiŋ jaha sâcne bahuc juocmu.
6 Go ŋicwofuŋte maio sahacge mi bafezemec, â ŋic fekicne jaŋe wâc mi âkehoc‐jopazemec.
7 Manakic, jaŋe ʒiŋuc gazapie sâckeocmu: “Go ʒira ware mai jaha ŋec,” ŋic fekicne ere maio ŋeŋege ŋic mocte biŋe qikiŋnecmurâ gazapie miminehec eocmu.
8 Go wiac hone manac eekic i acmâc jaha tutumaŋko mi muzemec, i ʒâhec ŋic moczi fuarâ goki dâŋ mucmu irec fuŋne bataniŋkehuc mimi busâqoc bâfua‐gareme weniŋuc ecmu?
9 Go âgogehec dâŋŋekic fokacko ine ehec mufâsâezepirec, ehuc ŋic mocte fuŋne mi mufuazemec.
10 Iŋuc mi ecmuo ine dâŋge mananiŋmu jaŋe mimi qaqa egarepie ʒâŋe biŋege sâqorerâ fohuc juocmu.
11 Dâŋ musarickehuc mukicne i ʒuŋe gâpiŋ ʒeŋaŋhec mâmâc râekicne irec sâc.
12 Ŋic mamanahec moczi ŋic âgo‐ticne hazec râeha uŋ sawaŋ ecneocmu ere manapene furi sâko ezejec.
13 Ʒoaŋ fârorocko opâ mâteŋne nâpene bâgunuc‐nâpoekac irec sâc jaha biŋedâŋ baraekac kiŋaŋŋic metâne eki bomboŋ‐ticne ecneekac.
14 Taha wiac râeniŋte dâŋ sawa muhuc fârine mi bâfuaeŋgopieŋ ŋic i jaŋe mâŋâŋzi karorac ficneme omaeha hoe mi heekac irec sâc.
15 Ŋic fekicne ere maio rumerâ juhuc dâŋ âzâcnekupene maŋticne urueme mana‐nâreocmu.
16 Go baŋac bâfuarâ aŋacte sâc sawa nâzemec, irec sâc jâuruhuc nâcmuo ine maŋucmu.
17 Go ŋic âgoge riŋkoa sawa iqickezemec, gâbâ jaha iqicketec gore takickeme qaisocguzacte.
18 Ŋic moc e ŋic âgo‐ticne micko âkec ecneocmu e ʒika me qândiŋ me tepe motec micneheczi hâhâmocko kiekac irec sâc eocmu.
19 Dameŋ ŋemâcnao doc bapa ŋic moctao rorowecke izi ine micsiec‐nâŋec goroc goroc eha ɋoza nâeŋgopeneŋ, me kike‐nâŋec demba qame hata raeŋgopeneŋ irec sâc ekac.
20 Me mutuc erâ mâmâteŋ dameŋko hâroŋkenʒepeneŋ muhuc ŋaqi qoruc wiac‐nâŋec hetaranaŋmu irec sâc eocmu. Ŋic moc e maŋ kukumbuc faio juha gae hecnepene ine hâweczi wic ʒaekac irec sâc eocmu.
21 Râsige nânâre hâmoha nânâ gumezemec, â opâre hâmoha opâ gumezemec.
22 Go iŋuc ecnetec mimiehuc ʒara mara eha Wofuŋzi okacne bazu‐gareocmu.
23 Murazi karorac ficne sueme qâhâckerâ hoe heekac irec sâc jaha gupe micko âkeczi aaric bâfuaekac.
24 Ŋokac râŋgeŋne ehec fic biaŋnao juju izi wiac wawahane eekac, â e tâmiric kâte bozeo buc juju izi ine wiac fefene eekac.
25 Mâreŋ ʒorickonec biŋe biaŋ wareme mamana izi ine opâre hâmohuc opâ mâteŋne nâpene bâgunuc‐nâpoekac irec sâc ekac.
26 Ŋic tiŋne moc e ŋic hehesicne dockecneocmu e opâ ʒâŋe sohoŋnehec me opâ nombâŋko marasiŋ sâqocne behepene hume opâ sâqoreekac irec sâc eocmu.
27 Go baŋac bocjaha nâtec mi sâckeocmu iŋuc jaha ŋic jaŋe mumbiaŋguniŋte ʒoɋac ejaretec mi sâckeocmu.
28 Go kimbeŋ aaricge mi bawahacmuo ine hae moc sac tâmiric ŋeocmu irec sâc ecmu; hae iŋucne i râsi jaŋe fisirâ qa heropiec eniŋmu.