4
Maŋɋârâŋhec juju irec fârine
1 Motecfâc‐nane, ŋoŋe mamac‐ŋeŋic noni wiac ŋaza qazuc eekopac irec hazec râerâ mana hâmoniŋ, ehuc maŋzi mamana tara bâfuanʒepieŋ.
2 Wiac qazu‐ŋareekopac i biaŋne sasawa, irec manasuhuc junʒepieŋ.
3 No neŋgoc mamac jahec‐nane jahere motec wârâŋne mocsâkoa juhape
4 mamac‐nanezi wiac qazu‐narewec. Ehuc dâŋ ʒiŋuc naza jujec: “Dâŋ gazaekopac sâc irec ninikec moc mi bâbâfua manasuhuc juzemec. Erâ sâcmutâc dâŋnane mana rereŋ ehuc sâcne juhâc qâhâmocmu.
5 Go maŋɋârâŋ â maŋzi wiac mana utuckehuc mamana tara i bâfuazemec, ehuc dâŋ gazaekopac i mi qâsuazemec.
6 Go maŋɋârâŋ mi râpeckecmuo ine izi hâcne sapecguocmu, â mana maŋ ecmuo ine soŋaŋguocmu.
7 Manakic, go maŋɋârâŋhec ecmurâ ʒoɋac sâko ezemec, ʒoɋac izi hâcne maŋɋârâŋhec jujure fufuŋkene ekac. Go wiac irec me irec mâcne, maŋzi wiac mamana tara irec manatec furi sâko eha bâfua‐jâmbâŋkezemec.
8 Maŋɋârâŋ dâŋ mana maŋ etec izi ʒâŋe biŋe sâko bâfua‐garezejec, â maŋzi hâpo heâroŋ ecnetec eri qoqonaŋge eocmu.
9 Go iŋuc etec eri hendiŋ â eriduge eocmu hâcne.”
10 Motec‐mae, go dâŋnanere hazec râec, ehuc dâŋ gazaekopac sâc manatec fârine eha bajuhuc dameŋ ʒora jufezemec.
11 No maŋɋârâŋte fuŋne gaza gowatuc epo, ehuc siocmâc jujure hatao jowacgupo.
12 Irec go hatagao rahaŋtec wiac moczi aka moc mi hegareocmu â gasackerâ racmuo ine kikege wâc mi fâfâckeocmu.
13 Wiac qazu‐garekicne irec manasuhuc juzemec, â mamana bâfuameŋ izi hâcne jujuge dopeckeekacte biaŋne soŋaŋkezemec.
14 Go ŋic hehesicne jaŋere hata mi âtezemec â ŋic sindaŋne jaŋere itiroc wâc mi bâjâpezemec.
15 Go jaŋere hata râpeckerâ dic bacnehuc wiac hehesicne mi ezemec, iŋuc ehuc gahacne hatao ʒuhuckerâ razemec.
16 Ŋic sindaŋne jaŋe wiac hehesicne mi eniŋmuo ine guŋ sâcne mi foniŋmu, â ŋic moc mi bâʒâickeniŋmuo ine guŋɋâri jaha foniŋmu.
17 Wiac sindaŋne â ʒâʒâicne ebac ee izi hâcne nânâ opâ‐jeŋic eekac.
18 Ŋic tiŋne jaŋere hata i furic oŋa rarac iŋucne, oŋa rarac i ʒoaŋ wefume fuŋkerâ mâreŋ tamae rahuc hae fure‐fâreekac.
19 Ŋic sindaŋne jaŋere hata ine dapâc qisiric iŋucne, irec jaŋe wiac izi me izi kike‐jeŋic fâfâckeme waha jopaekac i mi hone taraeŋgopieŋ.
20 Motec‐mae, go hazec râe‐hâmohaŋtec dâŋ gazape manazemec.
21 Go dâŋnanere ninikec moc mi bâfuahuc maŋzi mana sakac ezemec.
22 Moc e dâŋnane mana tarahuc bajuocmuo ine izi hâcne nârâ bibiaŋ‐ticne ehuc juju bâfuacneocmu.
23 Go maŋge soŋaŋkezemec, izi hâcne juju bâbâfuagere hobeteŋne ekac.
24 Erâ go burecdâŋ moc mi muzemec, ehuc mumusifuc â eeatuc dâŋ wâc mi bajuzemec.
25 Go dunduŋ dadape fihuc mâcne, ʒâŋe dândâŋne fihuc wiac maicgurâ fokac i honezemec.
26 Go wiac moc ezo murâ mana‐hâmohuc etecne fârine biaŋne fuaocmu.
27 Ehame hata hehesicne qikiŋnerâ tiŋne hatao âtehuc ŋifec me ŋifec qâsorierâ raʒic wefuc mi ezemec.