5
Boe sau gie bapare uŋdâŋ
1 Motec‐mae, go hazec râehuc maŋɋârâŋ â mumutâc dâŋnane manazemec.
2 Go iŋuc ecmuo ine weniŋuc erâ juju biaŋne bâfuazo i mana taracmu, ehame dâŋmumugezi mamanagere fuŋne mutaniŋkeocmu.
3 Manakic, boe sau ŋokacte dâŋzi baŋac iŋucne aŋacnehec eekac, e micticnezi wokemaŋ dâŋ muʒiziwehuc muekac.
4 Irec go qanaŋ dâŋticnere manatec aŋacne eocmu, ʒâhec ine gorao kegoc hâtâne me sâqe bune râpene mictara irec sâc eocmu.
5 Ŋokac iŋucnezi hâmoc haeo jowacgu raocmu, e hata ira hâcne raekac.
6 Ŋokac e jujure hataoa mi juekac, erâ go hone manac mi ecnehaŋtec qâsorierâ kosa barasa raekac.
7 Motec‐mae, no dâŋ gazakopac ʒi manarâ moc mi nikecguzejec.
8 Go ŋokac iŋucne dic bacnehuc ficticnere motâc moc mi maickezemec.
9 Sifu ecmuo ine ʒâŋe biŋegezi ŋic gâcne jaŋere maio wawahane eha socɋâri jaha juhuc ŋic jaŋere meo fetec mi akicguniŋmu.
10 Ine hâcne, ŋic furune jaŋe moneŋ mafa wiacge gowac rohapie gie bahuc wiac hure‐fâremeŋ i gâcne jaŋere biŋe eocmu.
11 Wiac iŋuc fua‐gareme hâmozo erâ kio huse ehuc dâŋ kecʒiŋuc mucmu:
12 “Jei, no mu bâtiŋ enarezo mupie wemocte qatarapo, ehuc uŋdâŋ‐jeŋic mi manapo?
13 No qaqazufâc‐nane jaŋere dâŋ wemocte qikiŋnepo â ŋic wiac naza qazuc embiŋ jaŋere dâŋte hazec wâc wemocte mi râepo?
14 No iŋuc ehuc ŋic ŋondeŋko juhape ututuŋ jaha mimi qaqa fai‐naneo fezo ewec.”
15 Go gahacne ŋonâŋtao qohotahuc maŋge erao sawa râetec fozejec.
16 Ŋokac gâcne jaŋehec juhuc naru motec bâfuac‐jopacmu jaŋe âgo egarehuc sâcne mi baficguniŋmu.
17 Naru motecfâcge jaŋe soka‐fârerâ ŋic furune moc mi bafickehuc go gahacne sawa baficguhuc junʒepieŋ.
18 Irec go ŋokacge naru ʒeŋoŋ jaha rotec ŋonâŋge ewec ehec bubiaŋ faio jaha juzepirec.
19 Ŋokac e gâjoŋ sereŋ hawari biaŋ â totoc fara tacnezi âgo jauŋ egareme bubiaŋ manazemec, erâ e gore ecneha jauŋ bacgume manatec sâckezejec.
20 Motec‐mae, go wemocte ŋokac kosa jujune erao maŋge râetec foocmu, me wemocte ŋic mocte ŋokac hâpohuc susu‐ticne ro fâre ecmu?
21 Manakic, Wofuŋzi wiac ebac eekomec i hone‐fâreekac, ehuc hata raekomec sâc ruc bagarehuc juekac.
22 Ŋic sindaŋne e sâqocne‐ticnezi wiwitic ecneha ira feme kiekac.
23 E jahacnao bâbâtiŋ gie sâcne mi baekacte hâmoocmu hâcne, â mutuc matacne juekacte ʒâŋeruŋko wâc huocmu.