101
Ŋicwofuŋzi Anutu dâŋ âzâcnewec
1 No aki anonoc â bâbâtiŋ irec gae hepe,
ehuc Wofuŋ, go musi bagarepe.
2 Erâ bahacmâc jujure hata soŋaŋkepe.
Jei, go wezimucko norao warecmu?
No fic hae‐nanere maŋko
maŋtaniŋ hata âtezo mukopac.
3 Erâ eebapa mamakâcne
mi hone dendeŋnepemu.
Hata kizurâ jujure takicnukac,
wiac iŋucnezi norao bohotazacte.
4 Maŋ qaqaharicne irec bâec bapemu,
sâqocnere kâuc bazepac.
5 Moc e âgo‐ticne soŋsoŋko musoriŋkeme,
no e bâniniŋkepemu.
Pepec ʒâŋehec â maŋ penaroŋhec,
e manacnepe mi juocmu.
6 Mâreŋko ŋic siocmâc juŋgopieŋ jaŋere ʒâŋe fipemu,
iŋucnezi nohec ŋec juc eene.
Moc e bahacmâc hata âtehuc juocmu,
iŋucnezi kiŋaŋ qanarezejec.
7 Moc e bâkiri baekac,
e nore ficmaŋko mi juzejec.
Moc e burecdâŋ eekaczi
nore maio mi domaocmu.
8 Hae fureocmu sâc no mâreŋko
ŋic sindaŋne sasawa bâsirowec‐jopapemu.
Eme Wofuŋte hae qizecko
sâqocne bapazi omaenʒepieŋ.