121
Wofuŋzi bafic‐nâpohuc sabec‐nâpoekac
1 Tiki mâreŋkopec qâhâŋnerâ fikopac.
Babafic‐nane wenirec moc wareocmu?
2 I Wofuŋtaonec warekac,
sambâŋ mâreŋ bâfuawec eraonec hâcne.
3 Eki manaha kikege qiriŋ mi qaocmu,
kitaŋge guŋzi mi qâmâckeocmu.
4 Manakic, Israe hone kitaŋ ecneekac,
e guŋ tâmiriczi ɋâricne hati juekac.
5 Wofuŋ e kitaŋge, Wofuŋ e mumucge,
fâregao domakac hâcne.
6 Irec ʒoaŋko ʒoaŋzi qa bâʒâic mi egareocmu,
â ŋafeo mosazi wâc mi sipiricguocmu.
7 Wofuŋ e sisipiric sasaware sabecguekac,
e hâcne jujuge sabeckeekac.
8 Fahare racmuo â fisi focmuo Wofuŋzi sabecguekac,
dameŋ ʒi eekaczi erahuc juzokac sanaŋ.