122
Jerusalem haere bubiaŋ gae
1 Ʒiŋuc nazapie bubiaŋ manapo:
“Wofuŋte ufuŋko fenaŋ!”
2 Joe Jerusalem, kike‐nâŋeczi
gore sacmaŋko âterâ domambeŋ.
3 Joe Jerusalem, hae sâko heɋârerâ bakicne,
saczi râreckeme qâzuc jaha qiŋ herâ ŋekac.
4 Eme kikefuŋ birine birine feeŋgopieŋ,
Wofuŋte kikefuŋ biri,
Israe musanaŋkecnekicne irec sâko,
Wofuŋte ʒâŋe daŋge mumuteŋ ecneniŋte.
5 Ira hâcne dâŋgiere eri ŋeŋe ŋerakac,
Dawidire kikefuŋ jaŋere eri ŋeŋe.
6 Jerusalem haeo wama foocte numuniŋ:
“Gore ejareekac jaŋe juhâmonʒepieŋ.
7 Sacmaŋgao wama fohuc juzejec;
ficmaŋgao jujuhâmo fozejec.”
8 Âgo qomâfâc‐nane jaŋere erâ
ʒiŋuc mukopac: “Sacmaŋgao wama fozejec.”
9 Wofuŋ Anutu‐nâŋec ufuŋ‐ticnere erâ
jujuhâmo fua‐gareocte numukopac.