145
Anutu sambâŋ mâreŋ soŋaŋ‐jofaekac e muafeckezo
1 Anutu‐nanezi Wofuŋ Sâko jukic, go muafecgupe,
ehuc ʒâŋege tatara tâmiric mumbiaŋkepe.
2 No ʒoaŋne ʒoaŋne mugac bagarehuc jupe,
ehuc ʒâŋege tatara tâmiric muteŋkepe.
3 Wofuŋ e kâcɋene, e muteŋ bâteŋ ecnezo,
sosoka‐ticnere sâc mi mamana tarane.
4 Mimiŋne jaŋe ɋâric guru wiac bapage
musoka‐jare rahuc junʒepieŋ,
â mâsi sâkoge mutaniŋke‐jarenʒepieŋ.
5 Ʒai ʒonʒoŋgere eri tatamac biaŋte,
â mâsi bapagere manatâc qâtâc ehuc juzepac.
6 Ŋiczi gie qeŋ bipinehec baekic irec muc manac enʒepieŋ,
â noni kâcɋene sâko jukic irec dâŋ binaŋ epemu.
7 Jaŋe uruc jauŋge guru fufusuc irec biŋe munʒepieŋ,
â tiŋnegere ʒeri gae henʒepieŋ.
8 Wofuŋ e aki anonoc â buuruchec,
kimbeŋ biac mi qaekac â maŋjauŋ‐ticne fekicne.
9 Uruc jauŋ‐ticnezi mâmâc sâko rocjopaekac,
â meqâreŋfâcne busâqoc mana‐jare‐fâreekac.
10 Wofuŋ, go meqâreŋfâcge jaŋe ʒeŋgoma daŋge gazanʒepieŋ,
â mitiŋicfâcge sasawa jaŋe muteŋgunʒepieŋ.
11 Guriŋ bapagere eri tatamac muafeckenʒepieŋ,
â tâpirige musokanʒepieŋ.
12 Eme gie tâpirihec baekic izi mâreŋŋic hazec‐jeŋicko huzejec,
â guriŋ bapagere eri tatamacte kâuc mi banʒepieŋ.
13 Gore uucmaŋ i uucmaŋ fofo sanaŋ,
â guriŋ bapage i mimiŋzi ɋâric fohuc juocmu.
Wofuŋ e dâŋticne siocmâc sasawa,
â wiac bapa‐ticne sasawa i qâreŋ biaŋ.
14 Wofuŋ e rândiŋkezo eeŋgopieŋ jaŋe dopec‐jopaekac,
â badapec‐jopakicne jaŋe bafaharec‐jopaekac.
15 Ʒeŋgoma gorao ʒâŋe fieŋgopieŋ,
goki dameŋ mukicnao nânâ jarecmurâ.
16 Go mege baratieekic,
eme wiac jujune sasawa jaŋe
nâ aŋac eku gapec‐jopaekac.
17 Wofuŋ e tiŋne juhuc wiac‐ticne ebac efâreekac,
e uruc jauŋhec juhuc gie‐ticne bafâreekac.
18 Wofuŋ e mu wâwâsic ecneeŋgopieŋ,
jaŋe sasawa fisi qâtec‐jopaekac,
siocmâc mu wâwâsic ecneeŋgopieŋ jaŋe hâcne.
19 Araŋ bacneeŋgopieŋ sasawa jaŋe wiac mueŋgopieŋ i jareekac,
wiwira‐jeŋic manarâ bafic‐jopaekac.
20 Wofuŋ e maŋzi jauŋkeeŋgopieŋ jaŋe
sasawa hone maiŋ ejareekac,
ŋic sindaŋne jaŋe ine bâsirowec‐jopaekac.
21 No micnanezi Wofuŋte ʒâŋe biŋe mutaniŋkezepac,
â mâreŋŋic sasawa jaŋe tiri ʒâŋe‐ticne
tatara tâmiric muteŋkehuc junʒepieŋ.