146
Wofuŋtao roweckezo
1 Wofuŋ muteŋkeniŋ!
Maŋ qâqâtâc‐nane go Wofuŋ muteŋkec!
2 No jufehuc jupemu sâc Wofuŋ muteŋkezepac,
juju fonareocmu sâc Anutu‐nane ʒeri gae hecnezepac.
3 Ŋoŋe ŋicbomboŋ jaŋerao mi roweckenʒepieŋ,
mâreŋŋic jaŋe bafic‐nâponiŋte tâpiri mi fojarekac.
4 Nokafe‐jeŋic qândâŋkeme wândocko risieniŋmu,
eme ʒoaŋ ijaha dâŋ birickembiŋ i omaeocmu.
5 Moc e Jakobore Anutuzi babafic‐ticne ekac,
â Wofuŋ Anutu‐ticne worickehuc juekac,
ŋic iŋucnezi sâcne juhâmoocmu.
6 Wofuŋ eki hâcne sambâŋ mâreŋ bâfuac‐jofawec,
erâ hâwecmaŋko wiac fokac i bâfua‐fârewec,
erâ hec hetikic tâmiric siocmâc juekac.
7 Eki ro waha âte ejarekicne ŋezic‐jopaekac,
â tac qararacne nânâ bâfua‐jareekac;
Wofuŋzi niŋgiŋ‐jopakicne firuec‐jopaekac.
8 Wofuŋ e ʒâŋe tiŋtuŋ ʒâŋe fifi bacjopaekac,
Wofuŋ e badapec‐jopakicne bafaharec‐jopaekac,
Wofuŋ e tiŋne juju maŋjauŋ ejareekac.
9 Wofuŋ e ŋic jabane hone soŋaŋ ejareekac,
â hozec bekâ dope hutuŋ ejareekac;
ŋic sindaŋne mamana biri‐jeŋic ine hesifuckeekac.
10 Wofuŋ e guriŋ bapa gie bahuc juocmu sanaŋ;
Zioŋ gore Anutu e mimiŋzi ɋâric iŋuc erahuc juocmu.
Wofuŋ muteŋkeniŋ!