21
Ŋicwofuŋte daŋge gae hembiŋ
1 O Wofuŋ, ŋicwofuŋzi gore tâpirio bubiaŋ manakac,
â bafickemeŋte wemo afecne kiwaekac!
2 Goki maŋticnere aŋac tahackemeŋ,
â nunumu‐ticne mi qatarameŋ.
3 Gore jambuŋzi wiac biaŋ bâfuacnemeŋ,
â ŋicwofuŋ du golzi bakicne qizecnao hemeŋ.
4 Jujure numu‐garewec, eme juju tahackemeŋ,
jarane jarane, tatara tâmiric.
5 Goki baficketec ʒâŋe biŋe‐ticne faharewec,
eri tatamac â ɋuŋɋasaŋ bâfuacnemeŋ.
6 Jambuŋ sâkohec jusanaŋkerâ juocte mucnemeŋ,
gore maio bubiaŋ manahuc jusarickeocte râemeŋ.
7 Ŋicwofuŋ e Wofuŋte roweckekac hâcne,
eme Femicnere aki anonoczi dopeckeme qiŋ herâ domaocmu.
8 Megezi râsifâcge sasawa bâfuac‐jopaocmu,
mefâregezi gore takic‐jopaekac jaŋe bâfuac‐jopaocmu.
9 Goki ʒoc iŋucne fua tâcnehuc
ʒâmiziec‐jopacmu.
Wofuŋ e kimbeŋ‐ticnezi ɋâcjopaocmu,
â ʒocbâruŋzi ʒâseŋ‐jopaocmu.
10 Go ɋâricfâc‐jeŋic mâreŋkonec bâsirowec‐jopacmu,
ɋiefâc‐jeŋic jaŋe mâreŋŋic jaŋere ŋondeŋko omaeniŋmu.
11 Jaŋe eatuc ehuc wiac sâqocne egareniŋte manasueŋgopieŋ,
sifu fârine mi bâfuaniŋmu.
12 Tepegezi ʒâŋe mai‐jeŋicko ma bacmu,
ehuc qa jâpec ejaretec wiseniŋmu.
13 O Wofuŋ, go tâpirigehec faharec!
Ɋicwânʒâŋge gae hehuc muafeckenaŋmu.