28
Wâwâsic â mumuteŋ dâŋ
1 Wofuŋ, jâcnane, go wira‐garekopac,
qepoŋ hawari mi enarec.
Go dâŋemâc etec no nombâŋko humbiŋ
jaŋere sâc ezipohec.
2 No baficnucmurâ wira‐garepe;
marac fânâŋ‐nane manazemec.
No tiri ufuŋgaopec
mejahec‐nane bafaharec‐jofakopac.
3 Go sindaŋŋic jaŋehec mi bârâriecnuzemec,
sâqocne bapa jaŋerao mi ʒuhucnuzemec;
jaŋe âgofâc‐jeŋic jaŋehec wamadâŋ i mueŋgopieŋ,
ehuc maŋjeŋicko ine wiac hehesicne manasu biric eeŋgopieŋ.
4 Go gie‐jeŋicte sâcko okacne bâtikie‐jarezemec,
eebapa‐jeŋic sâqocne irec sâcko;
wiac ebac embiŋ i manahuc ejarezemec,
fârine bâfuambiŋ irec furine ronʒepieŋ.
5 Jaŋe Wofuŋte meqâreŋ mi ʒâŋitaeŋgopieŋte,
â eebapa‐ticne mi hone taraeŋgopieŋte,
eki qafarac‐joparâ mocwâc mi bafaharec‐jopaocmu.
6 Wofuŋ muteŋkezo!
Eki hâcne wira wâwâsic ecnekupe mana‐narejec.
7 Wofuŋ e tâpiri‐nane â maro‐nane;
maŋnane erao roweckeekac;
irec baficnume maŋnanezi kiwaeekac,
eme gae hecnehuc daŋge âzâcneekopac.
8 Wofuŋ e ŋicfâcne tâpiri bâfua‐jareekac,
â ŋicwofuŋ wokemaŋ ruacnewec e ʒikao huec sanaŋ ecneekac.
9 Ŋicfâcge asao rocjopazemec,
merâfâfâcge jambuŋ‐jopazemec.
Goki lama soŋaŋ ejarehuc,
bacjopa jurahuc juzemec.