29
Anuture eri tatamac ɋuŋ parandaŋko fuaekac
1 Sambâŋte aŋelo, Wofuŋ muteŋkeniŋ,
Wofuŋte tatamac â tâpiri musokaniŋ.
2 Ajoc, Wofuŋte ʒâŋe biŋe muac baafec ecneniŋ,
tiri eri qonaŋkerâ Wofuŋ dapecneniŋ.
3 Wofuŋte marac fânâŋ hâwec faicnao fuakac,
Anutu tatamac runezi ɋuŋ hekac,
hâwec sâko faicnao Wofuŋzi jukac.
4 Wofuŋte marac fânâŋ i ɋicwânʒâŋnehec,
Wofuŋte marac fânâŋ i qeŋ bipinehec.
5 Wofuŋte marac fânâŋzi jâmâzâc qazukac,
Lebanoŋte jâmâzâc Wofuŋzi qanʒaŋnekac.
6 Lebanoŋ tiki ecneme bulimakao motec tinac kiwaekac,
Sirioŋ tikizi kâte bulimakao sâckekac.
7 Wofuŋte marac fânâŋzi ʒocbâruŋ iŋucne fuakac.
8 Wofuŋte marac fânâŋzi tuhu mâreŋ itiriŋkekac,
Wofuŋzi Kadesi tuhu mâreŋ itiriŋkekac.
9 Wofuŋte marac fânâŋzi boriŋjâc ʒâkiriŋkekac,
erâ kâtene kâtene imackekac;
eme ufuŋ‐ticnao ʒeŋgoma ʒiŋuc wiraŋgopieŋ:
“Anutu muteŋkezo!”
10 Wofuŋ e eri ŋeŋe‐ticnao rumi faicnao ŋekac,
Wofuŋ e guriŋ bapa gie‐ticne barâ barahuc juzokac.
11 Wofuŋ e ŋicfâcne tâpiri tahac‐jopazejec!
Wofuŋ e ŋicfâcne wamazi jambuŋ‐jopazejec!