52
Ŋic moc penaroŋ sâko ejujec e mu hanec ecnekicne
1 Ŋic tâpiri wânʒâŋ, go mitiŋic wiac gâgâpâcne ecnehuc
wemocte penaroŋ ehuc juekic?
Go ʒoaŋ ʒora sisipiric gie mana biric eekic.
2 Nameŋge resa mictara iŋucne,
docbapa fuŋqizecne go!
3 Go biaŋne qaisockehuc sâqocne âgo ecneekic,
dâŋfâri mumure takicguha burecte aŋacguekac.
4 Sisipiric bâbâfua irec dâŋte egareekac,
nameŋge eeatuc dâŋte hozine.
5 Anutuzi bâsirowecgume omaecmu,
qoruc bozegaonec rocgurâ bârâriecguocmu,
jujune jaŋere mâreŋkonec unucguocmu.
6 Ŋic tiŋne jaŋe honerâ hâwic‐jopaocmu,
erâ gâwiecnehuc ʒiŋuc muniŋmu:
7 “Sowine, ŋic eki hâcne Anuture dapeŋko mi soŋkehuc,
moneŋ mafa sâko‐ticnao roweckewec,
â jahacne mâririre mamanac juwec.”
8 No ine oliwa jâc ɋâricne iŋucne,
Anuture ficko domakopac,
no Anuture aki anonocte mamanac
juhuc jukopac sanaŋ.
9 Anutu, goki wiac ekomec,
irec dameŋ sâc daŋge gazahuc jupe.
Erâ ʒâŋe biaŋge i mitiŋicfâcge
jaŋere maio musokape.