59
Râsi qac momorihec jaŋere hâhâwicte nunumu
1 Anutu‐nane, go râsifâc‐nane jaŋeraonec bataracnuc,
nuniŋte fahareŋgopieŋ jaŋe nunʒipiŋte sabecnuc.
2 Sâqocne bapa jaŋere meonec bataracnuc,
â soc nânâ jaŋe imacnunʒipiŋte ŋezicnuc.
3 Honekic, jaŋe juju‐nane hetâcneniŋte ruc baŋgopieŋ,
ŋic qac momoriheczi nuniŋte roroc eŋgopieŋ.
Wofuŋ, no qaqatara me sâqocne moc mi ehape eŋgopieŋ.
4 Hehesic‐nane moc mi foha quruŋ herâ fisi birickeŋgopieŋ,
irec fahare ware sacfozic enarehuc honec‐jopac.
5 Anutu Tâpiri Ɋuŋɋasaŋ Wofuŋ, Israere Anutu,
go mana ɋâɋârerâ qâpuc guru sasawa bâtiŋ‐jopac;
docbapa repicne jaŋeraonec moc mi akickezemec!
6 Hae owâeme sâc risie warerâ qâto iŋucne qâŋkeeŋgopieŋ,
ehuc haemaŋko rarac wawarec eeŋgopieŋ.
7 Erâ owa ruruckehuc dâŋfânâŋ sâko erâ
ʒiŋuc mueŋgopieŋ: “Dâŋepene mozi manaocmu?”
8 Wofuŋ, go ine gâwie‐jarekomec,
qâpuc guru sasawa mana wahac‐jopakomec.
9 O tâpiri‐nane, no mumumbiaŋ gae hegarepe;
o Anutu, go hâcne huec sanaŋ‐nane.
10 Anutu‐nane e aki anonoc‐ticneheczi bâfuacnuocmu,
Anutu‐nanezi manaha râsifâc‐nane honec‐jopahuc saoreŋ qapemu.
11 Mi qâhâmoc‐jopac, ŋicfâc‐nane jaŋe nikec‐jopazacte.
Tâpirigezi ejaretec biric boroc enʒepieŋ,
erâ herândiŋ‐jopazemec, o Wofuŋ, maro‐nâŋec.
12 Micbipic‐jeŋickonec dâŋ wahaekac i sindaŋ hârindaŋne;
irec penaroŋ â sosopec â burecdâŋ‐jeŋic,
izi ufic ejareme ira jowanʒepieŋ.
13 Kimbeŋko bâsirowec‐jopakutec omaenʒepieŋ.
Eme ŋic sasawa jaŋe ʒiŋuc mananʒepieŋ:
Anutu e Jakoborao guriŋ bapa gie baekac,
guriŋ bapa izi raku mâreŋ qaŋeŋnao tarakac.
14 Hae owâeme sâc risie warerâ qâto iŋucne qâŋkeeŋgopieŋ,
ehuc haemaŋko rarac wawarec eeŋgopieŋ.
15 Jaŋe nânâ basahuc ra ju ware ju eeŋgopieŋ,
â mi gapec‐jopame kio kâroŋ eeŋgopieŋ.
16 No ine tâpirigere mumuteŋ gae hepemu,
furictea aki anonocgere ʒeri gae hesokapemu.
Goki hâcne huec sanaŋ enaremeŋ,
â ʒârâ ʒâpâ fuame dapeŋ enaremeŋ.
17 O tâpiri‐nane, no mumumbiaŋ gae hegarepemu.
O Anutu, go hâcne huec sanaŋ‐nane,
Anutu go aki anonocge bâfua‐nareekic.