DÂKÂNE NAMBA 3
73
Anuturao roweckerâ juju biaŋ bâfuazo
1 Anutu e ŋic siocmâc jâmbomac buuruc ejareekac,
maŋjeŋic ɋaɋacne foekac jaŋe hâcne.
2 No ine kike‐nane fâfâckezo ejec,
no âte sowarierâ nuzo ejec.
3 No ŋic sindaŋne sahackopec juju biaŋ‐jeŋic honehuc
penaroŋ‐jeŋicte erâ maŋnane fârorockejec.
4 Jaŋe ʒâic serereŋ moc mi fojarekac,
sahac‐jeŋic ɋiɋicne â wokemaŋhec.
5 Wiac babasa me ʒârâ ʒâpâ, ŋic gâcne fua‐jareekac,
izi ŋic keci jaŋe moc mi rocjopaekac.
6 Irec maŋfefezi qoqonaŋ‐jeŋic ekac,
â pepeczi ŋaqi‐jeŋic eme rojueŋgopieŋ.
7 Wokemaŋzi ʒâŋe mai‐jeŋic âke fusucmame wefurâ ŋeekac,
â bujeŋickonec wiac repicne huhuckeme wefuekac.
8 Jaŋe âke sisic dâŋ hâtâne mueŋgopieŋ,
â pepec ehuc ŋic fejareniŋte ejareekac.
9 Masu‐jeŋic bâfeŋnerâ sambâŋkopec dâŋ mupie feekac,
erâ nameŋ‐jeŋiczi mâreŋko wiac fokac
i kosa mu surec eeŋgopieŋ.
10 Eme ŋic jaŋe ine mana‐jarepie sâckeekac,
eme mumbiaŋ‐jopaeŋgopieŋ.
11 Ʒiŋuc mueŋgopieŋ: “Anutuzi wemocko manaocmu?
Femicne sâko erao mamana fokac me?”
12 Kec, manaŋgopieŋ, sindaŋŋic fuŋne‐jeŋic iŋuc fokac.
Erâ wiac mocte mana mezac mi ehuc, moneŋ‐jeŋic basaweeŋgopieŋ.
13 Jei, no maŋnane maŋgâŋ soŋaŋkepe ɋaɋacne fowec,
â menane ʒure ɋaɋackepe wânâŋ mi bohotawec.
14 Anutu, goki manahaŋtec ʒoaŋ ʒora ʒâic fua‐nare jujec,
â hae fureme sâc kâcbiŋ kihuc jupo.
15 No ʒiŋuc muzapo: “Dâŋ muŋgopieŋ ijaha mupe,”
ine fuŋfuŋfâcge maŋzi behec‐jopazapo hâcne.
16 Irec wiac i mana tarapemurâ mamanasu gie bapo;
erâ manape quŋkeme emâmâŋkepo.
17 Izi Anuture dâŋbiri soŋnere maŋnao raʒirâ,
miŋecne ŋic sindaŋne jaŋere hata tofane hone tarapo.
18 Jâmbomac, go mâreŋ sosowaricnao râec‐jopaekic,
eme rândiŋkerâ jopahuc qanʒaŋ‐jopaekac.
19 Jaŋe ɋeŋfâfâc jaha sipirickeeŋgopieŋ,
bipic tara‐jareha omaeeŋgopieŋ.
20 Guŋ manaku mana ɋâɋârepene arictac eekac,
iŋuc hâcne hawari‐jeŋicte ninikec fuaocmu.
21 Mârâc maŋnanezi mana hâtâwepo,
â bunane fârorockewec,
22 dameŋ ira mutuc matacne epo,
maigao qowi maŋ tâmiric tinac epo.
23 Mâcne, no sifu goheckoaŋ juhuc jupemu;
goki mefâre‐naneo basanaŋnukomec.
24 Go dâŋbirigere sâcko jowacnuekic,
â ʒâhec eri tatamacko râecnuzokic.
25 Go mocsâkoa sambâŋko junareekic,
â mâreŋko go basacguhuc wiac mocte mi enarekac.
26 Maŋ sahac jahec‐nane docke betaŋ ezo murâ enic:
Anutu go ine maŋnanere wâtuŋ â boreŋ‐nane fofo sanaŋ.
27 Jâmbomac, go behecgurâ raniŋmu jaŋe omaeniŋmu;
go eatuc egareniŋmu jaŋe bâsirowec‐jopacmu.
28 No ine Anutu gore maŋfuŋko jupe aŋacne ekac.
No Wofuŋ Anutu gorao roweckekopac;
go wiac eekic sasawa i muiŋ musawec epemu.